3 म्हारै प्रभु यीशु मसीह के पिता अर परमेसवर का धन्यवाद होवै, जो दया का पिता, अर जो हमेशा तसल्‍ली देवै सै। 4 परमेसवर म्हारै सारे दुखां म्ह तसल्‍ली देवै सै, ताके हम उस तसल्‍ली कै कारण जो परमेसवर म्हारै ताहीं देवै सै, उन ताहीं भी तसल्‍ली दे सका, जो इस तरियां के दुखां म्ह हो। 5 क्यूँके जिस तरियां मसीह म्ह हमनै घणे दुख होवै सै, उस्से तरियां ए मसीह कै जरिये हमनै घणी तसल्‍ली भी होवै सै। 6 जै हम दुख पावां सां, तो या थारी तसल्‍ली अर उद्धार कै खात्तर, क्यूँके परमेसवर म्हारे ताहीं तसल्‍ली देवै सै, तो वो थमनै भी तसल्‍ली देगा ताके थम धीरज कै गेल्या उन दुखां ताहीं सह लेओ सो, जिन नै हम भी सहवां सां। 7 अर म्हारी आस थारे बारै म्ह पक्‍की सै, क्यूँके हमनै बेरा सै, के थम जिस तरियां तै म्हारे दुखां म्ह साझ्झी सों, उस्से तरियां तै थम म्हारी तसल्‍ली म्ह भी साझ्झी सों।