1 "हे भाईयो अर बुजुर्गों, मेरा बदले म्ह जवाब सुणो, जो मै इब थारे स्याम्ही ल्याऊँ सूं।"

2 वे न्यू सुणकै के वो हम तै इब्रानी भाषा म्ह बोल्‍लै सै, और भी बोल-बाल्‍ले होगे। फेर उसनै कह्या 3 "मै तो यहूदी माणस सूं, जो किलिकिया के तरसुस नगर म्ह जन्मा, पर इस नगर म्ह गमलीएल के पायां कै धोरै बैठकै पढ़ाया गया, अर पूर्वजां के नियम-कायदा नै ठीक रीति तै सिखाया गया अर परमेसवर कै खात्तर इसी धुन लारया था, जिस तरियां थम सारे आज लारे सो। 4 मन्‍नै माणस अर लुगाई दोनुआ ताहीं जुड़-जुड़कै अर जेळ म्ह गेर-गेरकै, इस पंथ नै उरै ताहीं सताया के उन ताहीं मरवा भी दिया। 5 इस बात कै खात्तर महायाजक अर सारे यहूदी अगुवें गवाह सै, के उनतै मै भाईयाँ कै नाम पै चिट्ठियाँ लेकै दमिश्क नगर नै चाल्या जाऊँ था, के जो ओड़ै हों उन ताहीं भी सजा दुवाण कै खात्तर बाँधकै यरुशलेम नगर लाऊँ।"

6 "जिब मै चाल्दे-चाल्दे दमिश्क नगर कै लोवै पोंहच्या, तो इसा होया के दोपहर कै करीबन चाणचक एक घणा चाँदणा अकास तै मेरै चौगरदे नै चमक्या। 7 अर मै धरती पै गिर ग्या अर यो शब्द सुण्या, ‘हे शाऊल, हे शाऊल, तू मन्‍नै क्यांतै सतावै सै?’"

8 मन्‍नै जवाब दिया, "हे प्रभु, तू कौण सै?" उसनै मेरै तै कह्या, "मै यीशु नासरी सूं," जिस ताहीं तू सतावै सै। 9 मेरे साथियाँ नै चाँदणा तो देख्या, पर मेरै तै जो बोल्‍लै था उसनै समझ कोनी पाए।

10 फेर मन्‍नै कह्या, "हे प्रभु, मै के करुँ?" प्रभु नै मेरै तै कह्या, "उठकै दमिश्क नगर म्ह जा, अर जो किमे तेरे तै करण कै खात्तर ठहराया गया सै ओड़ै तेरे तै सब बता दिया जावैगा।" 11 जिब उस चाँदणे के तेज के मारे मन्‍नै किमे कोनी दिख्या, तो मै अपणे साथियाँ का हाथ पकड़े होए दमिश्क नगर म्ह आया।

12 "फेर हनन्याह नामक नियम-कायदे कै मुताबिक एक भगत माणस, जो ओड़ै के रहणीये सारे यहूदियाँ म्ह सुनाम्मी था, मेरै धोरै आया," 13 अर खड़े होकै मेरै तै कह्या, "हे भाई शाऊल, फेर देखण लाग।" उस्से बखत मेरी आँख खुलगी अर मन्‍नै उस ताहीं देख्या।

14 फेर उसनै कह्या, "म्हारै बाप-दाद्यां के परमेसवर नै तेरे ताहीं ज्यांतै ठहराया के तू उसकी मर्जी नै जाणै, अर उस धर्मी नै देक्खै अर उसकै मुँह की बात सुणै। 15 क्यूँके तू उसकी ओड़ तै सारे माणसां कै स्याम्ही उन बात्तां का गवाह होगा जो तन्‍नै देक्खी अर सुणी सै। 16 इब क्यांतै वार करै सै? उठ, बपतिस्मा ले, अर उसका नाम लेकै अपणे पापां की माफी पा ले।"

17 "जिब मै दुबारा यरुशलेम नगर म्ह आकै मन्दर म्ह प्रार्थना करण लागरया था, तो बेसुध होग्या, 18 अर उस ताहीं देख्या के वो मेरै तै कहवै सै, ‘तावळ करकै यरुशलेम नगर तै झट दे-सी लिकड़ज्या,’ क्यूँके वे मेरै बारै म्ह तेरी गवाही कोनी मान्‍नैगें।"

19 मन्‍नै कह्या, "हे प्रभु, उननै तो खुदे बेरा सै के मै तेरे पै बिश्वास करण आळा नै जेळ म्ह गेरू अर जगहां-जगहां आराधनालय म्ह छित्वाऊँ था। 20 जिब तेरे गवाह स्तिफनुस का लहू बहाया जाण लागरया था जद मै भी ओड़ैए खड्या था अर इस बात म्ह सहमत था, अर उसकै मारणीयां के लत्यां की रुखाळी करुँ था।"

21 अर प्रभु नै मेरै तै कह्या, "चल्या जा क्यूँके मै तेरे ताहीं गैर यहूदियाँ कै धोरै दूर-दूर भेज्जूँगा।"

22 माणस इस बात तक उसकी सुणदे रहे, फेर जोर तै चिल्‍लाए, "इसे माणस का नाश करो, उसका जिन्दा रहणा ठीक कोनी!"

23 जिब वे चिल्‍लान्दे अर लत्ते बगान्दे अर अकास म्ह धूळ उड़ावै थे, 24 तो पलटन के सरदार नै कह्या, "इस ताहीं गढ़ म्ह ले जाओ, अर कोड़े मारकै जाँच्‍चो, के मन्‍नै बेरा लाग्गै के माणस किस कारण उसकै बिरोध म्ह इस ढाळ चिल्‍लावै सै।" 25 जिब उननै उस ताहीं फित्त्यां तै बाँधया तो पौलुस नै उस सूबेदार तै जो धोरै खड्या था, कह्या, "के यो सही सै के थम एक रोमी माणस ताहीं, अर वो भी बिना कसूरवार ठहराए होए, कोड़े मारो?"

26 सूबेदार नै न्यू सुणकै पलटन के सरदार कै धोरै जाकै कह्या, "तू यो के करै सै? यो तो रोमी माणस सै।"

27 फेर पलटन के सरदार नै उसकै धोरै आकै कह्या, "मन्‍नै बता, के तू रोमी सै?" उसनै कह्या, "हाँ।"

28 न्यू सुणकै पलटन के सरदार नै कह्या, "मन्‍नै रोमी होण का पद घणे रपिये देकै मिल्या सै।" पौलुस नै कह्या, "मै तो जन्म तै रोमी सूं?"

29 फेर जो माणस उस ताहीं जांच्‍चण पै थे, वे जिब्बे उसकै धोरै तै हटगे, अर पलटन का सरदार भी न्यू जाणकै के यो रोमी सै अर मन्‍नै उस ताहीं बाँधया सै, डरग्या।

30 दुसरे दिन उसनै सही-सही जाणण की मर्जी तै के यहूदी उसपै क्यांतै दोष लावै सै, उसके बन्धन खोल दिए, अर प्रधान याजकां अर यहूदी अगुवां की सभा ताहीं कठ्ठा होण का हुकम दिया, अर पौलुस नै तळै ले जाकै उनकै स्याम्ही खड्या कर दिया।