यूहन्‍ना 7

त्यौहार म्ह यीशु का उपदेश

14 जिब त्यौहार के आध्धे दिन बीतगे, फेर यीशु मन्दर म्ह जाकै उपदेश देण लागग्या। 15 फेर यहूदियाँ नै हैरान होकै कह्या, "इसनै बिना पढ़े ज्ञान किस तरियां आ ग्या?" 16 यीशु नै उन ताहीं जवाब दिया, "जो उपदेश मै देऊँ सूं, मेरा अपणा कोनी, पर उसतै आवै सै जिसनै मेरे ताहीं भेज्या सै। 17 जै कोए माणस उसकी मर्जी पै चाल्‍लण का प्रण करै, तो उस ताहीं यो बेरा लाग ज्यागा, के यो उपदेश परमेसवर की ओड़ तै सै, या मै अपणी ओड़ तै देऊँ सूं। 18 जो अपणी ओड़ तै कुछ कहवै सै, वो खुद की बड़ाई चाहवै सै, पर जो अपणे भेजण आळे की बड़ाई चाहवै सै वोए सच्‍चा सै, अर उस म्ह अधर्म कोनी।