Mateus 25

तीन दास्सां का उदाहरण

14 सुर्ग का राज्य उस माणस के उदाहरण के समान भी सै, जिसनै परदेस जान्दे बखत अपणे नौकरां ताहीं बुलाकै अपणी कुछ सम्पत्ति उन ताहीं सौप दी, ताके वे व्यापर करकै घणा धन जोड़ ले। 15 उसनै एक तै पाँच तोड़े (1 तोड़ा 15 साल की मजदूरी के बराबर सै), दुसरे ताहीं दो, अर तीसरे ताहीं एक; यानिके हरेक नै उसकी काबिलियत कै मुताबिक दिया, अर फेर परदेस चल्या गया। 16 फेर, जिस ताहीं पाँच तोड़े मिले थे, उसनै जिब्बे जाकै उनतै लेण-देण करया, अर पाँच तोड़े*25:16 (1 तोड़ा 15 साल की मजदूरी के बराबर सै) और कमाए। 17 इस्से तरियां तै जिस ताहीं दो मिले थे, उसनै भी दो और कमाए। 18 पर जिस ताहीं एक मिल्या था, उसनै जाकै माट्टी खोद्दी, अर अपणे माल्‍लिक का धन लह्को दिया।

19 घणे दिनां पाच्छै उन नौकरां का माल्‍लिक आया, अर उनतै हिसाब लेण लाग्या, के उननै उन पईसा तै के कुछ करया। 20 जिसनै पाँच तोड़े मिले थे, उसनै पाँच तोड़े और ल्याकै कह्या, हे माल्‍लिक, तन्‍नै मेरै ताहीं पाँच तोड़े सौप्पे थे, लखा, मन्‍नै ये पाँच तोड़े और कमाए सै।

21 उसकै माल्‍लिक नै उसतै कह्या, शाबाश, हे भरोस्से के लायक आच्छे नौक्‍कर, तू थोड़े-से धन म्ह भी भरोसमंद लिकड़या, मै तन्‍नै घणी चिज्जां का अधिकारी बणाऊँगा। अपणे माल्‍लिक कै आनन्द म्ह साझ्झी हो।

22 फेर जिस ताहीं दो तोड़े मिले थे, उसनै भी आकै कह्या, हे माल्‍लिक, तन्‍नै मेरै ताहीं दो तोड़े सौप्पे थे, देख, मन्‍नै दो तोड़े और कमाए सै।

23 उसकै माल्‍लिक नै उसतै कह्या, शाबाश, हे भरोस्से के लायक आच्छे नौक्‍कर, तू थोड़े म्ह भी भरोसमंद लिकड़या; मै तन्‍नै घणी चिज्जां का अधिकारी बणाऊँगा। अपणे माल्‍लिक कै आनन्द म्ह साझ्झी हो।

24 फेर जिस ताहीं एक तोड़ा*25:24 (1 तोड़ा 15 साल की मजदूरी के बराबर सै) मिल्या था, उसनै आकै कह्या, हे माल्‍लिक, मै तन्‍नै जाणु था, के तू इसा माणस सै: जित्त किते तू बीज न्ही बोन्दा ओड़ै फसल काट्टै सै, अर जित्त न्ही खिंडान्दा ओड़ै तै कठ्ठा करै सै। 25 जै मै तेरा तोड़ा खो देता तो तू मन्‍नै दण्ड देता, ज्यांतै मै डरग्या अर जाकै तेरा तोड़ा माट्टी म्ह दबा दिया। देख, जो तेरा सै, वो यो सै।

26 उसकै माल्‍लिक नै उस ताहीं जवाब दिया, हे दुष्ट अर आलसी नौक्‍कर, जिब तन्‍नै न्यू बेरा था के जित्त मन्‍नै बीज न्ही बोया ओड़ै तै फसल काट्टू सूं, अर जित्त मन्‍नै न्ही खिंडाया ओड़ै तै कठ्ठा करुँ सूं; 27 जै तन्‍नै बेरा था के मै इसा सूं, तो तू मेरा धन सर्राफां नै ए दे देंदा, फेर मै आकै अपणा धन ब्याज सुधां ले लेन्दा।

28 माल्‍लिक नै अपणे नौकरां तै कह्या, ज्यातै वो तोड़ा*25:28 (1 तोड़ा 15 साल की मजदूरी के बराबर सै) उसतै ले ल्यो, अर जिसकै धोरै दस तोड़े सै उसनै दे द्यो। 29 क्यूँके जिस किसे धोरै सै, उस ताहीं और दिया जावैगा; अर उसकै धोरै घणा हो जावैगा: पर जिसकै धोरै न्ही सै, उसतै वो भी जो उसकै धोरै सै, ले लिया जावैगा। 30 इस निकम्मे नौक्‍कर नै बाहर अन्धेरे म्ह गेर द्यो, जित्त रोणा अर दाँत पिसणा होगा।