Mateus 28

यीशु का जी उठणा

1 आराम कै दुसरे दिन पाच्छै, हफ्तै कै पैहल्ड़े दिन, तड़कै ए तड़कै मगदला कस्बे की मरियम अर दुसरी मरियम कब्र नै देखण आई।

2 अर देक्खो, एक बड्ड़ा हाल्‍लण आया, क्यूँके प्रभु का सुर्गदूत सुर्ग तै उतरया अर धोरै आकै उसनै पत्थर ताहीं गिरड़या दिया, अर उसपै बैठग्या।

3 उसका रूप बिजळी बरगा था अर उसके लत्ते पाळे की ढाळ धोळे थे। 4 उसकै डर तै पहरेदार काम्बगें, अर मुर्दे की ढाळ होग्ये।

5 सुर्गदूत नै बिरबानियाँ ताहीं कह्या, "मतना डरो, मन्‍नै बेरा सै के थम यीशु नै जो क्रूस पै चढ़ाया गया था, टोह्वो सो। 6 वो उरै न्ही सै, पर अपणे वचन कै मुताबिक जिन्दा होग्या सै। आओ, या जगहां देक्खो, जित्त प्रभु राख्या गया था, 7 अर तावळे जाकै उसके चेल्यां ताहीं कहो के वो मरे होया म्ह तै जिन्दा होग्या सै, अर वो थारे तै पैहल्या गलील परदेस म्ह जावै सै, उड़ै उसका दर्शन पाओगे! देक्खो, मन्‍नै थारे तै कह दिया।"

8 वे भय अर घणी खुशी कै गेल्या कब्र तै तावळी बोहड़कै उसके चेल्यां ताहीं खबर देण नै भाज्जी गई।

बिरबानियाँ ताहीं यीशु का दर्शन

9 फेर यीशु उन ताहीं मिल्या। अर कह्या, "सुखी रहो।" उननै धोरै आकै अर उसके पाँ पकड़कै उस ताहीं प्रणाम करया। 10 फेर यीशु नै उनतै कह्या, "मतना डरो; मेरे चेल्यां तै जाकै कहो के गलील परदेस म्ह चले जावै, उड़ै वो मन्‍नै देखैगें।"

पहरेदारां ताहीं खबर देणा

11 जिब वे चेल्यां ताहीं या खबर देण जाण लागरी थी। तो पैहरेदारां म्ह तै, जो कब्र की रुखाळी करै थे, उन म्ह तै कईयाँ नै नगर म्ह आकै सारा हाल प्रधान याजकां तै कह सुणाया। 12 फेर उननै यहूदी अगुवां कै गेल्या कठ्ठे होकै सलाह करी अर सिपाहियाँ ताहीं घणाए धन देकै हुकम दिया, 13 "के माणसां तै न्यू कहियो के जिब हम रात नै सोण लागरे थे, तो उसके चेल्‍लें आकै उसकी लाश नै चुरा लेगे। 14 जै थारे सोण की खबर राज्यपाल कै कान्‍नां ताहीं पोहोचैगी, तो हम उसनै समझा लेवैगें अर थमनै जोखिम तै बचा लेवांगें।" 15 आखर उननै रपिये लेकै जिसे सिखाए गये थे, उस्से तरियां ए करया। या बात आज ताहीं यहूदी माणसां म्ह मान्‍नी जावै सै।

चेल्यां ताहीं दर्शन अर आखरी हुकम

16 ग्यारहां चेल्‍लें गलील परदेस म्ह उस पहाड़ पै गये, जिस ताहीं यीशु नै उन ताहीं बताया था।

17 उननै उसका दर्शन पाकै उस ताहीं प्रणाम करया, पर कईयाँ नै शक होया के यीशु जिन्दा होग्या सै। 18 यीशु नै उनकै धोरै आकै कह्या, "सुर्ग अर धरती का सारा हक मेरै ताहीं दिया गया सै। 19 इस करकै थम जाओ, सारी जात्तां के माणसां ताहीं चेल्‍ला बणाओ; अर उननै पिता, पुत्र अर पवित्र आत्मा कै नाम तै बपतिस्मा द्यो, 20 अर उननै सारी बात जो मन्‍नै थारे ताहीं हुकम दिया सै, मानणा सिखाओ: अर देक्खो मै दुनिया कै अंत तक सदा थारे गैल रहूँगा।"