यीशु के जरिये मत्ती का बुलाया जाणा
9 ओड़ै तै आग्गै बढ़ के यीशु नै मत्ती नाम के एक आदमी ताहीं चुंगी की चौकी पै बेठ्या देख्या, अर उसतै कह्या, "मेरा चेल्ला बणण खात्तर मेरै पाच्छै हो ले।" अर वो उठकै उसकै पाच्छै हो लिया।
10 जिब वो अर उसकै चेल्लें मत्ती के घर म्ह खाणा खाण खात्तर बेठ्ठे तो भोत-से चुंगी लेण आळे अर जिननै लोग पापी कहवै सै वे आकै उनकै गेल्या खाणा खाण बेठ्ठे। 11 या देखकै फरीसियाँ नै उसकै चेल्यां ताहीं कह्या, "थारा गुरु चुंगी लेण आळे अर पापी माणसां गेल्या क्यूँ खावै-पीवै सै?"
12 या सुणकै यीशु नै उनतै कह्या, "वैद आच्छे-बिच्छयां खात्तर कोनी पर बिमारां खात्तर जरूरी सै। 13 इस करकै थम जाओ अर समझ ल्यो के पवित्र ग्रन्थ के इस वचन का मतलब के सै: ‘मै बलिदान न्ही पर दया चाहूँ सूं।’ क्यूँके जो अपणे-आपनै धर्मी कहवै मै उननै न्ही, पर जो अपणे-आपनै पापी कहवै सै उननै बुलाण आया सूं।"9:13 (होशे. 6:6)