1 तुसे लोक आसा खे मसीह रे सेवक और परमेशरो रे पेतो रा पण्डारी समजो जिना खे सुसमाचारो री लूकी री सच्चाईया खे समजयाणे रा काम समाल़ी राखी। 2 एबे पण्डारियो ते ये उम्मीद कित्ती जाओई कि से विश्वासो जोगा निकल़ो। 3 पर मेरी नजरा रे ये बऊत छोटी गल्ल ए कि तुसे या माणूंआ रा कोई न्यायी माखे परखो, बल्कि आऊँ बी आपणे आपू खे नि परखदा। 4 कऊँकि मेरा विवेक माखे केसी बी गल्ला रे दोषी नि ठरांदा, पर इजी ते आऊँ निर्दोष नि ठईरदा कऊँकि मेरा परखणे वाल़ा प्रभु ए। 5 तो जदुओ तक प्रभु नि आओ, बखतो ते पईले केसी बी गल्ला रा न्याय नि करो, तेसी तो न्हेरे रे लकोईया रिया गल्ला प्रयासे रे दखाणियां और मनो रे विचार सामणे ल्याऊणे, तेबे परमेशरो री तरफा ते हर एकी री तारीफ ऊणी।

6 ओ साथी विश्वासियो, मैं इना गल्ला रे तुसा खे आपणी और अपुल्लोसो री चर्चा उदारणा री रीतिया पाँदे करी राखी, ताकि तुसे आसा रे जरिए ये सीखो कि कोई बी माणूं पवित्र शास्त्रो रे लिखी री गल्ला ते आगे नि बढ़ना और एक अगुवे रा पक्ष लयी की दूजे अगुवे रा बेज्जती करदे ऊए गर्व नि करना। 7 कऊँकि तांदे और दूजे रे कुण भेद करोआ? और तांगे क्या ए, जो तैं दूजे ते नि पाया और जबकि तैं दूजे ते पाई राखेया, तो एड़ा कमण्ड कऊँ करेया कि मानो पाई नि राखेया?

8 तुसे तो रजी गे, तुसे अमीर ऊई चुके, तुसे आसा ते बिना राज्य कित्तेया, पर पला ऊँदा कि तुसे राज्य करदे और आसे बी तुसा साथे राज्य करदे। 9 मेरी समजा रे परमेशरे आसा प्रेरिता खे सबी ते बाद तिना लोका जेड़े ठराया, जिना रे मरने री आज्ञा ऊई चूकी ओ, कऊँकि आसे दुनिया और स्वर्गदूत और माणूंआ खे तमाशा ठईरी रे। 10 लोक आसा खे मूर्ख समजोए ए कऊँकि आसे मसीह रा प्रचार करूँए। पर तुसे लोक ये समजी बैठे कि आसे अक्लमंद मसीह ए। आसे कमजोर समजे जाऊँए ए, पर तुसे आपणे आपू खे तागतबर समजोए। लोक तुसा रा आदर करोए, पर आसा रा नरादर ओआ। 11 आसे इना दिना तक पूखे-त्याये और नांगे ए और मुक्के खाऊँए और मारे-मारे फिरूँए, 12 और आपणे ई आथो रा काम करी की मईणत करूँए। लोक बुरा बोलोए और आसे तिना खे आशीष देऊँए। सेयो सताओए, आसे सईन करूँए। 13 सेयो लोक आसा खे बदनाम करोए और आसे तिना ते नरमाईया साथे गल्ल करूँए। एथो तक एबे बी लोक आसा रा आदर नि करदे सेयो बोलोए कि आसा री कोई बी कीमत निए।

14 आऊँ तुसा खे शर्मिंदा करने खे इना गल्ला खे नि लिखदा, पर आपणे प्यारे बाल़क जाणी की तुसा खे चिताऊँआ। 15 कऊँकि मसीह रे तुसा खे सखयाणे वाल़े दस ह्जार बी ऊँदे, तेबे बी तुसा रे पिते बऊत निए, इजी री खातर कि यीशु मसीह रे सुसमाचारो रे जरिए आऊँ तुसा रा पिता ऊआ। 16 तो आऊँ तुसा ते बिनती करूँआ कि मेरी जी चाल चलो। 17 इजी री खातर मैं तीमुथियुसो खे, जो प्रभुए रे मेरा प्यारा और विश्वासो जोगा पाऊ ए, तुसा गे पेजी राखेया और से तुसा खे मसीह रे मेरा चाल-चलण याद कराओगा, जेड़ा कि आऊँ हर जगा, हर एकी मण्डल़िया रे इजी रे बारे रे उपदेश करूँआ। 18 कुछ लोक ये समजी की कमण्ड करी की ईंयां फूली गे रे कि मानो आऊँ तुसा गे फेर आऊणा ई नि। 19 पर प्रभु चाओ तो आऊँ तुसा गे चट ई आयी जाणा और तिना कमण्ड कित्ते रिया गल्ला खे नि, पर तिना रे परमेशरो री सामर्था खे बी जाणी लऊँगा कि तिना रे पीतरे ये सामर्थ आये की नई। 20 कऊँकि परमेशरो रा राज्य गल्ला रे निए, पर सामर्था रे ए। 21 तुसे क्या चाओए? क्या आऊँ डण्डा लयी की तुसा गे आऊँ या प्यारो रे और नरमाईया री आत्मा साथे?