11 तेबे मैं स्वर्ग खुले रा देखेया। तेती मां सामणे एक सफेद कोड़ा था और तेस पाँदे एक सवार था, जेसखे विश्वासो जोगा और सच्चा बोलोए। और से धार्मिकता रे न्याय और लड़ाई करोआ। 12 तेसरी आखी आगी री लूपिया ए, तेसरे सिरो पाँदे बऊत सारे राजमुकट ए। और तेसरा एक नाओं तिजी पाँदे लिखी राखेया, जो तेसखे छाडी की ओर कोई नि जाणदा। 13 तिने खूनो बीचे डबोए रे टाल्ले पईने रे थे और तेसरा नाओं परमेशरो रा वचन ए। 14 स्वर्गो री बऊत सेना सफेद कोड़ेया पाँदे सवार और शुद्ध मलमल पईनी की तेस पीछे-पीछे थी। 15 जातिया-जातिया खे काणे खे तेसरे मुंओ ते एड़ी चोखी तलवार निकल़ोई और तेस लोए रा राजदण्ड लयी की तिना पाँदे राज्य करना और तेस सर्वशक्तिमान् परमेशरो रे डराऊणे प्रकोपो री जलजलाहटा रे शराबो रे कुण्डो रे दाख माण्डणी। 16 तेसरे टाल्ले और खुटिया रे ये नाओं लिखी राखेया: "राजेया रा राजा और प्रभुए रा प्रभु।"