1 मां आपणे पईरेदारा रे गुम्मटो पाँदे चढ़ी जाणा ओर आपणे पईरेदारा रिया जगा दे खड़े ऊई जाणा। तेती मां ये देखणे खे इंतजार करदे रणा कि यहोवा क्या बोलोआ ओर तेस मेरी शकाईता रा क्या ज्वाब देणा।

2 यहोवे माखे बोलेया, "दर्शणो रिया गल्ला लिखी दे, बल्कि फटिया दे साफ-साफ लिखी दे, ताकि कोई बी माणूं इजी खे सानिया दे पढ़ी सको। ओर से सन्देश ओरी लोका खे बी दशी सकोआ। 3 कऊँकि एस दर्शणो री गल्ल ठराए रे बखतो दे पूरी ऊणे वाल़ी ए, से बखत जो मैं राखी राखेया ए। ये आऊणे वाल़े बखत ए, पर ये पक्का ऊणा, जेड़ा मैं बोली राखेया ए। ये बऊत छोड़ नि ऊई सकदा, पर तुसा खे ईम्मत राखणी चाईयो। मां जो तुसा खे दखाणा से पक्का सई बखतो पाँदे पूरा ऊणा, इजी री खातर इजी रा इंतजार करो।" 4 एस सन्देशो तिना लोका री मताद नि करी पाणी जो इजी पाँदे त्यान देणे ते ना करोए। पर समजदार लोका एते सन्देशो पाँदे परोसा करना ओर आपणे परोसे रिया बजा ते तर्मी जिऊँदा रणा। 5 शराबो ते तोखा ओआ, कमण्डी माणूं कअरे नि रंदा ओर तेसरी इच्छा अधलोको जेड़ी पूरी नि ऊँदी ओर मौता जेड़ा तेसरा पेट नि फरदा। से सबी जातिया खे आपू गे खींजी लओआ ओर सबी देशो रे लोका खे आपू गे कट्ठा करी की राखोआ। 6 पक्का ई, इना लोका तेसरा मजाक करदे ऊए बोलणा, "तेस पाँदे लाणत ए जो इतणे दिना तक लूटणे लगी रा ए। जो एड़िया तिना चीजा खे लूटणे लगी रा ए जो तेसरिया नि थिया! जो कितणे ई लोका खे आपणे कर्जे रे बोजो थाले दबाणे लगी रा ए।"

7 अचाणक, तेरे देणदारा तेरे खलाफ काम करना। तिना तां पाँदे अमला करना ओर तेरा सब कुछ छुड़ाई लणा, जेबे कि तूँ कांबदा ओर बेसारा खड़ेया दा रणा। 8 कऊँकि तैं बऊत सारे देश लूटी राखे, एबे सबी बचे दे लोका तूँ लूटणा। तैं सारे देशो दे अत्या करी राखिया ओर शईरा दे लड़ाई चगड़े फलाई राखे। 9 लाणत ए तेस पाँदे, जो माणूं बुरे काम करने रिया बजा ते अमीर बणोआ, तेसरा ये अमीर बणना तेसखे ई बऊत बुरा ऊणा। एड़ा माणूं बची की रणे रिया तँईं एड़े काम करोआ। से सोचोआ कि से तेसरी चीजा खे चोरी करने ते दूजेया लोका खे रोकी सकोआ। पर तेस पाँदे बुरिया गल्ला पड़निया ई ए। 10 तैं बऊत जे लोक नाश करी की आपणे कअरो खे शर्म ऊणे जोगी योजना कित्ती ओर आपणे ई प्राणो रा दोषी ठईरी रा। 11 कअरो रिया कांदा रे पात्थर बी तुसा रे खलाफ चींगणे लगी रे, एथो तक की तेरे आपणे कअरो रे छतो रिया कड़िया ये मानणे लगी रिया कि तूँ बुरा ए।

12 लाणत ए तेस पाँदे, जो माणूं अत्या करी की शईर बणाओआ ओर बुरे काम करी की आपणे किले खे मजबूत करोआ। 13 देखो, क्या सेना रे यहोवे रिया तरफा ते ये नि ऊँदा कि दूजे देशा रे लोक काम तो करोए, पर सेयो आगी दे फूकी जाओए ओर राज्य-राज्य रे लोका रा काम बेकार ठईरोआ। 14 कऊँकि तरती परमेशरो रे महिमा रे ज्ञानो ते एड़ी परी जाणी, जेड़ा समुद्र पाणिए की परी जाओआ। 15 लाणत ए तेस पाँदे, जो आपणे पड़ोसिये खे शराब पल़्याओआ ओर तिदे जईर मलायी की नशेड़ी करी देयोआ, ताकि से आपणे ओश खोई देयो ओर तूँ तेसखे नांगा देखे। 16 पर तैं आपणे आपू खे बेज्जतिया जोगा करी ला दा ए। ये से महिमा नि ए जो तूँ चाए ई। इजी री खातर तां यहोवे रे दाणे आथो रे कटोरे ते पीणा। से तेसरे रोषो ते परेया दा ए। पी लो, ओर लोका तूँ नांगा देखणा। तेरी महिमा बेज्जतिया दे बदली जाणी।

17 तुसे लबानोनो रे बण बाडी राखे; एबे तुसे बी बाडे जाणे। तुसे तेतेरे जानवर कायी राखे; एबे जानवरा तुसे डराणे। ये तिना अत्या रिया बजा ते ऊणा जो तुसे करी राखिया ओर जो तुसे दुनिया रे लोका ओर तिना शईरा रे खलाफ लड़ाई चगड़ा करी राखेया। 18 कअड़ी रिया मूर्तिया रा क्या काम ए? ये सिर्फ एकी माणूंए रे जरीये बणाई दी चीज ए, ओर ये सिर्फ तुसा खे चूठ ई दशोई। इजी खे बनाणे खे इजी पाँदे परोसा करने ते क्या फाईदा ऊणा, एक एड़ा देवता जो बोली पनि सकदा! 19 लाणत ए तेस पाँदे, जो लकड़िया रिया मूर्तिया खे बोलोआ, जाग या तेस पात्थरो ते जो बोली नि सकदा, उठ! क्या तेस सिखाणा? देखो, से सूईने चाँदिए साथे मढ़ी राखेया, पर तिदे प्राण नि ए।*2:19 1 कुरि. 12:2 20 पर परमेशर आपणे पवित्र मन्दरो दे ए, सारी तरती तेस सामणे शान्त रओ।