1 तेस बखते यीशु रामो रे दिने डोरूआ रिये जाणे लगी रे थे। जेबे तिना रे चेलेया के पूख लगी, तेबे सेयो सिल्ले तोड़ी-तोड़ी की खाणे लगे। 2 तेबे फरीसिये तिना खे देखी की यीशुए खे बोलेया, "देख, तेरे चेले से काम लगी रे करने, जो रामो रे दिने करना ठीक निए।" 3 यीशुए तिना खे बोलेया, "क्या तुसे पढ़ी नि राखेया कि जेबे दाऊद और तेसरे साथिया खे पूख लगी, तो तिने क्या कित्तेया? 4 सेयो किंयाँ परमेशरो रे भवनो रे गये और तिने पेंटा रिया रोटिया खाईया, जबकि बिधानो रे मुताबिक तिना, ना तो से और ना तेसरे साथी खाई सको थे, पर पुरोईत ई खाई सको थे। 5 क्या तुसे बिधानो दे नि पढ़ेया कि पुरोईत रामो रे दिनो दे मन्दरो रे नियम तोड़ने दे बी दोषी नि ऊँदे? 6 पर आऊँ तुसा खे बोलूँए कि ऐती से ए, जो मन्दरो ते बी बड़ा ए। 7 जे तुसे एतेरा मतलब जाणदे कि, ‘आऊँ कृपा ते खुश ए,’ बलिदानो ते नि, तो तुसे निर्दोषो खे दोषी नि ठरांदे। 8 आँऊ माणूं रा पुत्र रामो रे दिनो रा बी प्रभु ए।"

9 तेथा ते चली की सेयो तिना रे प्रार्थना रे कअरो रे आए। 10 तेती एक माणूं था, जेसरा आथ सूकेया रा था। तिने यीशुए पाँदे दोष लगाणे रिया तँईं तिना ते पूछेया, "क्या रामो रे दिने चंगा करना ठीक ए?" 11 यीशुए तिना खे बोलेया, "तुसा बीचा ते एड़ा कूणे, जेसगे एक ई पेड ओ और से रामो रे दिने गड्डे रे पड़ी जाओ और से तेसा खे नि निकयाल़ो? 12 पला, माणूंए री कीमत तो पेडा ते कितणी बड़ी की ए। इजी री खातर बिधानो रे मुताबिक रामो रे दिने पला करना ठीक ए।" 13 तेबे यीशुए तेस माणूंए खे बोलेया, "आपणा आथ आगे कर" तिने आगे कित्तेया, तेबे तेसरा आथ दूजे आथो जेड़ा ठीक ऊईगा। 14 तेबे फरीसिये बारे जाई की यीशुए रे खलाफ योजना बणाई कि तिना खे किंयाँ बर्बाद करिए।

15 ये जाणी की यीशु तेथा ते चली गे और बऊत जणे तिना पीछे आईगे और यीशुए सबी खे चंगाई दित्ती। 16 तेबे यीशुए सेयो सावधान कित्ते कि मेरे बारे रे केसी गे नि बताणा, "आँऊ परमेशरो रा पुत्र ए।" 17 ताकि जो वचन यशायाह भविष्यबक्ते बोलेया था, से पूरा ओ;

18 "देखो, ये मेरा सेवक ए, जो मैं चूणी राखेया।

मेरा प्यारा, जेसते मेरा मन खुश ए,

मां आपणा पवित्र आत्मा तेसरे पाणा;

और तेस अन्य जातिया खे न्याय रा सुसमाचार देणा।

19 तेस ना चगड़ा करना, ना चिल्लाणा,

और ना ई केसी बजारो रे तेसरी आवाज सुणनी।

20 जो लोक बेसहारा ए, तेस तिना साथे नरमाईया ते पेश आऊणा।

तेस सेयो मरने नि देणे और तिना रा न्याय करना,

जदुओ तक तिना खे निर्दोष नि ठराई देओ।

21 जो दूजिया जातिया ऊणिया तिना खे तेसरे नाओं पाँदे उम्मीद रणी।"

22 तेबे लोक एक माणूंए खे तिना गे ल्याए, जो अन्दा और गूँगा था, तिने से ठीक कित्तेया और से देखणे और बोलणे लगेया। 23 ये देखी की लोक हैरान ऊई की बोलणे लगे, "क्या ये दाऊदो री ल्वाद ए?" 24 पर फरीसिये ये सुणी की बोलेया, "ये तो दुष्टात्मा रे सरदार शैतानो री मतादा ते दुष्टात्मा खे निकयाल़ोआ।" 25 यीशुए तिना रे मनो री गल्ल जाणी ली और तिना खे बोलेया, "जेस बी राज्य रे फूट ओई, से ऊजड़ी जाओआ, और कोई बी नगर या कराना, जिदे फूट ओई, से कदी नि बसी सकदा। 26 और जे शैतान ई शैतानो खे लगेया निकयाल़ने, तो से तो आपणा ई बिरोदी ऊईगा। तेबे तेसरा राज्य किंयाँ बणेया रा रणा? 27 जे आऊँ शैतानो री मतादा ते दुष्टात्मा खे निकयाल़ूँआ, तो तुसा रे वंश केसरी मतादा ते निकयाल़ोए? बस, तेबे सेयो ई तुसा रा न्याय करोगे। 28 पर जे आऊँ परमेशरो री पवित्र आत्मा री मतादा ते दुष्टात्मा खे निकयाल़ूँआ, तो परमेशरो रा राज्य तुसा गे आईगा रा।

29 "या किंयाँ कोई माणूं केसी तागतबरो रे कअरे कूसी की तेसरा माल लूटी सकोआ, जदुओ तक से तेसखे बानी नि लओगे? तेबेई से तेसरा माल लूटी सकोआ।

30 "जो मां साथे निए, से मेरे खलाफ ए और जो मां साथे कट्ठा नि करदा, से बखेरोआ। 31 इजी री खातर आऊँ तुसा खे बोलूँआ कि माणूंए रे सारे पाप और निन्दा माफ ऊई जाणे, पर पवित्र आत्मा री निन्दा माफ नि ऊणी। 32 जो कोई मां माणूं रे पुत्रो रे खलाफ कोई बी गल्ल बोलोगा, तेसरा ये पाप माफ ऊई जाणा। पर जो कोई पवित्र आत्मा रे खलाफ कुछ बी बोलोगा, तेसरा पाप ना तो एते लोको रे और ना ई परलोको रे माफ ऊणा।

33 "जे डाल़ो खे अच्छा बोलो, तो तिजी रे फलो खे बी अच्छा बोलो। या डाल़ो खे नकम्मा बोलो, तो तिजी रे फलो खे बी नकम्मा ई बोलो; कऊँकि डाल़ आपणे फल़ो साथे ई पछयाणा जाओआ। 34 ओ सापो जेड़े जईरीले लोको! तुसे बुरे ऊई की किंयाँ खरिया गल्ला बोली सकोए? कऊँकि जो तुसा रे मनो रे ओआ, सेई तुसा री जबानी पाँदे आओआ। 35 खरा माणूं आपणे खरे मनो रे पण्डारो ते खरिया गल्ला निकयाल़ोआ और बुरा माणूं आपणे बुरे मनो रे पण्डारो ते बुरिया गल्ला निकयाल़ोआ। 36 आऊँ तुसा खे बोलूँआ कि जो-जो नकम्मिया गल्ला माणूंआ बोलणिया, जेबे न्याय रा दिन आऊणा, तेबे तिना खे हर गल्ला रा लेखा देणा पड़ना। 37 कऊँकि तूँ आपणियां गल्ला तेई, दोषी और निर्दोष ऊणा।"

38 ये सुणी की कुछ शास्त्रिए और कुछ फरीसिये तिना खे बोलेया, "ओ गुरू! आसे तुसा ते एक चिह्न देखणा चाऊँए।" 39 यीशुए तिना खे ज्वाब दित्तेया, "एते जुगो रे बुरे और व्याभिचारी लोक चिह्न टोल़ोए; पर, योना भविष्यबक्ते रे चिह्नो खे छाडी की कोई ओर चिह्न् तिना खे नि देणा। 40 योना, तीन रात-दिन पाणिए रे बड़ी मच्छल़िया रे पेटो रे रया, तिंयाँ ई आँऊ माणूं रा पुत्र, तीन रात-दिन तरतिया ते पीतरे रणा। 41 नीनवे रे लोक न्याय रे दिनो दे, एस बखतो रे लोका साथे उठणे, और तिना सेयो ई दोषी ठराणे, कऊँकि तिने योने रा प्रचार सुणी की मन फेरेया, पर देखो, एती तो से ए, जो योना ते बड़ा ए। 42 दख्खणो री राणी, न्याय रे दिनो रे, एस बखतो रे लोका साथे उठणी और सेयो दोषी ठराणे, कऊँकि से सुलेमानो रा ज्ञान सुणने खे तरतिया रे दूजे कनारे पाँदा ते आयी थी और देखो, एती तो से ए, जो सुलेमानो ते बी बड़ा ए।

43 "जेबे दुष्टात्मा माणूंए ते निकल़ी जाओई, तेबे से सूकी जगा राम करने खे टोल़ो ई, पर तेसा खे मिलदी नि। 44 तेबे से आपणे आपू रे बोलोई, ‘मां आपणे तेस माणूंए रेई, जेथा ते से आयी थी, तेथी वापस चली जाणा।’ जेबे से वापस आओई, तेबे तेसा खे से माणूं कअरो जेड़ा, कल्ला, साफ-सुथरा और सजाया रा मिलोआ। 45 तेबे से दुष्टात्मा आपू साथे सात ओर दुष्टात्मा खे ल्याओई और सेयो तेस माणूंए रे बैठी जाओईया और तेथी वास करोईया और तेस माणूंए री दशा पईलकी दशा ते बी खराब ऊई जाओई। एस जुगो रे बुरे लोका री दशा बी एड़ी ई ऊणी।"

46 जेबे यीशु पीड़ा साथे इना गल्ला करने ई लगी रे थे, तेबे तिना री आम्मा और पाई बारे खड़ी रे थे और तिना साथे कुछ गल्ल करना चाओ थे। 47 तेबे किने तिना खे बोलेया, "देखो, तुसा री आम्मा और पाई और बईण बारे खड़ी रे और तुसा साथे गल्ल करना चाओए।" 48 ये सुणी की तिने बोलणे वाल़े खे ज्वाब दित्तेया, "कुण मेरी आम्मा ए? और कुण मेरा पाई ए?" 49 तेबे तिने आपणे चेलेया री तरफा खे आथ कित्तेया और बोलेया, "देखो, मेरी आम्मा और मेरे पाई तो यो ए। 50 कऊँकि जो कोई मेरे स्वर्गिय पिते री इच्छा पाँदे चलोआ, सेई मेरा पाई, बईण और आम्मा ए।"