1 ओ प्यारे साथी विश्वासियो! तुसे म्हारे महिमामय प्रभु यीशु मसीह रे चेले ए इजी खे तुसा बीचे पक्षपात नि ओ। 2 मानी लो जे एक माणूं सूईने रे छल्ले और सुन्दर टाल्ले पईनी की तुसा री सभा रे आओ और कंगाल़ बी मईले-चिथड़े टाल्ले पईनी की आओ 3 और तुसे तेस सुन्दर टाल्ले पईने रे खे बऊत इज्जती साथे बोलो, "तुसे तेती अच्छी जगा रे बैठो," और तेस कंगाल़ो खे बोलो, "तूँ एती खड़ा रओ या मेरे पैरो गे थाले बैठ," 4 तो क्या तुसे आपू-बीचे भेद-भाव नि कित्तेया और बुरे बिचारो ते न्याय करने वाल़े नि ठईरे?

5 ओ प्यारे साथी विश्वासियो सुणो! क्या परमेशरे एसा दुनिया रे कंगाल़ नि चूणे कि विश्वासो रे तर्मी और तेस राज्य रे अक्कदार ओ, जेतेरा वादा परमेशरे तिना ते कित्तेया, जो तेसते प्यार करोए? 6 पर तुसे तेस कंगाल़ो रा मजाक उड़ाया। क्या अमीर लोक तुसा पाँदे अत्याचार नि करदे, क्या सेयो ई तुसा खे कचैरिया रे कसिटी-कसिटी कि नि लयी जांदे? 7 क्या सेयो यीशु मसीह रे खरे नाओं री निन्दा नि करदे, जेसरे तुसा खे बोलोए।

8 तेबे बी तुसे एस पवित्र शास्त्रो रे वचनो रे मुताबिक, "तूँ आपणे पड़ोसिये साथे आपू जेड़ा प्यार राख," सच्ची तेस राज्य रे बिधानो खे पूरी करोए, तो अच्छा ई करोए। 9 पर जे तुसे पक्षपात करोए, तो पाप करोए और बिधान तुसा खे अपराधी ठराओए। 10 कऊँकि जो कोई सारे बिधानो खे मानोआ, पर एक ई गल्ला रे चूकी जाओआ, तो से सबी गल्ला रे दोषी ठईरेया। 11 कऊँकि जिने ये बोलेया, "तूँ व्याभिचार नि करना" तिने ई ये बोलेया, "तैं अत्या नि करनी।" इजी री खातर जे तैं व्याभिचार नि कित्तेया, पर अत्या कित्ती, तेबे बी तूँ बिधानो रा उल़घंन करने वाल़ा ठईरेया।

12 तुसे तिना लोका जेड़े वचन बोलो और काम बी करो, जिना रा न्याय आजादिया रा बिधानो रे मुताबिक ऊणा। 13 कऊँकि जिने दया नि कित्ती, तेसरा न्याय बिना दया ते ऊणा, दया न्याय पाँदे जयवंत ओई।

14 ओ प्यारे साथी विश्वासियो! जे कोई बोलो कि माखे प्रभु यीशु मसीह पाँदे विश्वास ए, पर दूजे खे कोई अच्छा काम नि करदा, तो तिजी ते क्या फाईदा? क्या एड़ा विश्वास कदी तेसखे बचाई सकोआ? 15 जे कोई विश्वासी पाई या बईण नांगे-क्वाड़े ओ और तिना खे हर-रोज रोटिया री कमी ओ 16 और तुसा बीचा ते कोई तिना खे बोलो, "बेफिकर ऊई की जाओ, तुसे गरम रओ और रज्जे रे रओ," पर जो चीजा शरीरो खे जरूरी ए से तिना खे नि देओ, तो क्या फाईदा? 17 तिंयाँ ई विश्वास बी, जे अच्छे कामो साथे नि ओ, तो से आपणे सबाओ रे मरे राए।

18 बल्कि कोई बोली सकोआ, "ताखे विश्वास ए और आऊँ अच्छे काम करूँआ।" पर आँऊ बोलूँआ, "तूँ आपणा विश्वास माखे अच्छे कामो ते बिना साबित कर और मां आपणा विश्वास आपणे अच्छे कामो साथे साबित करना।" 19 ताखे विश्वास ए कि एक ई परमेशर ए और तूँ अच्छा करेआ। पर दुष्टात्मा बी विश्वास करोईया और थरथराओईया। 20 ओ नकम्मे माणूं! क्या तूँ ये पनि जाणदा कि अच्छे कामो ते बिना विश्वास बेकार ए?

21 जेबे म्हारे पिते अब्राहमे आपणा पुत्र इसहाक बेदिया पाँदे चढ़ाया, तो क्या से कामो ते तर्मी नि ठईरेया? 22 तो तैं देखी ला कि विश्वासे तेसरे अच्छे कामो साथे मिली कि असर पाया और तेसरा विश्वास अच्छे कामो रे जरिए सिद्ध ऊआ। 23 और पवित्र शास्त्रो रा ये वचन पूरा ऊआ, "अब्राहमे परमेशरो पाँदे विश्वास कित्तेया और तेसरे विश्वासो रे जरिए परमेशरे से एक तर्मी माणूंए रे रूपो रे मानेया" और से परमेशरो रा दोस्त ऊआ। 24 तो तुसे देखी ला कि माणूं बस विश्वासो तेई नि, बल्कि अच्छे कामो ते बी तर्मी ठईरोआ। 25 तिंयाँ ई राहाब वेश्या बी, जेबे तेसे संदेश देणे वाल़े दूता खे आपणे कअरे शरण दित्ती और दूजी बाटा रिये तिना के दुश्मणा ते बची की निकल़ने रे मताद कित्ती, तो क्या कामे की तर्मी नि ठईरी? 26 इजी री खातर जिंयाँ शरीर आत्मा ते बिना मरे राए, तिंयाँ ई विश्वास बी अच्छे कामो ते बिना मरे राए।