1 हे ढ्लाव, तुस एप्पू ज़ानतथ कि इश्शू तुसन कां एजनू बेफैइदू न भोवं। 2 बल्के तुस एप्पू ज़ानतथ, कि असेईं पेइले फिलिप्पी नगरे मां दुख झ़ैल्‍लने ते मुसीबत झ़ैल्‍लने पुड़ भी इश्शे परमेशरे असन दिलेरी दित्ती, कि अस परमेशरेरी खुशखबरी बड़ी खलाफत भोंते भी तुसन शुनाम। 3 किजोकि इश्शी शिक्षा न टपलाने सेइं ते न धोखे सेइं, ते न बुरे मकसदे सेइंए। 4 पन ज़ेन्च़रे परमेशरे अस इस काबल बनेइतां असन खुशखबरी सौंफी, अस तेन्च़रे बियान केरतम, ते मैन्हन नईं, बल्के परमेशरे खुश केरनेरे लेई शिक्षा देतम, ज़ै इश्शे मन्न परखते। 5 तुस ज़ानतथ, कि असेईं कधी चपलूसारी गल्‍लां नईं कियोरी, ते न लालच़ेरे लेई बहानो केरते थी, परमेशर इस गल्‍लरो गवाहे। 6 ते असन मसीहेरे प्रेरित भोनेरे वजाई सेइं तुसन करां मद्दत नेनेरो अधिकार थियो। फिर भी अस मैन्हन करां आदर न थिये चाते, ते न तुसन करां, न होरि कोन्ची करां। 7 पन ज़ेन्च़रे अम्मा अपने बच्‍चां केरि हेरगेश केरतीए, तेन्च़रे असेईं भी तुसन मां रेइतां नरमी हिराई। 8 ते तेन्च़रे अस तुश्शू लालच़ केरते, न सिर्फ परमेशरेरी खुशखबरी, पन अपने-अपने प्राण भी तुसन देनेरे लेई तियार थिये, एल्हेरेलेइ तुस इश्शे बड़े ट्लारे भोइ जेवरे थिये।

9 किजोकि, हे ढ्लाव, तुस इश्शी मेहनत ते कष्टे याद रखतथ, कि असेईं एल्हेरेलेइ रात दिहैड़ी कारोबार केरतां तुसन मां परमेशरेरी खुशखबरी प्रचार की, कि तुसन मरां कोन्ची पुड़ भार न भोए। 10 तुस एप्पू गवाह आथ, ते परमेशर भी गवाहे, कि तुसन ज़ैना विश्वास केरतथ, अस केरही पवित्रता, ते धार्मिकता ते बेइलज़ामे सेइं राए। 11 तुसन पतोए, कि ज़ेन्च़रे बाजी अपने बच्‍चन सेइं बर्ताव केरते, तेन्च़रे अस भी तुसन मरां हर केन्ची शिक्षा देते, ते दिलासो देते, ते समझ़ते थिये। 12 कि तुस एरी ज़िन्दगी ज़ीथ ज़ैस सेइं परमेशर खुशी भोए, ज़ै तुसन अपने राज़्ज़े ते महिमा मां कुजाते।

13 अस भी परमेशरेरू शुक्र लगातार केरतम, कि ज़ैखन इश्शे ज़िरिये परमेशरेरी खुशखबरी तुसन कां पुज़ी ज़ै असेईं प्रचार की, त तुसेईं तै मैन्हु केरि नईं, बल्के परमेशरेरू वचन सेमझ़तां (ते सच़्च़े इन परमेशरेरू वचने) कबूल की, ते तै वचन तुसन मां ज़ैना मसीह पुड़ विश्वास केरतथ कम केरते। 14 एल्हेरेलेइ तुस, हे ढ्लाव, परमेशरेरी तैन कलीसियां केरि ज़ेरि चाल च़लने लाए, ज़ैना यहूदिया मां यीशु मसीह मां आन, किजोकि तुसन भी अपने लोकन करां एरो दुख मैल्हो, ज़ेन्च़रे तैन यहूदन करां मैल्होरो थियो। 15 ज़ैनेईं प्रभु यीशु ते नबी भी मारे, ते अस सताए, ते परमेशर तैन सेइं खुश नईं, ते तैना सेब्भी मैन्हु केरि खलाफत केरतन। 16 ते तैना गैर कौमन सेइं तैन केरे मुक्तरे लेई गल्‍लां केरने लेई असन रोकतन। तैना पापे पुड़ पाप केरतन ज़ांतगर परमेशर तैन सज़ाह न दे, ते हुनी परमेशरे तैन पक्‍को सज़ाह देनेबालोए।

17 हे ढ्लाव, ज़ैखन अस थोड़े च़िरेरे लेई मने मां नईं बल्के बांदे मां तुसन करां अलग भोवरे थी, ते असेईं बड़े लालच़े सेइं तुसन हेरनेरी बड़ी जादे कोशिश की। 18 एल्हेरेलेइ (मतलब मीं पौलुसे) एक्‍की बार नईं बल्के बार-बार तुसन कां एजनू चाव, पन शैताने अस तुसन कां एजनेरे लेई रोके। 19 भला इश्शी उमीद, या आनन्द, या बड़ीयैयरू ताज कौने? इन तुस भोल्हे ज़ैखन प्रभु यीशु वापस एज्जेलो 20 इश्शी बडीयाई ते आनन्द तुस आथ।