1 हुनी मेरे ढ्लाव बेइनव, अस तुसन परमेशरेरे अनुग्रहेरी खबर देतम, ज़ै मकिदुनिया इलाकेरे कलीसियारे लोकन पुड़ भोवरोए। 2 कि ज़ैखन बेड़ि मुसीबतां केरे ज़िरिये परखे जे, त तैना बड़े खुशी भोए, चाए तैना बड़े गरीब थिये फिरी भी होरि विश्वासी लोकां केरि मद्दत केरनेरे लेई खुल्‍ले दिले सेइं पेइंसो दित्तो। 3 ते तैन केरे बारे मां मेरी ई गवाहीए, कि तैनेईं अपने काबलीतरे मुताबिक बल्के अपने काबलीती करां भी जादे मने सेइं दित्तू। 4 ते इस दाने मां ते पवित्र लोकां केरि सेवा मां ज़ैना यहूदिया इलाके मां आन तैन केरे सेवाई मां मद्दत केरनेरे बारे मां असन सेइं बार-बार बड़ी बिनती की। 5 ते ज़ेन्च़रे असेईं उमीद न थी कियोरी, कि तैनेईं पेइलो अपनो आप प्रभुएरी सेवा केरनेरे लेई समर्पण कियो, फिरी परमेशरेरी मेर्ज़ी सेइं असन पत्ती च़लनेरे लेई अपनो आप समर्पण कियो। 6 एल्हेरेलेइ असेईं तीतुस समझ़व, कि ज़ेन्च़रे तैने पेइलू शुरू कियोरू थियूं, तेन्च़रे इस दानेरे कम्मे पूरू भी केरे। 7 ज़ेन्च़रे हर गल्‍ली मां मतलब विश्वासे, वचन प्रचार केरनेरी काबलीत, ज्ञाने ते सेब्भी किसमेरे कोशिश मां, ते तैस प्यारे मां, ज़ै तुस असन सेइं केरतथ, बद्धते गातथ, तेन्च़रे विश्वासी लोकन दान देनेरे कम्मे मां बद्धते राथ। 8 अवं हुक्मेरे तरीके पुड़ नईं, पन होरि केरे हिम्मतरे लेई ते तुश्शे प्यार ते सच़्च़ैई परखनेरे लेई ज़ोताईं। 9 तुस इश्शे प्रभु यीशु मसीहेरे अनुग्रह ज़ानतथ, कि तै धनी भोइतां भी तुश्शे लेई गरीब बनो ताके तैसेरे गरीब भोने सेइं तुस धनी भोथ। 10 ते इस गल्‍ली मां मेरो खियाल ईए, किजोकि तुश्शे लेई रोड़ूए; ज़ै एक्‍की साले करां न सिर्फ इस कम्मे केरने मां, बल्के इस गल्‍लरे चाने मां भी पेइले भोवरे थी। 11 एल्हेरेलेइ हुनी इन कम पूरू केरा; ज़ेन्च़रे तुस इच्छा केरनेरे लेई तियार थिये, तेन्च़रे अपने-अपने हैसयतरे मुताबिक पूरू भी केरा। 12 किजोकि अगर मनेरी तियारी भोए त दान तैसेरे मुताबिक कबूल भी भोते ज़ैन तैस कांए न कि तैसेरे मुताबिक ज़ैन तैस कां अथ्थी नईं। 13 अवं इन न चैई होरि केरि ज़िन्दगी आसान बनानेरे लेई तुस अपने ज़िन्दगी मुश्किल बनाथ। 14 पन बराबर भोनेरे खियालन सेइं इस वक्ते तुश्शू जादे तैन केरि घाटे मां कम्मे एज्जे, ताके तैन केरू जादे तुश्शे घाटे मां कम्मे एज्जे, कि बराबरी भोए। 15 ज़ेन्च़रे पवित्रशास्त्रे मां लिखेरूए,

"ज़ैनी बड़ू अकोट्ठू कियूं तैसेरू जादे न निस्सू,

ते ज़ैने थोड़ू अकोट्ठू कियूं तैसेरू घट न निस्सू।"

16 परमेशरेरू शुक्र भोए, ज़ैने तुश्शे लेई ज़ै सोच मेरे मने मांए तैए जोश तीतुसेरे मने मां छ़डोरोए। 17 कि ज़ैखन असेईं तैस तुसन कां एजनेरे लेई मिन्नत की त तैनी इश्शी गल मन्नी बल्के अपने मेर्ज़ी सेइं ते बड़े जोशे सेइं तुसन कां अव। 18 ते अस तैस सेइं साथी अक होरो विश्वासी ढ्ला भेज़ने लगोरेम, ज़ेसेरू नवं खुशखबरी शुनानेरे बारे मां कलीसियारे लोकन मां फैलोरूए। 19 ते एत्रू नईं, पन तै कलीसियां केरे लोकेईं ठहरावरो भी आहे, कि इस दानेरे कम्मेरे लेई असन सेइं साथी गाए ते अस ई सेवा एल्हेरेलेइ केरतम, कि प्रभुएरी महिमा भोए, ते इन हिरानेरे लेई कि अस यरूशलेमेरे विश्वासी लोकां केरि मद्दत चातम। 20 अस इस गल्‍ली मां हुशार रहतम, ते तीतुसे सेइं साथी विश्वासी लोक भेज़ने सेइं इस दान देनेबाले कम्मेरे बारे मां ज़ै सेवा अस केरतम, ताके कोई असन पुड़ दोष न लेई सखे। 21 किजोकि ज़ैना गल्‍लां सिर्फ प्रभुएरे नज़री मां रोड़ी नईं बल्के मैन्हु केरे नज़री मां रोड़ी आन, अस तैन केरि फिक्र केरतम। 22 ते अस तैन सेइं साथी अक होरो विश्वासी ढ्ला भी भेज़ी राओरेम, ज़ै असेईं बार-बार परखो ते बेड़ि गल्‍लन मां जोशे बालो निस्सो; पन हुनी तुसन पुड़ तैस बड़ो भरोसोए एल्हेरेलेइ तै दिले सेइं जोशे बालोए। 23 अगर कोई तीतुसेरे बारे मां पुछ़े, त तै मेरो साथीए, ते तुश्शे लेई मेरो मद्दतगारे, ते अगर इश्शे विश्वासी ढ्लां केरे बारे मां कोई पुछ़े, त तैना कलीसियां केरो भेज़ोरोए ते तैन केरि ज़िन्दगी सेइं मसीहेरी महिमा भोतीए। 24 एल्हेरेलेइ अपनो प्यार तैन हिराथ, सारे कलीसियां केरे विश्वासी लोकन सबूत देथ कि इश्शू तैन घमण्ड ज़ैन तुश्शे बारे मांए सच़्च़े।