1 एल्हेरेलेइ हे मेरे मट्ठां तीमुथियुस, तू अपने आपे मज़बूत केर इन ज़ैनतां कि परमेशरे तीं अनुग्रह दित्तोरो, ज़ै सिर्फ यीशु मसीह सेइं अक भोइतां मैलते। 2 तीं बड़े लोकां केरे सामने ज़ै मसीहेरे सन्देशी शिक्षा मीं करां शुनोरिन। एल्हेरेलेइ अवं चाताईं कि तैए सन्देश तू होरि विश्वासी लोकन शिखाल, ज़ैना वफादार भोन ते होरन शिखालनेरे काबल भोन। 3 बिलकुल तेन्च़रे ज़ेन्च़रे अक सिपाही जंगरे मैइदाने मुश्किल हालातन मां सबरी सेइं झ़ैल्‍लते, तेन्च़रे तू भी मुश्किल हालातन मां सबरी सेइं दुख झ़ैल्‍ल ज़ेन्च़रे अस यीशु मसीहेरे लेई झ़ैल्‍लतम। 4 अक सिपाही ज़ैखन फौजी मां नौकरी केरते त तै होरि किसमेरू कम न केरे, किजोकि तै अपने भरती केरनेबाले खुश केरनू चाते। 5 फिरी आखाड़े मां घुल्‍लने बालो अगर कानूनेरे मुताबिक न घुल्‍ले त तैस ताज न मैल्हे। 6 ज़ै ज़मीनदार मेहनत केरते, फसलरे पेइले हिस्सेरो हकदार तैए भोते। 7 ज़ैन अवं ज़ोताईं, तैस पुड़ ध्यान दे, ते प्रभु तीं सेब्भी गल्‍लां केरि समझ़ देलो। 8 लगातार याद रख कि यीशु मसीह कौने, तै दाऊदेरे खानदेंनी मरांए, ते परमेशरे तै मुड़दन मरां ज़ींतो कियो ते ईए खुशखबरी अवं लोकन शुनाताईं। 9 अवं खुशखबरी शुनाताईं एल्हेरेलेइ अवं मुजरामेरो ज़ेरो दुख झ़ल्‍लताईं, इड़ी तगर कि कैदे मां आईं, पन कोई भी लोकन परमेशरेरू वचन प्रचार केरने करां न रोकी बटे। 10 एल्हेरेलेइ अवं तैन लोकां केरे फैइदेरे लेई दुख झ़ल्‍लताईं ज़ैना परमेशरे च़ुनोरेन, ताके तैना भी यीशु मसीह पुड़ विश्वास केरतां मुक्ति हासिल केरन ते हमेशारी महिमा हासिल केरन।

11 ई गल सच़्च़े, कि

अगर अस तैस सेइं साथी मरे त तैस साथी ज़ींते भी भोमेले।

12 अगर अस तैसेरे वजाई सेइं दुख झ़ैल्‍लते रहले, त तैस सेइं साथी राज़ां केरू ज़ेरू अस भी राज़ केरमेले,

अगर अस तैसेरो इन्कार केरमेले कि अस तैस न ज़ानम, त तै भी इश्शो इन्कार केरेलो।

13 अगर अस मसीह सेइं साथी वफादार न भोम, त तै फिरी भी वफादार बनोरो रालो,

किजोकि तै अपने स्भावेरे खलाफ न गेइ बटे।

14 ज़ैना गल्‍लां मीं तीं सेइं ज़ोवरिन तैन तू अपने लोकन बिसरने न दे, ते प्रभुए गवाह रेखतां तैन खबरदार केर, कि लफसन पुड़ बेंस न केरन, ज़ैस सेइं किछ फैइदो न भोए, बल्के शुन्नेबालां केरो बड़ो नुकसान भोते। 15 बड़ी मेहनत केर ताके तू परमेशरेरे सामने कबूल भोनेरे काबल भोस, तू एरे मैन्हेरो ज़ेरो भोनेरी कोशिश केर ज़ै अपने कम्मेरे वजाई सेइं शरमिन्दा न भोए, ते ज़ै सच़्च़ो सन्देश ठीक तरीके सेइं शिखालतो भोए। 16 पन बेकार ते बेवकूफ गल्‍लन करां दूर राए, किजोकि एरी गल्‍लां परमेशरे करां दूर केरतिन। 17 ते तैन केरि गल्‍लां मैन्हेरे शड़ोरे ज़खमेरी ज़ेरि फैलतां लोकां केरे विश्वासे नाश केरतिन। ते हुमिनयुस ते फिलेतुस तैन केरे ज़ेरे आन। 18 तैनेईं सच़ पुड़ विश्वास केरनो बंद कियो। तैना ज़ोतन परमेशरे पेइले मर्रे विश्वासी लोक हमेशारे ज़िन्दगरे लेई ज़ींते कियोरेन। एसेरो नितीजो ई भोते कि किछ लोक मसीहेरी शिक्षाई पुड़ विश्वास केरनो बंद केरतन। 19 परमेशरेरे लोक पक्‍की मुनीयादरे ज़ेरे आन ज़ै हिल्‍ले न। इस मुनीयादी पुड़ एरे लफस लिखोरेन: "प्रभु ज़ानते तैसेरे लोक कौन आन, ते इन भी कि ज़ैना प्रभुएरी आराधना केरतन तैनेईं बुरां कम्मां केरनां बंद कियोरां लोड़न।"

20 एक्‍की अमीर घरे मां किछ सोन्नेरे ते चैंदरां भांडां भोतन ते लेकड़रां ते मितरां भोतन। माघां भांडां खास मौके पुड़ इस्तेमाल केरनेरे लेई भोतन ते सस्तां रोज़ इस्तेमाल केरनेरे लेई भोतन। 21 तेन्च़रे विश्वासी लोक ज़ैना अपनो आप एन सैरी बुरी चीज़न करां अलग केरे त तै कीमती भांडेरो ज़ेरो भोल्हो ज़ैन खास मौके पुड़ इस्तेमाल कियूं गाते, ज़ेसेरी ज़िन्दगी पवित्र भोल्ही त तै अपने मालिकेरे इस्तेमाल भोनेरे काबल भोल्हो। 22 जुवैनरी खुवैइशन करां दूर रा, ते ज़ैना मैन्हु शुद्ध मने सेइं प्रभुएरू नवं घिन्तन, तैन सेइं साथी धार्मिकता, विश्वास, प्यार, ते मेल मिलापेरो पीछो केर। 23 अवं फिरी ज़ोताईं तू अपनो आप बेवकूफी, ते बेफैइदी गल्‍लन करां दूर रख, किजोकि तू ज़ानतस, कि तैन सेइं लड़ाई भोतिन। 24 ते परमेशरेरो दास लड़ाको न लोड़े, पन सेब्भन सेइं दया केरनेबालो ते परमेशरेरे वचनेरी रोड़े च़ारे शिक्षा देनेबालो, ते ज़ैना लोक तैसेरे खलाफ भोन तैन सेइं सबर केरनेबालो लोड़े। 25 ते ज़ैना लोक तैसेरी खलाफत केरन तैन बड़े नेरमी सेइं शिखालनेबालो लोड़े, भोइ सकते परमेशर तैन लोकां केरि मद्दत केरे कि तैना मन फिरान, ते मसीहेरी सच़्च़ाई पिशानन 26 ते एरे लोक दुबारां फिरी साफ तरीके सेइं सोचनेरे काबल भोल्हे ते शैतानेरे धोखे करां ज़ै ज़ालेरे ज़ेरोए बच़ेले। शैताने तैना फसावरे थिये कि ज़ैन तै चाते तैना तैन करां कराए।