1 अवं यूहन्ना कलीसियारो बुज़ुर्ग आईं, हे ट्लारे गयुसे अवं तींजो ई चिट्ठी लिखने लगोरोईं। अवं सच़्च़े तीं सेइं प्यार केरताईं। 2 मेरे ट्लारे दोस्त, मेरी प्राथना ईए, कि ज़ेन्च़रे तू आत्मिक तरक्‍की केरि राहोरोस, तेन्च़रे तू सेब्भी गल्‍लन मां तरक्‍की केरतो रास, ते तेरी जान भी राज़ी राए। 3 किजोकि किछ विश्वासी लोकेईं मीं सेइं एइतां ज़ोवं, कि तू केन्च़रे सच़्च़ेरे मुताबिक ज़ींने लगोरोस त अवं बड़ो खुशी भोव। 4 ज़ैखन भी अवं शुनताईं कि तैना, ज़ैना मेरे बच्‍चां केरे ज़ेरे आन तैना सच़्च़ेरे मुताबिक ज़ीतन, तैखन अवं बड़ो खुशी भोताईं।

5 हे ट्लारा, तीं इश्शे विश्वासी सैथी केरि मद्दत केरनेरे लेई वफादैरी सेइं बड़ू किछ कियोरूए, इड़ी तगर ज़ैन तू ज़ानस भी न तैन केरि भी मद्दत केरतस। 6 इन मरां किछ लोकेईं इट्ठेरी कलीसियारे विश्वासी लोकन सेइं ज़ोवं, कि तुस अपने मसीही लोकन सेइं केत्रो जादे प्यार केरतथ। हुनी अवं तीं ज़ोताईं ज़ैना इना लोक तीं करां गान त तीं तैन केरि मद्दत केरती राहोरी लोड़े किजोकि एस सेइं परमेशर खुश भोते। 7 किजोकि इना लोक मसीहेरू वचन प्रचार केरनेरे लेई सफर केरतन, ते गैर विश्वासी लोकन करां किछ मद्दत न नेन। 8 एल्हेरेलेइ असेईं तैन केरि आदर-खातर कियोरी लोड़े, ताके अस भी तैन सेइं साथी सच़ प्रचार केरनेरे कम्मे मां शामल भोम।

9 मीं तुश्शे नगरेरे कलीसियारे लोकन पेइले चिट्ठी लिखोरी थी, पन दियुत्रिफेस मेरे हदायतन कबूल केरने करां इन्कार केरते, किजोकि तै हमेशा अपनो आप कलीसियारो लीडर बनानो चाते। 10 एल्हेरेलेइ अगर अवं एज्जेलो, त कलीसियारे लोकां केरे सामने ज़ैन तै केरि राहोरोए ज़ोइलो। तै इश्शे खलाफ बुरी-बुरी गल्‍लां ज़ोइतां झूठे दोष लाते, ते एत्रू नईं तै एप्पू प्रचार केरनेबालन कबूल न केरे, ते ज़ैना तैन कबूल केरने चातन, तैन भी ठाकते ते कलीसिया मरां कढतन।

11 हे ट्लारा, तैन लोकां केरि नकल न केरा ज़ैना बुरां कम्मां केरन, पन तैन लोकां केरू ज़ेरू बन्नेरी कोशिश केरा ज़ैना भला कम्मां केरतन। ज़ैखन कोई भला कम्मां केरते तैस सेइं साबत भोते कि तै परमेशरेरो बच्‍चोए, अगर कोई बुराई केरते तैस सेइं साबत भोते कि तै परमेशर न ज़ाने। 12 कलीसियारो सारे मैन्हु दिमेत्रियुसेरे बारे मां ज़ोतन कि तै रोड़ो मैन्हु आहे, किजोकि तै सच़्च़ेरे मुताबिक ज़ीते ते अस भी ज़ोतम कि तै अक रोड़ो मैन्हु आहे, ते तू ज़ानतस अस सच़ ज़ोतम।

13 बेड़ि गल्‍लां आन ज़ैना अवं तीं सेइं ज़ोनी चाताईं, पन अवं तैना एन्च़रे चिट्ठरे ज़िरिये कलमी न लिखनी चैई। 14 पन मीं उमीदे कि अवं तीं सेइं जल्दी मुलाकात केरेलो, तैखन अस आमने-सामने गल्‍लां केरमेले। 15 अवं प्राथना केरताईं परमेशर तीं शान्ति दे, इट्ठेरे मसीही दोस्त तींजो नमस्कार ज़ोतन, एट्ठेरे दोस्तन अकैल्‍ले-अकैल्‍ले मां गेइतां मेरू नमस्कार ज़ोइयां।