1 अवं पौलुस, त कने तीमुथियुस, यीशु मसीहेरे दास आम। इश्शे तरफां सेब्भी पवित्र लोकां केरां नंव्वां, ज़ैना मसीह यीशु मां भोइतां फिलिप्पी नगरे मां रहतन, रखवालन ते सेवकन समेत, 2 इश्शे बाजी परमेशर ते प्रभु यीशु मसीहे करां तुसन अनुग्रह ते शान्ति मैलती राए।

3 अवं ज़ैखन-ज़ैखन तुसन याद केरताईं, तैखन-तैखन अपने परमेशरेरू शुक्र केरताईं। 4 ते ज़ैखन भी तुश्शे सेब्भी केरे लेई बिनती केरताईं, ते हमेशा आनन्दे सेइं प्राथना केरताईं। 5 किजोकि तुस पेइले दिहाड़े करां अज़ तगर यीशु मसीहेरी खुशखबरी फैलाने मां मीं सेइं साथी शामल राहोरेथ। 6 ते मीं इस गल्‍लरो भरोसोए, कि परमेशरे तुसन मां रोड़े कम्मेरी शुरुआत कियोरीए, तैए तैस कम्मे यीशु मसीहेरे वापस एजनेरे दिहाड़े तगर पूरू केरेलो। 7 इन जाइज़े, कि अवं तुसन सेब्भी केरे लेई एरू सोची, किजोकि तुस मेरे मने मां बस्सोरेथ, ते मेरे कैदे मां खुशखेबरारे लेई जुवाब ते सबूत देने मां तुस सब मीं सेइं साथी अनुग्रहे मां मीं साथिथ, 8 इस मां परमेशर मेरो गवाहे, कि अवं यीशु मसीहेरो ज़ेरो प्यार केरतां तुश्शे सेब्भी केरि इच्छा केरताईं। 9 ते अवं ई प्राथना केरताईं, कि तुश्शो प्यार ज्ञान ते सेब्भी किसमेरो ज़मीर सेइं होरे भी बद्धते गाथ। 10 इड़ी तगर तुस रोड़ी करां रोड़ी गल्‍लां ट्लैरी समझ़ा, ते मसीहेरे दिहाड़े तगर सच़्च़े बनोरे राथ; ते ठोकर न खाथ। 11 ते तैस धार्मिकतारे फले सेइं ज़ै यीशु मसीहेरे ज़िरिये भोते, भेरोते गाथ ज़ैस सेइं परमेशरेरी महिमा ते बडीयाई भोती राए।

12 हे ढ्लाव ते बेइनव, अवं सच़ ज़ोताईं, कि तुस इन ज़ाना, कि मीं पुड़ ज़ै बीतोरीए, तैस सेइं खुशखेबरारी बड़ोतरी भी भोइ। 13 इड़ी तगर कि महाराज़ेरी सारी फौज ते बाकी सारे लोकन मां इन बांदू भोव कि अवं मसीहेरे लेई कैद मां आई। 14 ते प्रभु यीशु मां ज़ैना ढ्ला आन, तैन मरां बड़े मेरे कैद भोनेरे वजाई सेइं आन, तैना हिम्मत केरतां परमेशरेरू वचन बेधड़क भोइतां ते दिलेरी सेइं शुनानेरी कोशिश केरतन।

15 किछ लोक त जलन ते लड़ैई सेइं मसीहेरो प्रचार केरतन ते किछ लोक सच़्च़े दिले सेइं। 16 किछ त इन सेमझ़तां कि अवं खुशखेबरारे लेई जुवाब देनेरे लेई ठहरावरोई प्यारे सेइं प्रचार केरताईं। 17 पन तैना होरे लोक साफ दिले सेइं नईं पन जलनी सेइं मसीहेरो प्रचार केरतन, इन सेमझ़तां कि मेरे कैदे मां मेरे लेई मुसीबत बधान। 18 त कुन भोव? सिर्फ इन, कि हर बत्तां चाए बुरे खियाले सेइं, चाए सच़्च़ैई सेइं, मसीहेरे बारे मां खुशखेबरारो प्रचार भोते, ते अवं इस सेइं खुशी आईं, ते खुश भी रेइलो।

19 किजोकि अवं ज़ानताईं, कि तुश्शी प्राथनाई सेइं, ते यीशु मसीहेरी आत्मारे दाने सेइं इसेरो नितीजो मेरी मुक्ति भोल्ही। 20 अवं त दिले सेइं इन चाताईं, ते ई उमीद रखताई, कि अवं कोन्ची गल्‍ली मां न छिथोई, बल्के ज़ेन्च़रे मेरी बड़ी दिलेरी सेइं मसीहेरी बडीयाई मेरे जिसमे सेइं भोती राई, तेन्च़रे हुना भी भोए चाए अवं ज़ींतो रेइ या मेरि। 21 किजोकि मेरे लेई ज़ींतू रानू मसीहे, ते मरनू फैइदोए। 22 पन अगर जिसमे मां ज़ींतू रानू मेरे कम्मेरे लेई फैइदेमंदे त अवं न ज़ैनी, कि केस च़ुनी। 23 किजोकि मीं दूईयां केरे मझ़ाटे च़ुने मां मुश्किल भोने लगोरीए। अवं मरनू चाताईं ताके सुर्गे मां मसीह साथी रेइ बेटि, किजोकि इन बड़ू ज़रूरीए। 24 पन तुश्शी मद्दत केरनेरे लेई मेरू ज़ींतू रानू बड़ू ज़रूरीए। 25 एल्हेरेलेइ कि मीं इलहेरो भरोसोए ते अवं ज़ानताईं कि अवं ज़ींतो रानोई, बल्के तुसन सेब्भन सेइं साथी रानोई ज़ैस सेइं अवं तुश्शी मद्दत केरि, कि विश्वासे मां मज़बूत भोथ, ते इस मां खुशी राथ। 26 ज़ैखन अवं तुसन कां दुबारां एज्जी, तुसन कां जादे वजा भोल्ही यीशु मसीह पुड़ घमण्ड केरनेरी एल्हेरेलेइ ज़ैन किछ तै मेरे ज़िरिये केरने लगोरोए। 27 सिर्फ एत्रू केरा कि तुश्शो चाल चलन मसीहेरे खुशखेबरारे काबल भोए। चाए अवं तुसन एइतां हेरी, चाए न एज्जी, तुश्शे बारे मां इन शुनी, कि तुस अक मन भोइतां बनोरे रहतथ, ते अकोट्ठे भोइतां खुशखेबरारे विश्वासेरे लेई मेहनत केरते रहतथ। 28 ते कोन्ची गल्‍ली मां खलाफत केरनेबालन करां न डराथ। ई तैन केरे लेई बरबाद भोनेरो साफ निशाने, पन तुश्शे लेई मुक्तरो, ते इन परमेशरेरे तरफांए। 29 किजोकि मसीहेरे वजाई सेइं तुसन पुड़ ई अनुग्रह भोव कि न सिर्फ तैस पुड़ विश्वास केरा पन तैसेरेलेइ दुख भी झ़ैल्‍लां। 30 ते तुसन तेन्च़रे मुसीबत केरनीए, ज़ेन्च़रे तुसेईं मीं करां केरते लाहोरीए, ते हुना भी शुन्तन, कि अवं तेन्च़रे केरताईं।