15 बादे मां, यीशु त तैसेरे चेले लेवेरे घरे मां रोट्टी खाने बिश्शे। तैखन बड़े चुंगी नेनेबाले त होरे पापी मैन्हु (लोक तैन केरे बारे मां सोचते थिये कि एना पापिन।) भी यीशु त तैसेरे चेलन सेइं साथी रोट्टी खाने बिश्शे, किजोकि एन केरे ज़ेरे बड़े लोक यीशु पत्ती च़लते थिये। 16 ज़ैखन किछ शास्त्री लोकेईं त कने फरीसी लोकेईं हेरू कि यीशु पापी मैन्हन त चुंगी नेनेबालन सेइं साथी रोट्टी खाने लग्गोरोए, तैखन तैनेईं यीशुएरे चेलन सेइं ज़ोवं, "तै चुंगी नेनेबालन त पैपन सेइं साथी किजो खाते पीते?" 17 यीशुए तैन केरि गल शुन्तां तैन मिसाल देइतां जुवाब दित्तो, "सझ़र लोकन डाक्टरेरी ज़रूरत न पे, पन बिमार मैन्हन ज़रूरत पेचे। तेन्च़रां, अवं तैन मैन्हु केरे लेई नईं एवरोईं ज़ैना अपने आपे धर्मी समझ़तन, पन पापी मैन्हन कुजाने एवरोईं, ताके तैना अपने पापन केरां मन फिरान।"
बरत रखनेरे बारे मां सवाल।
(मत. 9:14-17;लूक. 5:33-39)