1 तैल्‍ला पत्ती, यीशु एक्‍की प्राथना घरे मां जेव। तैड़ी अक मैन्हु थियो, ज़ेसेरो हथ शुक्‍कोरे थियो। 2 तैड़ी किछ फरीसी लोक भी थिये, ज़ैना यीशु पुड़ इलज़ाम लानो चाते थिये। एल्हेरेलेइ तैना यीशु ध्याने सेइं हेरने लग्गोरे थिये कि आरामेरे दिहाड़े तै तैस मैन्हु बज़्झ़ाते की नईं। 3 तैखन यीशुए शुक्‍कोरे हथ्थेबाले मैन्हु सेइं ज़ोवं, "मझ़ाटे खड़े भो।" (ते तै मैन्हु खड़ो भोव।) 4 त यीशुए तैन लोकन पुछ़ू, "आरामेरे दिहाड़े कुन केरनू जाइज़े, मैन्हेरू भलू केरनू या बुरू केरनू, मैन्हेरी जान बच़ानी या मारनी?" पन तैना च़ुप राए। 5 त तैनी सरकी सेइं तैन केरे च़ेवरे पासन तक्‍कू, पन तैन केरे सखत दिलेरी वजाई सेइं उदास भोव। तैखन तैनी तैस मैन्हु सेइं ज़ोवं, "अपनो हथ अग्रोवं केर।" तैनी मैन्हे अपनो हथ अग्रोवं कियो। त अकदम तैसेरो हथ बेज़्झ़ोव। 6 तैखन फरीसी लोक प्राथना घरे मरां बेइर जे। अकदम तैना हेरोदेस राज़ेरे लोकन सेइं साथी यीशुएरे खलाफ साज़िश केरने लग्गे कि यीशुएरो कोस तरीके सेइं कत्ल केरम।

7 तैल्‍ला पत्ती, यीशु अपने चेलन सेइं साथी गलील समुन्दरेरे पासे जेव। मैन्हु केरि बड़ी भीड़ तैस पत्ती च़ली। गलील त यहूदिया इलाकां केरे लोक तैस कां आए। 8 यरूशलेम नगरेरे लोक, इदूमिया इलाकेरे लोक ते यरदन दरियारे पारेरे लोक त कने सूर त सैदारे आसे पासेरे लोक भी तैस कां एवरे थिये। तैना सब यीशु कां आए, किजोकि तैनेईं यीशुएरे सारे चमत्कारेरे कम्मां केरे बारे मां शुनोरू थियूं, ज़ैना तै केरतो थियो। 9,10 यीशुए बड़े लोक हथ लेहितां बज़्झ़ावरे थिये, एल्हेरेलेइ होरे बड़े लोक ज़ैना बड़े बिमार थिये, तैना तैस सेइं हथ लानेरे लेई तैस पुड़ बिछ़ड़ी गाते थिये, ताके तैना भी बेझ़ोन। मैन्हु केरि भीड़ बड़ी जादे थी। एल्हेरेलेइ यीशुए अपने चेलन सेइं ज़ोवं, "मेरे लेई अक किश्ती तियार केरा, ताके एना लोक मीं ढ्लेन्च़ी न सकन।" 11 त ज़ैन लोकन पुड़ भूतां केरो सायो थियो, तैना भी यीशु लेहितां तैसेरे पव्वन पुड़ बिछ़ड़ी गाते थिये। तैना भी ज़ोरे-ज़ोरे सेइं ज़ोते थिये कि, "तू परमेशरेरू मट्ठू आस।" 12 यीशुए तैन भूतन सखत हुक्म दित्तो कि, "मेरे बारे मां लोकन न ज़ोथ कि अवं कौन आईं।"

13 तैल्‍ला पत्ती, यीशु एक्‍की पहाड़े पुड़ च़ढ़ो। ज़ैना मैन्हन तै अपने चेले बनानो चातो थियो, तैना एप्पू कां कुजाए। तैना तैस कां आए। 14 यीशुए तैन मरां 12 मड़द च़ुने, ते तैन प्रेरित नवं दित्तू कि तैना तैस सेइं साथी-साथी रान, ताके तै तैन लोकन खुशखबरी शुनाने भेज़े। 15 यीशुए तैन्न, लोकां केरि बिमैरी बझ़ाने त कने मैन्हन मरां भूतां केरो सायो कढनेरो अधिकार दित्तो। 16 तैना 12 मैन्हु केरां नंव्वां इना थियां: शमौन ज़ेसेरू नवं यीशुए पतरस रख्खू, 17 याकूब त तैसेरो ढ्ला यूहन्ना, एना दूईये जेब्देरां मट्ठां थियां, त यीशुए एन दूईयां केरू नवं बुअनरगिस रख्खू, मतलब कि, गुड़नेरां मट्ठां। 18 त अन्द्रियास, फिलिप्पुस, बरतुल्मै, मत्ती, थोमा, याकूब ज़ैन हलफईसेरू मट्ठू थियूं, त तद्दै, शमौन ज़ै पेइले रोमी सरकारारे खलाफ यहूदी लोकां केरि एज़ैदेरे लेई लड़नेबालो थियो। 19 त कने यहूदा इस्करियोती ज़ैनी बादे मां यीशु धोखे सेइं ट्लुवाव।

20 तैल्‍ला पत्ती यीशु कफरनहूम नगरेरे एक्‍की घरे मां जेव। फिरी मैन्हु केरि भीड़ तैस घरे मां अकोट्ठी भोइ, कि यीशु त तैसेरे चेलन रोट्टी खानेरे लेई भी मौको न मैल्हो। 21 ज़ैखन यीशुएरे रिश्तेदारेईं एन शुनू, त तैना तैस ट्लेइतां अपने घरे वापस आन्नेरे लेई जे, किजोकि तैना ज़ोने लग्गोरे थिये कि तैसेरो दिमाग ठीकाने नईं। 22 किछ शास्त्री लोक, ज़ैना यरूशलेम नगरेरां एवरे थिये, तैना लोकन सेइं ज़ोई राओरे थिये कि, "यीशु मां शैतान आहे।" त एन भी ज़ोई राओरे थिये कि, "ते भूतां केरे प्रधानेरी शेक्ति सेइं लोकन मरां भूतां केरो सायो कढते।" 23 एल्हेरेलेइ यीशुए तैना नेड़े कुजाए ते तैन मिसाल देइतां ज़ोने लगो, "शैतान केन्च़रां अपने भूतन लोकन मरां केढी सकते? 24 अगर एक्‍की राज़्ज़ेरे लोक अपने राज़्ज़ेरे खलाफ लड़ाई केरन, त तैन राज़ बनोरू न रेइ सके। 25 अगर केन्ची टब्बरेरे लोक अपने टब्बरेरे खलाफ लड़ाई केरन, त तैन टब्बर भी बनोरू न रेइ सके। 26 तेन्च़रे, शैतान भी अगर एप्पू अपने भूतां केरे खलाफ लड़ाई केरे, त तै केन्च़रां बनोरो रेइ सकते? तैसेरो त बिलकुल खातमों भोइ गालो। 27 अवं होरि मिसाल देताईं, कोई मैन्हु केन्ची ज़ोरेबाले मैन्हेरे घरेरे मां गेइतां तैसेरो माल तांतगर लुट्टी न सके, ज़ांतगर कि तै पेइले तैस ज़ोरेबाले मैन्हु बेन्धी न छ़ड्डे। तैखन तै तैस ज़ोरेबाले मैन्हेरो माल लुट्टी सकते। अवं भी शैतानेरे भूतां केरो सायो लोकन मरां केढी सकतां। (शैतान तैस ज़ोरेबाले मैन्हेरो ज़ेरोए) 28 अवं तुसन सेइं सच़ ज़ोताईं कि मैन्हु केरे सारे किसमां केरे पाप त कने परमेशरेरी तुहीन, ज़ै तैना केरतन, अगर तैना मन फिरान त परमेशर तैन माफ़ केरेलो। 29 पन ज़ै कोई पवित्र आत्मारी तुहीन केरे, त तैस कधी भी परमेशर माफ़ न केरेलो। पन तै मैन्हु हमेशारे पापेरो दोषी बेनि गालो।" 30 यीशुए एन्च़रां ज़ोवं किजोकि तैना यीशुएरे बारे मां एन ज़ोते थिये कि तैस पुड़ भूतेरो सायोए।

31 तैखन यीशुएरी अम्मा त कने तैसेरे ढ्ला तैड़ी आए। तैना घरेरे बेइर खड़े भोइतां तैस जो बिस्तार भेज़ो। 32 तैना घरेरे अन्तर न गेइ सके किजोकि मैन्हु केरि भीड़ यीशुएरे च़ेवरे पासन बिशोरी थी। एल्हेरेलेइ तैन लोकेईं यीशु सेइं ज़ोवं, "तक, तेरी अम्मा त तेरे ढ्ला बेइर खड़ेन। तैना तीं सेइं मिलनू चातन।" 33 पन यीशुए तैन्न जुवाब दित्तो, "अवं तुसन ज़ोताईं मेरी अम्मा त कने मेरे ढ्ला कौन आन!" 34 तैखन यीशुए तैन लोकां केरे पासे तेकतां ज़ोवं, ज़ैना तैसेरे च़ेवरे पासन बिश्शोरे थिये, "तक्‍का, मेरी अम्मा त कने मेरे ढ्ला इना आन। 35 किजोकि ज़ै कोई परमेशरेरी मेर्ज़ी पुड़ च़लते, तैए मेरो ढ्ला, मेरी बेइन ते मेरी अम्मा आहे।"