प्रेरितां दे कम्म 2

पबित्र आत्मा दा उतरणा

1 जालू यहूदियां दे पिन्तेकुस्ते त्योहारे दा दिन आया, तां सारे भरोसा करणे बाले इकी जगा पर गिठे थे।*2:1 (लैव्य. 23:15-21, व्य. 16:9-11) पूराणे नियमे च पिन्तेकुस्त दे त्योहारे जो हफत्यां दा त्योहार (निर्गमन 34:22) कने कटणी दा त्योहार दे नाए ला जाणया जांदा था। (निर्गमन 23:16) पिन्तेकुस्त यहूदी त्योहार है जिदा मतलब है पचासमा, ऐ फसह दे त्योहार दे पजां दिन बाद ओंदा है (यीशु मसीह दी मौत फसह दे बकत होई थी)। 2 तालू अचानक अम्बरे ला इक अबाज सुणोई, सै अबाज तेज होआ सांई थी, कने उसा ने सारा घर जिथू सै बैठयो थे गूंजी पिया। 3 तालू उना दे सामणे अग्गी सांई चीजां दा झुण्ड प्रगट होया जड़ा जीभा दे अकारे दा लगा दा था, जड़ा लग होईकरी उना चे हर इक माणुऐ पर रुकदी गेई। 4 कने सै सारे पबित्र आत्मा ला भरुई गे, कने जियां ही पबित्र आत्मा उना जो बोलणे दी शक्ति दिती, सै होर-होर भाषा च बोलणा लग्गे।