यीशुऐ दे जन्म दी घोषणा
26 जालू एलीशिबा जो छेमा मिना लगया था तालू परमेश्वरे दिया तरफा ला जिब्राईल स्वर्गदूत गलील प्रदेश दे नासरत शेहरे च इक कुवारिया बाल गिया, 27 जिसा दी मंगणी राजा दाऊदे दे बंशे दे यूसुफ नाऐ दे इक मरदे ने होईयो थी; उसा कुवारिया दा ना मरियम था। 28 कने स्वर्गदूते अन्दर आई करी उसा जो बोलया, "खुशी कने तेरी जय हो, परमेश्वरे तिजो पर कृपा किती है! परमेश्वर तेरे सोगी है।" 29 सै इस बचने ला बड़ी घबराई गेई, कने सोचणा लग्गी की इसा गल्ला दा क्या मतलब है? 30 स्वर्गदूते उसा जो बोलया, "हे मरियम, डर मत, क्योंकि तिजो पर परमेश्वरे दी कृपा होईयो है। 31 कने दीख, तू लेर्थिया होणा है, कने तिजो इक जागत पैदा होणा है; कने तू उदा ना यीशु रखयां।1:31(यशा. 7:14) 32 कने उनी बड़ा महान होणा; कने उसयो परमेश्वरे दा पुत्र बोलया जाणा; कने प्रभु परमेश्वरे उसयो उदे पूर्वज दाऊदे सांई राजा बणाना है।1:32 (भज. 132:11, यशा. 9:6-7) 33 कने उनी इस्राएल दे लोकां पर हमेशा राज करणा; कने उदे राज्य दा कदी अंत नी होणा।"1:33 (2 शमू. 7:12, 16, इब्रा. 1:8, दानि. 2:44)
34 मरियमा स्वर्गदूते जो बोलया, ऐ कियां होणा? मेरा तां अजे बियाह भी नी होया है। 35 स्वर्गदूते उसा जो जबाब दिता, पबित्र आत्मा तिजो पर उतरणा है, कने परमेश्वरे दिया शक्तिया तिजो पर छां करणी है, तांई तां तेरा जन्म लेणे बाला जागत पबित्र होणा है, सै परमेश्वरे दा पुत्र बोलया जाणा। 36 कने सुण तेरी रिशतेदार एलीशिबा दे भी बुडे बारे बच्चा होणेबाला है, ऐ इसा दा छेमा महिना है जिसा जो लोक बांज बोलदे थे। 37 क्योंकि परमेश्वर सब कुछ करी सकदा है।1:37 (मत्ती 19:26, यिर्म. 32:27) 38 मरियमा बोलया, "दीख, मैं प्रभु दी दासी है, जियां तू बोलया है सेई मेरे सोगी हो।" तालू स्वर्गदूत ओथु ला चली गिया।