54 फिरी सै उसयो पकड़ी करी लेई चले, कने महायाजक दे घरे जो लेई आये कने पतरस दूरे-दूरे ला ही उना दे पिच्छे चलया था। 55 कने जालू सै अंगणे च अग्ग वाल्ली करी गिठे बैठे, तां पतरस भी उना दे बिच बेई गिया। 56 कने इक दासिया उसयो अग्गी दी लौई च बैठया दिखीकरी कने उदे पासे दिखीकरी बोलणा लग्गी, "ऐ भी तां यीशुऐ सोगी था।" 57 पर पतरसे ऐ बोली करी मना किता, की मैं इसयो नी जाणदा। 58 थोड़ी देरा बाद फिरी कुनकी होरनी उसयो दिखीकरी बोलया, "तु भी तां उना चे है।" पतरसे बोलया, "सै माणु मैं नी है।" 59 कोई इक घंटे बाद इक होर माणु बोलणा लग्गा, "पक्का ऐ भी उना सोगी ही था; क्योंकि ऐ भी गलीली है।" 60 पतरसे बोलया, "मिंजो नी पता की ऐ क्या बोला दा है?" पतरसे दे इयां बोलदे ही, मुर्गे झट बांग देई दिती।
61 तालू प्रभु यीशुऐ मुड़ी करी पतरसे पासे दिखया, कने पतरसे जो सै गल्ल याद आई जड़ी उनी बोलियो थी, "अज मुर्गे जो बांग देंणे ला पेहले, तू तिन्न बरी मिंजो मना करणा है।" 62 कने पतरस बाहर निकली करी बड़ा भरी रोणा लग्गा।
यीशुऐ दी बेजती
(मत्ती 26:67-68; मरकु 14:65)