57 जालू सै रस्ते च चलयो थे, तालू कुनकी उसयो बोलया, "जिथू-जिथू तू जांगा, मैं भी तेरे पिच्छे जाणा।" 58 यीशुऐ उसयो बोलया, "लोमड़ियां जो रेहणे तांई कुडी न, कने अम्बरे दे पंछियां दे घोंसले होंदे न; पर मिंजो, माणुऐ दे पुत्रे बाल इक भी घर नही है, जिथू मैं सोई सकें।"
59 उनी दूऐ ने बोलया, "मेरे चेले बणी जा।" उनी बोलया, "प्रभु जी, मिंजो पेहले जाणा दे ताकि मैं अपणे पिता जो दबी ओऐ।" 60 उनी उसला बोलया, "जड़े लोक आत्मिक रुपे ने मरयो न, उना जो अपणे मुर्दे दबाणा दे, पर तू जाई करी परमेश्वरे दे राज्य दा शुभसमाचार सुंणा।"
61 इक होरनी बन्दे बोलया, "प्रभु जी, मैं तेरे पिच्छे ओंगा; पर पेहले मिंजो जाणा दे ताकि मैं अपणे घरे दे लोकां ने बिदा लेई ओंऐ।"9:61 (1 राजा. 19:20) 62 यीशुऐ उसयो बोलया, "जड़ा कोई अपणा हथ हले पर रखीकरी पिच्छे दिखदा है, सै परमेश्वरे दे राज्य जोगी नी है।"