Mateus 21

बिना फले अंजीरे दा रुख

18 ब्यागा जालू सै नगरे जो बापस ओआ दा था, तालू यीशुऐ जो भूख लग्गी। 19 सड़का बखे अंजीर दा इक रुख दिखया, कने सै उस बाल गिया, कने उस रुखे च पतयां जो छडी करी होर कुछ नी था, उनी उसयो बोलया, "हुण तिजो पर कदी फल नी लगणे न।" कने अंजीरे दा रुख झट सुकी गिया। 20 ऐ दिखीकरी चेले बड़े हेरान होए, कने बोलणा लग्गे, "ऐ अंजीरे दा रुख झट कियां सुकी गिया?" 21 यीशुऐ उना जो जबाब दिता, "मैं तुसां ने सच्च बोलदा है; अगर तुसां भरोसा रखन, कने शक नी करन; तां सिर्फ तुसां ऐ नी करणा जड़ा इस अंजीरे दे रुखे ने किता है, अगर तुसां इस पाहड़े जो भी बोलगे कि ऐथू ला पुटुई जा, कने समुंद्रे च जाई पो, तां ऐ होई जाणा।" 22 "कने जड़े कुछ तुसां प्राथना च भरोसे ने मंगगे सै सारा कुछ तुसां जो मिलणा।"