मत्ती 9

मरियो कुड़ी कने बिमार जनानी

18 सै उना ने ऐ गल्लां बोला दा ही था, इकी यहूदी जंज घर दे सरदारे आई करी उसयो नमस्ते किते कने बोलया, "मेरी कुड़ी हुणी मरी है, पर ओथु आई करी उसा पर हथ रख, तां उना जिंदिया होई जाणा।" 19 यीशु उठी करी अपणे चेलयां समेत उदे पिच्छे चली पिया।

20 कने इक जनानी थी जिसा जो बाहरां सालां ला खून निकलने दी बिमारी थी, उना पिच्छे ला आई करी यीशुऐ दे कपड़यां जो छुई लिया। 21 क्योंकि सै अपणे मने च बोला दी थी कि, अगर मैं उस दे कपड़े जो छुई लेंगी तां मैं ठीक होई जांणा।

22 यीशुऐ फिरी करी उसा जो दिखया कने बोलया, "पुत्री हौंसला रख; तेरा भरोसा जड़ा मिजों पर था उनी भरोसे तिजो खरा कितया है।" कने सै जनानी उसी बेले ठीक होई गेई।

23 यीशु जालू उस सरदारे दे घरे पुज्जा, कने बंसरी बजाणे बाले कने भिड़ा जो रोंदे दिखया, 24 तालू बोलया, "हटी जा, कुड़ी मरियो नी है, पर सुतियो है", इसा गल्ला पर सारे हंसणा लग्गे। 25 पर जालू भीड़ कडी दिती, तां उनी अंदर जाई करी कुड़िया दा हथ पकड़या, कने सै जिन्दी होई पेई। 26 कने इसा गल्ला दी चर्चा सारे देशे च फेली गेई।