1 Ficiorlji a melji, vã scriu aesti lucri tra s-nu amãrtisits, sh-ca s-hibã cã vãrã amãrtisi, avem un avucat ningã Tatãlu, Isus Hristos atsel ndreptu. 2 Elu easti curbanlu trã curarea a amãrtiilor a noastri, shi nu mash a noastri ma sh-trã atseali di tutã lumea. 3 Di aestã shtim cã lu-avem cunuscutã nãsu, macã vigljem dimãndãrili a lui. 4 Atselu tsi dzãtsi: "Mini lu-am cunuscutã atselu," sh-nu li veaglji dimãndãrili a lui easti arãditor, shi alihea nu easti tu nãsu. 5 Iarã cai lu veaglji zborlu a lui, tu nãsu vrearea a Dumnidzãlui easti faptã perfectã. Sh-di aestã shtim cã noi him cu nãsu. 6 Atselu tsi dzãtsi cã sta cu nãsu, prindi s-imnã cum ari imnatã elu. 7 Multu-vruts, nu vã scriu un nou ordin, ma un ordin vecljiu, tsi lu aveatã di tu ahurhitã, ordinlu atsel vecljiulu easti zborlu tsi avdzãtã di tu ahurhitã. 8 Cu tut atsea ma vã scriu un ordin nou, tsi easti di alihea tu elu sh-tu voi, cã ntuneariclu ma treatsi sh-tora strãlutseashti lunjina alihioasã. 9 Atselu tsi dzãtsi cã easti tu lunjinã shi aurashti fratili a lui, easti ninga tu scutidi. 10 Atselu tsi lu va fratili a lui armãni tu lunjinã shi nu ari tsiva tu nãsu tsi lu fatsi s-cadã. 11 Ma atselu tsi aurashti fratili a lui, easti tu scutidi, imnã tu scutidi sh-nu shtii cãtrã iu s-dutsi cã scutidlu ari urghitã ocljilji a lui. 12 Vã scriu ficiori cã amãrtiili vã suntu ljirtati di la numa al Hristos. 13 Pãrintsã, vã scriu cã voi lu avets cunuscutã atselu tsi easti di tu apãrnjitã. Tiniri, vã scriu cã lu avets bãtut arãulu. 14 Vã am scriatã a voauã, ficiori cã lu avets cunuscutã Tatãlu. Vã am scriatã a voauã, pãrintsã, cã avets cunuscutã atselu di tu apãrnjitã. Vã am scriatã a voauã tiniri cã hits vãrtoshi shi zborlu al Dumnidzãu armãni la voi shi cã lu avets bãtut arãulu. 15 S-nu vrets lumea*, sh-nitsi atseali tsi suntu tu lumi. Macã vãrã u va lumea, vrearea a Tatãlui nu easti tu nãsu. 16 Cã tuti atseali tsi suntu tu lumi, orixea a truplui, orixea a ocljilor sh-pirifanjea a banãljei nu yinu di la Tatãlu ma di la lumea. 17 Sh-lumea treatsi cu orixea a ljei, ma atselu tsi fatsi vrearea a Dumnidzãlui, armãni di totãna.

18 Ficiori, easti oara dit soni. Shi cum avets avdzãtã va yinã antihristolu, shi tora multsã antihrishtsi si fãnipsirã, trã atsea noi aduchim cã easti oara dit soni. 19 Namisa di noi ishirã, ma nu eara di-a noshtri. Ma s-eara di-a noshtri, va-avea armasã cu noi, ma aestã spusi cã nu suntu di-a noshtri. 20 Ma voi avets aundzearea di la Sãmtulu* shi li shtits tuti. 21 Nu vã scriai a voauã cã nu lu cunushtets alihea, ma cã voi lu cunushtets shi nitsiun arãdeari nu yini di la alihea. 22 Cai easti arãdioslu? Nu easti atselu tsi alipideashti cã Isus easti Hristolu? Antihristolu easti atselu tsi alipideashti Tatãlu shi Hiljilu. 23 Caitsido tsi alipideashti Hiljilu, nu lu ari nitsi Tatãlu. Caitsido tsi cunoashti Hiljilu, lu ari sh-Tatãlu. 24 Atsea tsi voi avdzãtã di tu apãrnjitã s-armãnã tu voi. Macã atsea tsi avdzãtã di tu apãrnjitã armãni tu voi, atumtsea shi voi va armãnets cu Hiljilu sh-cu Tatãlu. 25 Sh-aestã easti tãxirea tsi elu nã featsi: bana eternã. 26 Vã scriai aesti zboari trã atselji tsi caftã s-vã arãd. 27 Shi, cãt trã voi, aundzearea tsi avets loatã di la nãsu, armãni la voi shi nu avets ananghi tsi vãrã s-vã nveatsã. Macã aundzearea a lui vã nveatsã di tuti shi easti alihea sh-nu easti arãdeari, armãnets cu nãsu ashã cum vã nvitsã. 28 Sh-tora, ficiori, armãnets cu elu, cã atumtsea cãndu elu va si s-fãniruseascã, noi s-putem s-avem sigurantsã shi cu vinirea a lui s-nu nã arushinãm. 29 Macã shtits cã Hristolu easti ndreptu, s-lu shtits cã caitsido tsi fatsi ndriptatea s-ari amintatã di la elu.