1 Multu-vruts, nu pistipsits pri itsi duh, ma bãgats-lã tu provã duhurili, sã shtits mãcã suntu di la Dumnidzãlu, cã multsã prufits arãdioshi au ishitã tu dunjauã. 2 Di aestã putets s-cunushtets Duhlu al Dumnidzãu: itsi duh tsi mãrtirseashti cã Isus Hristos ari vinit tu trup, easti di la Dumnidzãlu. 3 Shi itsi duh tsi nu mãrtirseashti cã Isus Hristos ari vinit tu trup, nu easti di la Dumnidzãlu. Aestã easti duhlu a Antihristolui tsi cum avets avdzãtã va yinã, shi tora easti tu lumi. 4 Voi hits di la Dumnidzãlu, ficiori, shi lji avets bãtutã atselji, cã Duhlu a Dumnidzãlui cai easti tu voi, easti ma mari di atselu tsi easti tu lume. 5 Atselji suntu di lumi, tr-atsea grescu di lucrili a lumiljei sh-lumea lji-ascultã. 6 Noi him di la Dumnidzãlu, cai cunoashti Dumnidzãlu nã asculti, cai nu easti di Dumnidzãlu, nu nã asculti, dit aestã cunushtem Duhlu a alihiljei shi duhlu a arãdeariljei.

7 Multu-vruts, s-lu vrem un-alantu, cã vrearea easti di la Dumnidzãlu shi caitsido tsi va, easti amintat di la Dumnidzãlu sh-cunoashti Dumnidzãlu. 8 Atselu tsi nu ari vreari nu lu ari cunuscutã Dumnidzãlu, cã Dumnidzãlu easti vreari. 9 Tu aestã si fãnirusi vrearea a Dumnidzãlui ti noi, cã Dumnidzãlu pitricu Hiljilu a lui atsel unlu-amintat tu lumi, tsi noi s-bãnãm pri nãsu. 10 Tu aestã easti vrearea: nu cã noi lu avem vrutã Dumnidzãlu, ma elu nã ari vrutã noi, shi pitricu Hiljilu a lui tsi s-li ljeartã amãrtiili a noastri. 11 Multu-vruts, macã Dumnidzãlu nã vru ashãtsi, shi noi prindi s-vrem un-alantu. 12 Nitsiun nu l-vidzu vãrãoarã Dumnidzãlu, macã nã vrem unu cu alantu, Dumnidzãlu armãni tu noi sh-vrearea a lui easti perfectã la noi. 13 Di aestã noi cunushtem cã armãnem tu nãsu sh-elu tu noi, cã elu nã ari datã di Duhlu a lui. 14 Shi noi vidzum shi mãrtirsim cã Tatãlu lu pitricu Hiljilu tsi s-hibã Ascãpãtor a lumiljei. 15 Atselu tsi mãrtirseashti cã Isusul easti Hiljilu a Dumnidzãlui, Dumnidzãlu sta tu nãsu sh-elu tu Dumnidzãlu. 16 Sh-noi cunuscum sh-pistipsim tu vrearea tsi Dumnidzãlu ari trã noi. Dumnidzãlu easti vreari, shi atselu tsi armãni tu vreari, armãni tu Dumnidzãlu sh-Dumnidzãlu tu nãsu. 17 Tu aestã vrearea easti perfectã tu noi, tsi s-avem curaiu trã dzua a giudicatãljei: cã cum easti elu, ashã him sh-noi tu aestã lume. 18 Atselu tsi vrea, nu ari fricã, shi vrearea perfectã aĝuneashti frica, cã frica ari cu nãsã cãtãdzicãsirea, shi atselu tsi ari fricã nu easti perfectã tu vreari. 19 Noi lu vrem atselu, cã elu nã vru protlu. 20 Ma s-dzãcã vãrã: "Mini lu voi Dumnidzãlu" shi aurashti fratili a lui, easti arãditor. Elu tsi nu va fratili a lui tsi lu veadi, cum poati s-aibã vreari trã Dumnidzãlu tsi nu lu-veadi? 21 Sh-aestã easti ordinlu tsi avem loatã di la elu: atselu tsi va Dumnidzãlu, s-aibã vreari sh-trã fratili a lui.