1 ସଃତ୍କଃରି ସୁଣାଜଃଉଁଲି ଜେ, ତୁମାର୍ ବିତ୍ରେ ଦାରିକାମ୍ ଆଚେ, ଆର୍ ଇ ରଃକମ୍ ଦାରିକାମ୍, ଜୁୟ୍ରିକି ଅଜିଉଦି ଲକ୍ମଃନାର୍ ତଃୟ୍ ହେଁ ନାୟ୍, ଇ ରଃକମ୍ ଗଟ୍ଲକ୍ କୁଡ୍ ଆୟ୍ସିକ୍ ସଃଙ୍ଗାୟ୍ ଆଚେ । 2 ଆରେକ୍ ଜେ ଇ କାମ୍ କଃରିଆଚେ, ସେ ଜଃନ୍କଃରି ତୁମିମଃନ୍କାର୍ ତଃୟ୍ ହୁଣି ବିନେ କଃରା ଅୟ୍ଦ୍, ଇତାର୍ ଗିନେ କାନ୍ଦି ନଃକେରି ଗଃର୍ବ୍ କଃରୁଲାସ୍ । 3 ମଃତର୍ ମୁୟ୍ଁ ଗଃଗାଳେ ସେତି ନଃରିଲେକ୍ ହେଁ, ଆତ୍ମାୟ୍ ସେତି ରଃୟ୍, ଜେ ଅଃନ୍କା କାମ୍ କଃରିଆଚି, ମୁୟ୍ଁ ସେତି ରିଲା ହର୍ କଃଉଁଲେ ମାପୁର୍ ଜିସୁର୍ ନାଉଁଏ ତାର୍ ବିଚାର୍ ସଃରିଆଚେ । 4 ବଃଲେକ୍, ତୁମିମଃନ୍କେ ଆର୍ ମର୍ ଆତ୍ମା ଅଃମିମଃନାର୍ ମାପୁର୍ ଜିସୁ ନାଉଁଆର୍ ସଃକ୍ତିୟେ ରୁଣ୍ଡିକଃରି ଇରି ଟିକ୍ କଃରିଆଚୁ ଜେ, 5 ଅଃନ୍କା ଲକେ ଗଃଗାଳାର୍ ନଃସ୍ଟ୍ ଅଃଉଁକେ ସୟ୍ତାନାର୍ ଆତେ ସଃର୍ହିଦେତା ଲଳା, ଜଃନ୍କଃରି ମାପୁର୍ ଜିସୁର୍ ଦିନେ ତାର୍ ଆତ୍ମା ବଚୁହାରେ ।
6 ତୁମିମଃନ୍କେ ଅଃନ୍କଃରି ଗଃର୍ବ୍ କଃର୍ତାର୍ ନିକ ନାୟ୍ । ତୁମିମଃନ୍ କାୟି ନଃଜାଣାସ୍ କି, "ଇଡିକଃଣ୍ଡ୍ କମିର୍ ସଃବୁ ମୟ୍ଦା ଇଟ୍ଲାକେ କମିର୍ କଃରି ଦଃୟ୍ଦ୍ ।" 7 ତୁମିମଃନ୍ ତ ନିର୍ମୁଳ୍ ଲକ୍, ଇତାକ୍ ଜଃନ୍କଃରି ନଃଉଆଁ ମଇଦା ଅଃଉଁ ହାରାସ୍, ଇତାର୍ ଗିନେ ହର୍ନା ମଇଦା ବାର୍କଃରି ହଃକାଉଆ; ବଃଲେକ୍ ଅଃମିମଃନାର୍ ମୁକ୍ଳାଉତା ହଃର୍ବାର୍ ମେଣ୍ଡାହିଲା, ବଃଲେକ୍ କ୍ରିସ୍ଟ ହେଁ ହୁଜାଅୟ୍ ଆଚେ । 8 ତଃବେ ଆସା, ଅଃମିମଃନ୍ ଦୁସ୍ଟ୍ ଆର୍ କଃରାପ୍ କାମାର୍ ହର୍ କମିର୍ ତଃୟ୍ ହଃର୍ବ୍ ହାଳି ନଃକେରି ନିର୍ମଃୟାଁ ସଃଙ୍ଗ୍ ସଃତାର୍ କମିର୍ ନୟ୍ଲାର୍ ହଃର୍ବ୍ ମାନୁଆଁ ।
9 ଦାରି କଃରୁମଃନ୍ ସଃଙ୍ଗ୍, ମିଳାମିସା ନଃକେରୁକେ ମୁୟ୍ଁ ତୁମିମଃନ୍କେ ହୁର୍ବାର୍ ଚିଟିତଃୟ୍ ଲେକି ରିଲେ । 10 ଇ ଜଃଗତାର୍ ଦାରିକଃରୁ କି ଦଃନ୍ଲଃବି, ଲକାର୍ ଦଃନ୍ବିତ୍ ଚର୍ତା ଲକ୍ କି ହୁଜେରି ମଃନ୍କାର୍ ସଃଙ୍ଗ୍ ଜେ ମୁଳ୍କେ ସଃଙ୍ଗ୍ ଦଃରାନାୟ୍ଁ । ତଃନ୍ଅଲେ ତୁମିମଃନ୍କେ ଜଃଗତେ ହୁଣି ବାରାୟ୍ ଜଃଉଁକେ ହଃଳେଦ୍ । 11 ମଃତର୍ ମର୍ ଲେକ୍ତାର୍ ବାବ୍ ଇରି ରିଲି, ଜଦି କୁୟ୍ଲକ୍ ବାୟ୍ ବଃଲି ଡାକେହୁଟି ଦାରିଆ, କି ଦଃନ୍ଲଃବି, କି ହୁଜେରି, କି ଲିନ୍ଦାକଃରୁ, କି ମାତୁଆଳି, କି ହଃରାର୍ ଦଃନ୍ ଚର୍ ଅୟ୍ଦ୍, ତଃବେ ସେରଃକମ୍ ଲକାର୍ ସଃଙ୍ଗ୍ ମିସା ନାୟ୍, ଆରେକ୍ ତାର୍ସଃଙ୍ଗ୍ କାହା ହେଁ ନାୟ୍ ।
12 କାୟିତାକ୍ବଃଲେକ୍ ହଃଦାର୍ ଲକ୍ମଃନାର୍ ବିଚାର୍ କଃରୁକେ ମୁୟ୍ଁ କେଏ ? ମଃତର୍ ବିସ୍ୱାସି ଦଃଳ୍ ବିତ୍ରେ ରିଲା ଲକ୍ମଃନ୍କେ ବିଚାର୍ କଃର୍ତା ଅଃଦିକାର୍ ଅଃମାର୍ ନାୟ୍ କି ? 13 ମଃତର୍ ଜୁୟ୍ମଃନ୍ ହଃଦାୟି ଆଚ୍ତି, ସେମଃନ୍କାର ବିଚାର୍ ଇସ୍ୱର୍ କଃରେଦ୍ । ଦଃର୍ମ୍ ସାସ୍ତରେ ଲେକା ଆଚେ, "ସେ ଦୁସ୍ଟ୍ ଲକ୍ମଃନ୍କେ ତୁମାର୍ ବିତ୍ରେ ହୁଣି ବାର୍କଃରି ଦିଆସ୍ ।"
/images/a/Tcg2NiV7ce24OT6kCIQGR)
/images/a/qHG3xNP8jqR-HqIiucz0L)