1 ମୁୟ୍‌ଁ ଇସ୍ୱରାର୍‌ ମୁଏଁ, ଆର୍‌ ଜୁୟି ଜିସୁକ୍ରିସ୍ଟର୍‌ ମୁଏଁ ଜେ କି ମଃଲା ଲକ୍‌ ଆର୍‌ ଜିବନ୍‌ ରିଲା ଲକ୍‌ମଃନ୍‌କେ ହେଁ ବିଚାର୍‌ କଃରୁକେ ଜଃଉଁଲା, ତାର୍‌ ମୁଏଁ, ଆର୍‌ ତାର୍‌ ଆରେକ୍‌ ଆସ୍ତାର୍‌ ଆର୍‌ ରାଇଜାର୍‌ ସଃୟ୍‌ତ୍‌ କଃରି ତକ୍‌ ଆଦେସ୍‌ ଦେଉଁଲେ । 2 ମାପୁରାର୍‌ କଃତା ପର୍ଚାର୍‌ କଃର୍‌, ବେଳା କି ଅବେଳାୟ୍‌ହେଁ ସେତିର୍‌ ଦିଆନ୍‌ ଦେସ୍‌, ହୁରା ସଃମ୍ବାଳିକଃରି ସିକ୍ୟାଦଃୟ୍‌ ବୁଜାୟ୍‌ ଦଃମ୍‌କି ଦେସ୍‌ ଆର୍‌ କଃଡେ କଃଡେବଃଳ୍‌ ବଃର୍‌ସା ଦେସ୍‌ । 3 ବଃଲେକ୍‌ ବେଳା ଆସେଦ୍‌, ଜଃଡେବଃଳ୍‌ ସେମଃନ୍ ନିକ କଃତାର୍‌ ସିକ୍ୟା ନଃସୁଣ୍‌ତି, ମଃତର୍‌ ସୁଣୁକ୍‌ ମଦୁର୍‌ କଃତାୟ୍‌ ସଃର୍ଦାଅୟ୍‌ ଇଚା ହଃର୍କାରେ ନିଜାର୍ ହାଁୟ୍‌ ଗାଦାଗଟ୍‌ ଗୁରୁମଃନ୍‌କେ କୁଦ୍‌ତି । 4 ଆର୍‌ ସଃତ୍‌ କଃତାୟ୍‌ କାନ୍‌ ନଃଦେୟ୍‌ ମଃନେହାଜି କୟ୍‌ଲା କଃତାୟ୍‌ ମଃନ୍ଦେତି । 5 ମଃତର୍‌ ତୁୟ୍‌ ସଃବୁ କଃତାୟ୍‌ ଜଃଗ୍ରାତ୍‌ ଅଃଉ, ଦୁକ୍‌ ସଃମ୍ବାଳ୍‌, ନିକ କବୁର୍ ପର୍ଚାର୍‌ କଃର୍‌, କାମ୍‌ କଃର୍‌, ତର୍‌ ସେବାର୍‌ କାମ୍‌ ହୁରୁଣ୍‌ କଃର୍‌ ।

6 ମର୍‌ ଜିବନ୍‌କେ ହୁଜା ଦଃୟି ଇ ଜଃଗତ୍‌କେ ଚାଡି ଜାତା ବେଳା ଆସି ଆଚେ । 7 ମୁୟ୍‌ଁ ନିକ ଜୁଜେ ହଃରାଣ୍‌ ଦଃୟ୍‌କଃରି ଜୁଜ୍‌ କଃରି ଆଚି, ସଃରାସଃରି ହଃତେକ୍‌ ଦଃବ୍‌ଳୁଲେ ଆଚି, ମୁୟ୍‌ଁ ବିସ୍ୱାସ୍‌କେ ଦଃରି ଆଚି । 8 ଆଜି ହଃତେକ୍‌ ମର୍‌ ଗିନେ ଦଃର୍ମାର୍‌ ମୁକୁଟ୍‌ ସଃଙ୍ଗାଅୟ୍‌ ଆଚେ, ସେରି ସେ ବିଚାର୍‌ ବିନ୍‌ ନ୍ୟାୟ୍‌ର୍‌ ବିଚାର୍‌ କଃର୍ତା ମାପୁର୍ ମକେ ଦଃୟ୍‌ଦ୍‌, ମଃତର୍‌ ମକେ ହଃକା ନୟ୍‌ ଜୁୟ୍‌ମଃନ୍‌ ତାର୍‌ ଆୟ୍‌ଲେକ୍‌ ଲାଡାର୍‌ ଅଃଉତି, ସେ ସଃବ୍‌କେ ହେଁ ଦଃୟ୍‌ଦ୍‌ ।

9 ବେଗି ମର୍‌ ତଃୟ୍‌ ଆସୁକ୍‌ ଜଃତୁନ୍‌ ଅଃଉ 10 ✝ବଃଲେକ୍‌ ଦିମା ଇ ଅଃବାର୍‌ ଜଃଗତାର୍‌ ଲାଡ୍‌କଃରି ମକେ ଚାଡ୍‌ଲା ଆଚେ ଆର୍‌ ତେସଲନିକିକେ ଜାୟ୍‌ଆଚେ, କ୍ରେସ୍‌କେନେସ୍‌ ଗାଲାତିଆକେ, ଆର୍‌ ତିତସ୍‌ ଦଲୁତଆକୁ ଜାୟ୍‌ ଆଚ୍‌ତି । 11 ✝ଏକ୍ଲା ଲୁକ ହଃକା ମର୍‌ ସଃଙ୍ଗ୍ ଆଚେ, ମାର୍କକେ ମିସ୍‌ଣେ ତର୍‌ ସଃଙ୍ଗ୍ ଆଣ୍‌; ବଃଲେକ୍‌ ସେ ମର୍‌ ସେବା କାମେ ଉହ୍‌କାର୍ କଃରେଦ୍‌ । 12 ✝ମୁୟ୍‌ଁ ତୁକିକକେ ଏପିସିଏ ହଃଟାୟ୍‌ ଆଚି ।

13 ✝ତ୍ରୟାଇ କାର୍ପର୍‌ ଲଃଗେ ମୁୟ୍‌ଁ ଜୁୟି ଆଙ୍ଗି ଚାଡି ଆସିଆଚି, ତୁୟ୍‌ ଆସ୍ତା ବଃଳ୍‌ ସେରି ଆର୍‌ ପୁସ୍ତକ୍‌ମଃନ୍‌, ମୁଳ୍‌କଃରି ଚାମେ ତିଆର୍‌ କଃଲା ପୁସ୍ତକ୍‌ମଃନ୍‌ ଆଣ୍‌ ।

14 ✝କାସାରି ଆଲେକ୍‌ଜେଣ୍ଡାର୍‌ ମର୍‌ ବୁତେକ୍‌ ନଃସ୍ଟ୍‌ କଃଲା ଆଚେ; ମାପୁର୍ ତାର୍‌ କାମ୍‌ ହଃର୍କାରେ ତାକେ ଡଃଣ୍ଡ୍‌ ଦଃୟ୍‌ଦ୍‌ । 15 ତୁୟ୍‌ ହେଁ ତାର୍‌ ଚଃମେ ଜଃଗ୍ରାତ୍‌ ରେଏ, ବଃଲେକ୍‌ ସେ ଅଃମିମଃନାର୍‌ କଃତାର୍‌ ଅଃନାୟ୍‌ ବିରଦ୍‌ କଃରି ରିଲା ।

16 ମର୍‌ ହଃର୍ତୁ ନିଜାର୍ ସାକି ଦେତା ବଃଳ୍‌ କେହେଁ ଆଡି ନୟ୍‌ଲାୟ୍‌, ମଃତର୍‌ ସଃବୁଲକ୍‌ ଚାଡିଦିଲାୟ୍‌, ଇରି ସେମଃନ୍‌କାର ବିରୁଦେ ଗଣିତା ନଃଅ । 17 ମଃତର୍‌ ମାପୁର୍ ମର୍‌ବାଟ୍ୟା ଅୟି ମକେ ବଃଳ୍‌ ଦିଲା ଆର୍‌ ମୁୟ୍‌ଁ ସିଅଁବାଗାର୍‌ ମୁଏଁ ହୁଣି ରଃକ୍ୟା ହାୟ୍‌ଲେ, ଜଃନ୍‌କଃରି ମର୍‌ ତଃୟ୍‌ହୁଣି ନିକ କବୁର୍ ହୁରୁଣ୍‌ କଃରି ପର୍ଚାର୍‌ ଅଃଉଁ ହାରେ ଆର୍‌ ଅଜିଉଦି ଲକ୍‌ମଃନ୍‌ ସେରି ସୁଣୁ ହାର୍ତି । 18 ମାପୁର୍ ମକ୍‌ ସଃବୁ କଃରାପ୍‌ କାମେ ହୁଣି ମୁକ୍ଳାୟ୍‌ଦ୍‌ ଆର୍‌ ମକ୍‌ ମୁକ୍‌ଳାୟ୍‌ କଃରି ନିଜାର୍ ସଃର୍ଗ୍‌ ରାଇଜେ ନଃୟ୍‌ଦ୍‌, ଜୁଗେଜୁଗେ ତାର୍‌ ଜଃଜ୍‌ମାନ୍ ଅଃଉଅ । ଆମେନ୍‌ । କାଳା ଡାବି ଲଃଗେ ଚାମ୍‌ଳା ବଇମଃନ୍‌ ଆଚେ

19 ✝ପ୍ରିସ୍କିଲା, ଆର୍‌ ଆକିଲା ଆର୍‌ ଅନିସିପରାର୍‌ ଗଃର୍‌ କୁଟୁମ୍‌କେ ମର୍‌ ଜୁଆର୍‌ ଜାଣାଉଁ । 20 ✝ଏରାସ୍ଟ କରନ୍ତିୟେ ଆଚେ, ମଃତର୍‌ ତ୍ରପିମ୍‌ ମଃଳୁହଃଡି ରିଲାକେ ମୁୟ୍‌ଁ ତାକେ ମିଲିତିୟେ ଚାଡି ଆୟ୍‌ଲେ ଆଚି ।

21 ତୁୟ୍‌ ସିତ୍‌ ଆସ୍ତା ହୁର୍ବେ ଆସୁକ୍‌ ଜଃତୁନ୍‌ କଃର୍‌ । ଇଉବୁଲ୍‌, ପୁଦେନସ୍‌, ଲିନ୍, କ୍ଲାଉଦିଆ ଆର୍‌ ବାୟ୍‌ବେଣିମଃନ୍‌ ତକେ ଜୁଆର୍‌ ଜାଣାଉଁଲାୟ୍‌ ।

22 ମାପୁର୍ ତର୍‌ ଆତ୍ମା ସଃଙ୍ଗ୍ ରେଉଅ । ତୁମାର୍‌ ଉହ୍ରେ ଦଃୟା ଅଃଉଅ ।