Yohans Bek'o 19

Nas' farshi abaats bedek’ts asho

11 ✝ 19:11 Hzk'. 1:1; Dub. 96:13; Isa. 11:4 Hniyere okoon daro b́ k’eshere t bek’i, mann nas' farsho t bek’i, farshmanatsnowere bedek’ts amanetsonat arika etetsoniye, bíwere kááwon angshitwe, kááwono kaaritwe, 12 ✝19:12 Dan. 10:6 Bí ááwwots tawi laluwe boari, b́ tookatsnowere ay zewdiyots fa’ane, bíyere okoon konúwor b́ danaw bíyats guut’ets shúútso fa’e b́teshi, 13 bíwere s’atson gupets taho tahdek’ke b́ teshi, b́ shúútsonwere «Ik' aap’a» eteeke. 14 Nas' farshwotsats beedek’tswots, nas’onat s’ayin taho tahdek’ts daratsi jirwots b́jafrats botuwi, 15 ✝19:15 Dub. 2:9; Isa. 63:3; Iyo. 3:13; Bek'. 14:20 ash naarwotsi bín b́ togetwo shiki goradi shasho b́ nonotsne b́ keshiri, bírri gumbonowere boon keewitwe, bíwere jam falts Ik’o fay shatiitso kitsit weyini biro fis’efook’o net’eetwe, 16 b́ tahonat b́ shokatse «Nugúswotsatsi nugúso doonzwots doonzo» etiru shúútso guut’ere.

17 Maniyere il aawats need’dek’ts melaki iko t bek’i, bíwere daaratse bidiru kafuwotssh hank’o ett een k’aaron b́kuuhi, «Een wotts Ik' móónat ushok woore! ko’ewere! 18 nugúsuwots meetso, kes' jishirwots meetso, kúp kes’etswots meetso, farshetswotsnat farshwotsn meetso, guuts woterawwotsnat guutswots meetso, k’ac’nwotsnat een eenwots meetso, wáár moore.»

19 Mank’o s’ootsonat datsatsi nugúswotsn, boosh kes’fwotswere nas' farshatse beedek’tsonat bísh kes’f jirwotsnton kaarosh ikok boko’ere t bek’i, 20 ✝19:20 Bek'. 13:1-8 ernmó s’ootso b́ deetseyi, bíntonwere b́ shinatse ayi adits keewwotsi finiru kootets nebiyo b́ deetseyi, bíwere s’ootso milikito detstswotsnat s’ootsman artsosh sagadat teshtswotsi adits keewo finat b́ sheelifwotsi, gitanots kashon bo befere dini k’arots bo juweyi. 21 Oortswotsu nas' farshatse beyirwo nonotse keshiru shiki goradon boúd’eyi, kaf jamwots bo meetso maat bowori.