Lucas 23

Iyesusi P’ilat’osok dek’t ametsok’o

1 Maniye hakon manoke kakuwedek’t beyiru ash ashuwots dek' amt P’ilat’os shinats t’intsbok’ri, 2 Hank’o ettnwere bín s’aamiyo dek' botuwi, «Ashaan no ashuwotsi b́shelifere daatsrone, Rom nugúsoshowere ereero dasherawok’o bazife, ando ‹Taahe nuguso Krstos taane› ettniye b́ keewiri.»

3 P’ilat’oswere «Ayhudiwots naasho neeneya?» ett Iyesusi bíaati.

Iyesuswere «Nee niettsok’oyiye» bí eti.

4 Manoor P’ilat’os kahani naashuwotsnat ash ashosh «Ashaanatse eegor t’afiyo daatsratse» bí et.

5 Boomó «Ashaan Geliln b́detstso hanok b́borfetsosh, Yihud dats jamatse daniyfetst ash asho boatsatseyo bofayetuwok’o b́ woshiri» etfetst kup’shdek’t bos’aamiyi.

Iyesus Herodis shinats b́t’intsok’o

6 P’ilat’os Gelili eteets shútsman b́ shishtsok’on, «Ashaan Gelil dats asheya?» ett bíaat. 7 Iyesus b́ waa Herodis alts datsatse b́ waatsok’o b́ dantsok’on Herodisok damibk’ri, Herodisuwere manoor Iyerusalemitsa b́tesh. 8 Herodisuwere Iyesusi b́bek’tsok’on ayidek’t gene’úb́guts, Iyesus jango b́shishtsotse bín bek’ono ayoto tewuntni b́teshi, mank’o Iyesus adits finuwotsno b́ finefere bek’oshor b́geefotsna. 9 Mansh Herodis Iyesusi ay keewo bíaat, Iyesusmó bísh eegor aaniratse. 10 Kahni naashuwotsnat Muse nemo danifuwots manoke need’dek’t kup’idek’t bín bos’aamiri. 11 Herodis b́ jirwotsnton bíats trgic’o b́ kaash, tahi sheengonowere bíats takdek’t P’ilat’osok aani dek’t damib́k’r. 12 Herodisnat P’ilat’osn maniye shin balngar teshtswots manots aawots jagebowutsi.

Iyesusats k’iro angshetsok’o

13 Maniye hakon P’ilat’os k’eesi naashuwotsi, ash jishfuwotsnat ashuwotsi dabdek’t iknon b́ s’eegi, 14 Hank’owere boosh bí et, « ‹Ashuwotsi bo fayetuwok’o b́ tuuziri› etaat ashaan t maants dek’at it weyi, taawere hamb it shinatse aatat tiere it etts jam weeron ashaanatse ik t’afiyonor daatsratse. 15 Mank’owere Herodiswor bíatse b́ t’afitso ikonor b́ t’ut’tsotse nomand aani dek’t doyik’rere, eshe ashaanatse k’irosh bín betsit keewo ikonor bíatse daatsratse. 16 Manshe garafarniye bín faksh t k’ritiye.» 17 [Dúre dúron Fazigi bali aawots P’ilat’os tipitsi ashuwotsitse iko ashuwotssh b́ fakshfotsna.]

18 Mansh ash jamo «Ashaan no ááwatse ok t’afiwe! Berbannmo biishde fakshk’rowe noosha!» et fetst ik k’aaron bokuhi. 19 Berban kitutse dimbro tuuzt ashono ud’t manatse tuutson tip moots tipek asha b́tesh.

20 P’ilat’os Iyesusi bíshde faksho geyat́ aani ash ashuwotssh b́keewu. 21 Ashuwotsmo «Bín jirk’rowe! jirk’rowe bína!» ett bokuhi.

22 P’ilat’osuwere keezlo boosh hank’o bíet, «Ashaan b́ t’afitso b́jamon eebi? Taa k’irosh bín betsit keewo eegor bí atse datsratsere, manshe garafarni faksh tk’riti.»

23 Boomó bok’aaro eenshdek’t «Jiir k’rowe bína!» ett bokuhi, ashuwotsnat k’eesi naashuwots k’aaro ayidek’t enbgutsi. 24 Manatse tuutson bo aattso boosh k’aletuwok’o P’ilat’os angsh b́k’r. 25 Galotse asho beezo bazt ando asho úd’t bíere tipt teshetso Berbani bo aattsok’on fakshb́k’ri, Iyesusnmo boshuntsok’on boosh beshidek’t imb́k’r.

Iyesusi jitetsok’o

26 Mann Iyesusi dek’t boami, dek’t boamfere K’erena eteets datsi ash wottso Simoni gat’ariyon kito maants b́kindfere dats bodek’i, bín detsdek’t mask’aliyo Iyesusko kuridek’t Iyesus shuutso shoyde b́shaituwok’o bo k’ali.

27 Ay ashonwere Iyesus shutsats shoydektni boamir bítesh, bodagotsno bo gero jot’fetst eepiru maats maatsuwots fa’ano. 28 Iyesusmó bomaand wongr ett hank’o boosh bíet, «It Iyerusalem dats máátsuwotso! it tokonat it na’osh efere bako taash eepk’ayere! 29 ‹Mahan wotts máátsuwots, shurawu maac’wotsnat s’aatsrawu s’atsuwots awuk’o derekno!› eteet aawwots weetúnee. 30 ✝23:30 Hos. 10:8; Bek'. 6:16 Manoor ash ashuwots gúrwotssh, ‹No abaats grshore!› guri teuwotsshowere ‹Noon atsuwore!› eto deebotuwiti. 31 Miti motsats hank’o keewu jaman k’aletka wotiyal eshe miti shuk’onmo awuk’owek’uwa k’aleti?» 32 Mank’owere gond finets git ashuwotsi Iyesusnton úd’osh dek’t boami. 33 Took k’ola wee K’araniyo eteef beyokok bobodtsokon manoke Iyesusi jitbok’ri, mank’o gond finets ash gitwotsi iko Iyesus giromaants iko b́ k’anomaants jitbok’ri. 34 ✝23:34 Dub. 22:18 Maniyehakon Iyesus, «T niho! bo k’aliruwo bodanawotse boosh orowa eree!» bíet. Kes' kes’fuwotsu Iyesus tahats it’o oorsht kaybodek’i.

35 ✝ 23:35 Dub. 22:7 Ash ashonwere need’dek’tni bos’iliri botesh, Ayhudi naashuwots uwere «K’oshuwotsnoó worire and eshe bí Ik’i futtso Ik’o b́tokosh marat’bdek’tsoni wotiyal aab b́ tooko woriwe!» etfetst́ bíts bokaashi. 36 ✝23:36 Dub. 69:21 Kes' kes’fuwotswere mank’o bíatsa bokashfera botesh, b́maand t’int bíro ayidek’t shashtso boimi. 37 Bowor mank’o «Nee arikon ayhudiwotsko naasho nana wotiyal aab n tooko woride’e!» boetiri.

38 «Ayhudiwotsko naasho haniye» ett guut’etso Iyesus jitetsi k’oyats gedbok’ri.

Iyesusnton jitets gond finets git ashuwots

39 Iyesusnton jitets gond finetsuwotsitse iko, Iyesussh, «Nee mesihiyo nenoshna? Aab eshe n tokonat noon woriwe!» ett bín b́ c’ashfera b́tesh.

40 Boyitse ikonmó bín hank’o ettni b́fay, «Neewor bíki naari angshotse bedek’at Ik’o sharatsiya? 41 Noo nofints morratse tuutso noosh wotit fayo daatsrone, ashaanmó eegonor t’afiyo deshatse.» 42 Manats dabt Iyesussh, «Doonzono! n mengstots n woor taan batk’aye.» bíet.

43 Iyesuswere «Ariko neesh keewiruwe, hambets taanton genetotse daatsetune» bíet.

Iyesus k’iro

44 Man b́wotuwe aaw shrt sa’atok’ona b́tesh, manortson tuut jed’iy sa’ato b́borfetsosh datsjamatse t’alu wotb́gutsi. 45 ✝23:45 Kesh. 26:31-33 Aawo t’aluwu b́wutsi, Ik’i meyitsi magarajo taalotse dek’t tuut gaad’at gitoko kayb́gutsi. 46 ✝23:46 Dub. 31:5 Iyesuswere b́k’aaro eenshdek’t, «Nihono! hambiye! tkashu nkishats beshidek’at adaro imiruwe!» bí et, man bíettsok’on b́ kasho bíatsotse k’azb́kesh.

47 Manoke teshts bali naash wottso, wotts man b́bek’tsok’on «Arikon ashaan kááwe b́teshi!» ett Ik’o b́ mangiy.

48 Wotit keewo s’ilosh manoke kakuwedek’t teshts ash jamo wotts keewuman bobek’tsok’on bo gero k’is’fere bo galomand k’azboaani. 49 ✝23:49 Luk'. 8:2-3 Iyesusi karnon dants ash jamwotsnat Galil datsatse tuut b́shutsatse sha’efere waats máátswots wokoon need’dek’t keewan bo s’iliri.

Iyesus b́duketsok’o

50 Ayhudiwots kitt wotts Armatyasitse befo Yosefi eteef asho fa’e b́tesh, bíwere kaawonat ash sheenga b́tesh, ayhudiwotsitse moosh moshifuwotsitsi ikoni. 51 Wotowa ereo ayhudiwots shiyewonat t malots kindratse b́tesh, bí Ik’i mengsto kotiru asho b́ tesh. 52 Ashman P’ilat’osok t’int Iyesus duuno bísh b́ imish bíaat. 53 Dunonowere orshdek’t hariya eteef c’ic’i dek’t wozets tahon k’odbok’ri, ash k’osho konuwor bíts b́ dukerawu s’alatse k’ewudek’t k’aniyets doowots duukb́k’r, 54 Man b́k’aluwere kokowots kooc' Sanbatosh k’anoke beyefera b́tesh.

55 Geliln tuut Iyesus shuutso waats máátswots Yosefnton amt b́ doowo bo s’iili, duunono awuk’o k’aldek' duuktsok’oi bo s’iil. 56 ✝23:56 Kesh. 20:10; Iwi. 5:14 Bogalomandowere aanat duunosh wotit shak' shawu wotts k’memiyonat shituwo k’ani bok’r, bo nemok’on sanbati aawots kashdek’t bojin.