Lucas 5

18 Ash dúr iko es’oń kur dek’ts ash ashuwots Iyesusmaants dek’t bowaa, Iyesus bítse b́ beyiru moots kindsh de’er b́shinats beezo geyatni bo tesh, 19 Ernmó asho bí’aytsatse tuutson durman moots kindsho bomaaw, mansh máá tookats dek' bokesh, máá tokono wogdek’t máá maac’ots bí’es’onton Iyesus shinats orshdek’t gedebok’ri. 20 Iyesuswere bo aman amano b́bek’tsok’on durosh, «Ashono neena! n morro niatse sholbazere,» bí et.

21 Nem danifuwotsnat ferisawino etefwotsn «Kone bíwo Ik’o c’ashirwani? Ash morro oorowe etosh falitwo Ik’oniye okoon k’osho kone fa’oni?» ett bo gitsotse bo gawfera botesh.

22 Iyesuswere bo bogawirman dank’rat boosh hank’o bíet, «It nibotse eegoshe hank’o it gawiri? 23 B́woteferemó ‹N morro neesh oorowe› etonat, ‹Tuur amee!› etotse aaw ketefa? 24 Ernmó ash na’o datsatse morro oorowe etosh alo b́detstsok’o dano itsh geyife» ett ash durmansh, «Ashono neena tuuwe, ni es’o kur de’er n galomand amee!» bí eti.

25 Dúronwere manoor ash ashuwots shinatse tuut, bíats k’eedek’t b́teshts es’o kurdek’t, Ik’o údefere b́ galomand bí ami.