Lucas 8

27 Iyesus jelbutse dats b́ oot’tsok’on fo’erawo bíatsots s’eents ash iko kitotse kesht bín gonkb́dek’i, ashman araatson b́ beyihakon aydúro teshka, b́befonwere doow doowi beyoka bako mootsali, 28 Iyesusi b́ bek’tsok’on b́ kuhi, Iyesus shinatsowere dats diht b́k’aaro eenshdek’t, «Nee jamoniyere damb bogts Ik’o naay Iyesuso, ti atse eege ndetsi? oona neesha taan gondo bek’shk’aye,» bí et. 29 Man bí’etwere Iyesus kim shayirmansh asho atsotse b́keshetwok’o bí azaztsotsna. Maniye shinon kim shayironwere ashmanatse ayota b́ tuufo, muk’onat habliyon tifderni kotefo, ernmó habliyono b́k’ut’fo, muk’ono b́titsfoni. Fo’erawonwere bín joohde’er woruwotsa b́ damfo.

30 Iyesuswere «N shúútso kone?» ett bí aati, bíwere ay fo’erawwots bí’ats oot’dek’t́ b́teshtsotse «T shúútso Legiyoniye*8:30 Legiwoni: Legiyoni eto kes' keshiru ik jirwotsi. » ett bíaaniy. 31 Manoor fo’erawonwere «Oona neesha ayidek’t dashan gop’ts gop’ots noon damik’aye» eton bín bok’oni.

32 Gohi gúúratse jiniru guritsi s’eeno fa’e b́tesh, fo’erawotswere, «Guritswotsits nokindish noosh eekowe» ett Iyesusi bok’oni, bí were boosh «Kindwere» bí eti. 33 Mann fo’erawwots ashmanitse kesht Guritswotsts bokindí, Guritswots gohatse t’olefere bo’ot', aats k’arots kindt limbowtsi.

34 Gurits jinirwotswere wottsman bobek’tsok’on shatoon k’azbowos’i kit kitonat gál gáltse keewman shishiy. 35 Ash ashuwotswere wotts keewman s’ilosh bo maa mootse kesht Iyesus maants boweyi, fo’erawwots bíatsotse keshts ashonwere bíatso dandek’t taho tahdek’t Iyesus tufishirotse b́ befere bek’t shatbowts.