Mateus 23

Iyesus Muse nemo danifwotsnat ferisawiyotsatse it atso korde’ere bíettsok’o

1 Maniyakon Iyesus ash ashonat b́ danifwotssh hank’o ett b́ keewi, 2 «Nemo danifwotsnat ferisawino eteefwots Muse jorats bedek’rne. 3 Mansh eshe bo itsh bo keewts jamo k’alwere, korde’ere, bo bofinirwonmó fink’ayere, bo bokeewirwo finats jitsraknee, 4 Mangonat kic’its kuro tipdek’t ash mangrats bokurifoni, botookishomó bojaabon t’awiyosh dab́ geeratsne. 5 ✝23:5 Mat. 6:1; Taaw. 15:38; Iwi. 6:8 Bofin jamo asho boon b́bek’etwok’owa etniye bofiiniri. Ik’o bok’onor kitabiya*23:5 Kitabiya: Eto nemo bíts guut’etso bobaronat boilats botipfoni. genzit bo gawintsiri, Ik' nem kotirwok’o botahefonowere b́ guuratsi s’aaro shipdek’tni bo geenzifoni, 6 Jiwoke mang beyoko, ayhudiyots Ik' bok’onf mooke shints beyokoniye detso boshunfoni. 7 Jebatsnowere ash jamo boosh gup' gup’aar jamo boon aatr ‹Danifono!› err bo s’eegetuwok’owe bogefoni, 8 Itmó itko danifo ik s’uzo b́wottsotsnat it jametswere esshwwotsi it wottsotse ‹Danifono› eteyar s’eegek’ayere. 9 Ando aaniy it itdetsts niho darotse ik s’uzo b́wottsosh datsatse konnor ‹Nihono› err s’eegk’ayere. 10 Iti danirwo Krstos s’uzi b́wottsosh ‹Daniruwono› err s’eegeyo k’ayere. 11 ✝23:11 Mat. 20:26-27; Mar. 9:35; 10:43-44; Luk'. 22:26 Ititse eeno it guutso wotowe. 12 ✝23:12 Luk'. 14:11; 18:14 B́ tooko dambaan detsetwo dashan aanitwe, b́ tooko dashan detsetwo dambaan wotitwe.»

Nem danifwotsnat Ferisawino eteefuwots bo atso bodartsotse b́faytsok’o

13 «Asho dari mengstots b́ kindrawok’o, b́ fengesho is’iruwots it itgit alberetswotso, nemo danifuwotsnat ferisawino eteefuwotso! indowe itsha! it ittokoosh bíts kindratste, kindosh geyirwotsnowere bokindrawok’o bazirutee! [ 14 Nem danifuwotsnat ferisawino etfwotso, be’ewosha etaat geenzidek’at Ik’o it k’onirwats weebdek’at t’oow máátsuwots detstso ishbaziruwotso indowe itsha! manshe itatse ikibog angsho bodetuwe.]*23:14 Matiyos mas’fotsere tatse awdl taawan aaliye ik ik shin kishon guut’ets mas’fotse aaliye, Mar. 12:40 nat Luk'. 20:47 atse fa’ee. 15 It took danaw nem danifwotsnat ferisawiwotso! indowe itsha! ayhudi woteraw ash iko ayhudi imnetiyo maants woniyosh datsatsno aats k’aratsno sha’at it gúriri, kindsh itdek’tsok’onowere, itiyere gitkisho ikibogo gahanemsh k’antso woshirutee!

16 «It jishiru dooguwotso! indowe itsha! ‹Asho Ik' k’oni moon b́taariyale, eegor woteratse› etfte, ‹Ik' k’oni mootsi awntson b́ taariyalmo taarman bín detsetwe› etirute, 17 It shiyawwotsnat doogwotso! awntsonat awnts s’ayintsitu Ik’i mootse ááw bogfa? 18 Mank’o ‹Asho wosho t’intseyiru bewokoki t’arap’ezon b́ taariyal eegor woteratse,› woshman t’intseyiru k’ac’atse fa’a woshon b́taariyalmó taaro bín detsetwe etirute. 19 It doogwotso! woshonat woshman s’ayintsitu wosh t’intseyiru t’arap’ezoniyere ááw bogfa? 20 Eshe wosh t’intseyiru t’arap’ezon taarirwo, wosh t’intseyiru t’arap’ezonat wosh t’intseyiru t’arap’ezatse fa’a keew jamone b́taariri. 21 Ik' moon taarituwo, Ik' moonat Ik’mootse fa’a Ik’one b́taariri. 22 ✝23:22 Isa. 66:1; Mat. 5:34 Daron taaritwonwere Ik’o mangi jooronat b́ jooratse beyirwonee b́ taariri.

23 ✝ 23:23 Lew. 27:30 «It git alberets nem danifwotsnat ferisawiwotso! indowe itsha! arshudiko, k’ushuwiko, orobrikono tatslo imirutee, ernmó nemotse een eenwotsi k’azniye it k’riri, boowere kááw angshwotsi, orowe etonat amanetso wotoniye, ekeewi itk’ayawo hanoor k’alo itn geyife b́ teshi. 24 It jishiru doogwotso! it úshiru jamwotso s’ungok’o muk’nana’a wottswotsi s’aldek’at it juwiri, kambulok’o een keewonmó it k’oot’iri!

25 «It git alberets nemo danifwotsnat ferisawiwotso! indowe itsha? B́rc’k’onat saniyon úriweertso s’ayintsirute, b́ gitsonmó biik’onat jaalon bín s’eenke, 26 Nee dog ferisawiyono! shin shino brc’uk’onat saniyon b́ gitso s’ayintswee, manoor b́bootsonúwere s’ayin wotituwe.

27 «It git alberets nem danifwotsnat ferisawiwotsn indowe itsha! bogitsotse ash duuni mak’tsonat kim keewo bítse s’eents, bo úronmo nora eteets nas' k’alamiyo fuutere sheengiru doowwotsiye it ariye. 28 Mank’owere it, úratse ashosh ash kááwo araatniye it be’eyiri, it gitsonmó git alberetsonat gondo s’eenwtsere.

29 «It git alberets, nem danifwotsnat ferisawiwotso! indowe itsha! it nebiywots dowoniye it agiri, k’irts kááwwots hawltiyoniye it shengshiri. 30 ‹Nonih shintswotsntoni noteshi wotink’ere nebiyiwots s’atso kuut’r bonton ikwoterawnk’one b́teshi› etirute. 31 Eshe, nebiyiwotsi úd’ts ashuwots nana’o it woto it tookon gawirute. 32 Eshe, it nihots dek' botuutso it were s’eentswere. 33 ✝23:33 Mat. 3:7; 12:34; Luk'. 3:7 It dawnzwotso, dawnz nana’úwotso, gahanemits fayotse aawk’o k’alrniya oorosh it faliti? 34 Mansh hamb, taa nebiyiwotsi, dantelefetswotsi, danifwotsi it maants dowittwee, boyitse ik ikuwotsi úd’itutee, ik ikuwotsi jitetutee, ik ikwotsnowere bo Ik' k’oni mootse togetute, ik kitotse ik kitomaad gishitutee. 35 ✝23:35 Aze. 4:8; 2 Zen. 24:20-21 Manatse tuutson kááwo Abeel s’atsatse de’er Ik’i moonat wosh t’intseyiru t’rap’ezi dagotse it úd’tsok b́ borfetsosh Berakiyu naay Zekariyas s’atsats b́ borfetsosh datsats kud’ts kááwwots s’atsatse tuuts fayo itatsatse b́bodeti, 36 Arikoniye itsh tkeewiri, fay jamaaniye, and dúranatse shuwetsanotsats bodetwe.»

Iyesus Iyerusalem jangosh bíeptsok’o

37 Manats dabt́ hank’owa bíet, «Iyerusaleme, Iyerusaleme! nee nebiywotsi úd’irunee! nmaants woshetswotsi úd’at shútson togirunee! baaku b nana’o b gop’shots b kakufok’o, taawor n nana’o ikok kakuwosh ambtsote t geyi! itmó geratste. 38 ✝23:38 Erm. 22:5 Eshe hambe, it moo bashar oritwe. 39 ✝23:39 Dub. 118:26 Manshe ‹Doonzo shútson wetuwo deereke› it erfetsosh haniye il taan be’atste etirwe.»