2 कुरींथी 9

6 बाकुन वात जी छे, जे ईतरोक वेरे चु ईतरोक काटे बी, ने जे बेसको वेरे, चु बेसको काटसे। 7 आखा माणुस जसों मन मां ठाणी लेय असोत दान करे; नी कुड़-कुड़ सी, ने नी दबाव सी, काहाकी भगवान खुसी सी आपणे वाळा सी परम राखे। 8 भगवान आखी भातीन गीण-दया सी बेसकु बड़ीन आप सके जेरे सी आखी वात मां ने आखी टेमे, आखो काय, जो तुहुंंक जरुड़ी रवे, तुंद्‌रे धड़े रवे, आखो वारु काम वाटे तुंद्‌रे धड़े हवे। 9 जसों लिखलो छे,

"हयु आरवी देदु, ने खाली काजे दान आप्‌यु,

हेरो धरम जलम बणीन रवसे।"

10 अळतेन जे एरने वाळा काजे बीज, ने खाणे वाटे रुटा आपे, चु तुहुंंक बीज आपसे ने हीनाक फळ वाळु करसे; ने तुंद्‌रे धरमेन फळे काजे बड़ावसे। 11 तुहुंं आखी वात मां आखी भातीन खुला वाटे जे हामरे साहरे भगवान काजे तु बेसकु वारु *9:11 तु बेसकु वारु धन्यवादछे करीन कह्‌वाड़े, पयस्‌या वाळा हय जावु। 12 काहाकी हीनी चाकरीन पुरो करने सी, चुखला माणसेन मांगे अतरी पुरी नी हवसे, बाकुन माणसे भीणी सी भगवानेन बी बेसकु वारु छे करीन कहवाय्‌से।