1 जीनी तरह हीनु माणसे भगवानेन अघी सी आवणे वाळी वात देखान्‌या मां बी लुच्‌चा हतला तसात तुंद्‌रे मां बी लुच्‌चा सीकाड़न्‌या हवसे, जे खत्‌तम करने वाळा ढंगेन सुरुवात डुकाय डुकायन करसे, ने हीना मालीक जीनुक हीयु मुल ली लेदलु छे हेरु नीकारु करसे, ने आपणे आप काजे छाटुस खत्‌तम कर लेसे। 2 बेसका हींद्‌रेन तसा लुच्‌चाय करसे, जेरे वजे सी छाचाय्‌न वाटेन वाक नीकाळे। 3 चे लालच वाटे वात बणायन तुहुंंक आपणा फायदान वजे बणावसे, ने जे डंडेन हुकुम हींद्‌रे पर पेहल सी हय गुयलु छे, हेरे आवणे मां काय बी वार नी हय, ने हींद्‌रो नास वाट देख र्‌यो।✝2:3 यहेजकेल 36:22; रोमीयो 2:24

4 काहाकी जत्‌यार भगवान हीनु सरग वाळा काहवाळ्‌या काजे जे पाप करनु नी छुड़्‌या, बाकुन नरक मां मकलीन आंदारला डहरा मां नाख देदा, काहाकी नीयावेन दाहड़ा लग बंद रवसे। 5 ने पेहला वारान कळीन आखा माणसे काजे मुसळ धार्‌यु-पाणी पाड़ीन सारी नाख्‌यु, तीने टेमे नुह धरमेन परचार कर्‌या करतेलु, नुहेन घरन्‌या सुद्‌ये ढंड्‌या मां नाखीन बचाड़ लेदु, चे आखा मेळीन आठ जणा हतला। 6 ने सदोम ने अमोरान सहर काजे नासेन असु डंड देदु, की हीनुक खत्‌तम करीन रखड़ा मां मेळाय देदु काहाकी चे आवणे वाळा भक्‌ती नी करने वाळा माणसेन सीकापण वाटे एक दाखलु बणु। 7 ने धरमी लुत काजे जे नी-धरम वाळान वीटेळ्‌ळान चाल-चलन सी बेसका दुखी, हतला ने छुटकारु आप्‌यु ने बचाड़्‌यु।✝2:7 उबजाणनी किताप 19:12,13,15 8 काहाकी चु धरमी हींद्‌रे ईचमां रवतेलु, ने हींद्‌रे नी-धरमेन काम काजे देखी देखीन, ने सामळी सामळीन, दाहड़ीन आपणा छाचला मन काजे दुखाड़तेलु। 9 ती मालीक आपसा भगत काजे पारख मां सी बचाड़ लेजी ने पापी काजे नीयावेन दाहड़े लग डंडेन दसा मां राखणे बी जाणे। 10 खास करीन हीनुक जे वीटळा लालुचेन पछळ डीलेन अनसारे चाले, ने सरकार काजे बेकार जाणे। चे चामटा, ने नीसवड़ा छे, ने मटला राज करन्‌या काजे वारु-भुंडो कवणे सी नी बीहीये, 11 तेबी सरग वाळा काहवाळ्‌या जे ताकत ने ताकत मां हींद्‌रे सी मटा छे, मालीकेन अगळ हीनुक वारु भुंडा कय्‌न गुनु नी लागाड़े। 12 बाकुन जे झुट सीकाड़न्‌या तीनु जनवार्‌यान तसा छे, तींद्‌री अक्‌कल नी हय, ने आखी टेमे आपसा डीलेन हेरेन अनसारेत जीवे, ने धरीन ली जाणे वाटे, ने मरने वाटे पयदा हवला छे। जे माणसे जी वात नी जाणे, चीत वात लीन दीसरान नाव-बद्‌दी करे, बाकुन जे खर करन्‌या माणसे, जनवार्‌यान तसात आपसान खेतेम करन्‌या पापेन साहरे मरीन सर जासे। 13 दीसरान बदनामी करनेन बदले हींद्‌रोत भुंडो हवसे; हीनुक दाहड़ु मांजणीक मुजा मस्‌ती करनु वारु लागे; चे बदनावी ने गुना छे। जत्‌यार चे तुंद्‌रे साते खाय ने पीये, ती आपणे भीणी सी परम खाणो करीन मुजा मस्‌ती करे। 14 हींद्‌रा डुळा मां छीनाळो बसलो छे, ने चे पाप करे पाखुर हुबा नी रय सके; चे उतवाळ्‌या मनवाळा काजे फुसलायन लेय; हींद्‌रा मन काजे लालच करनेन आदत हय गुयली छे, चे सराप सी पुर्‌या छे। 15 चे सुदली वाट काजे छुड़ीन भटकी गुयला छे, ने बवोरेन पुर्‌या बीलामेन वाट पर हय गुयलु छे, तीनाक नी-धरमेन काम करनेन दाहड़की काजे वारु समजी गुयु।✝2:15 गिन्‌ती 22:5-7 16 बाकुन हेरे गुनान बारामां फठकार बी पड़ी, जां लग की एक गुंगी गदड़ीक बी माणसेन तसी वात करी हीना भगवानेन अघी सी आवणे वाळी वात देखान्‌या काजे हेरे गांडाय सी रुक्‌यु।✝2:16 गिन्‌ती 22:26-31

17 चे माणसे सुकला कुवान, ने आंधान उडाल्‌ला वादळा छे; हींद्‌रे वाटे जलमेन आंदारलो ठेराय गीलो छे। 18 चे बेकार कुहरायन वात करी करीन लुच्‌चायन कामेन साहरे हीनु माणसे काजे डीलेन लालच मां फसाड़ी लेय जे भुल मां सी हय नीकळी र्‌या। 19 जे झुट सीकाड़न्‌या असु छुटकारु आपणेन वायदु करे, तीना छुटकारा मां आखा नेम सी छुटीन, जसों पटे तसों जीवणेन छुट छे बाकुन चे ते खत्‌तम करन्‌या पापेन गुलाम छे ने आपसात छुटकारु हात करला नी हय, काहाकी माणुस तेरा कब्‌जाम हय जाय, तेरुत गुलाम बण जाय। 20 जत्‌यार चे मालीक ने छुटकारु आपण्‌या ईसु मसीन उवखाणेन साहरे कळीन नानलीत तरान वीटळने सी बचीन नीकळे, ने अळी हींद्‌रे मां फसीन हारी जाय, ती हींद्‌री पछली दसा पेहली सी बी भुंडीत हय जासे। 21 काहाकी धरमेन वाट काजे नी जाणुत हींद्‌रे वाटे वारु हवतो, की हीनुक जाणीन हीनी चुखली हुकुम सी फीरी जाणु जो हीनुक सुप गुयलो हतलो। 22 तींद्‌रे पर चत वीत्‌यो जसा खरला कवाड़ा मां लिखलो छे: "कुतरो आपसान उखेळ्‌ळो चाट लेय" ने एक उंगळावली सुहेरनी पछी धुळा मां लुळायणे जात रवे।✝2:22 नीतीवचन 26:11