ने अळी जादा एला पाड़े
1 तीनी टेमे हेरोदेस राजा मंडळीन थुड़ाक माणसे काजे जबरान वेला पाड़नु सुरु कर देदु। 2 जु हेरोदेस राजु युहन्नान भायस याकुब काजे तलवार सी झाटकायन माराड़ नाख्यु। 3 ने जत्यार चु देख्यु की असो करने सी यहुदी माणसे खुस हया, ती चु पतरस काजे धरीन लावणे करीन सीपायड़ा काजे मकल्यु। चे दाहड़ा अखमीरेन रुटान तीहवार हतलु। 4 चु पतरस काजे धरीन जेल मां बंद कर देदु, ने तेरी राखवाळी करने करीन च्यार-च्यार सीपायड़ा काजे च्यार पहरा बणावीन मेल देदु। हेरोदेस राजान वीच्यार हतलु की मे ईनु काजे फसह तीहवारेन दाहड़े माणसे अगळ लावीस। 5 एरेन करीन चु जेल मां पतरसेन राखवाळी करने करीन पहरु दी रवला; बाकुन ईसुन मंडळीन माणसे अदुस पतरस वाटे भगवान सी असी दुवा करने बाजी रवला।
जेल मां सी पतरस काजे छुड़ावे
6 ने हेरोदेस राजा पतरस काजे दीसरे दाहड़े माणसे अगळ लावणे हींडतेलु, तीना दाहड़ान पेहले रात पतरस दुय हातकड़्या मां बांदायलु, दुय सीपायड़ान ईचमां सुवणे बाजी रवलु, ने झपला अगळ बी पहरु देण्या सीपायड़ा पहरु दी रवला। 7 एक कपरा मां उचकाणुन मालीकेन सरग वाळु भगवानेन अघली वात बताड़ने वाळु आवीन उबु हय गुयु। ने जेलेम वीजाळो हय गुयो; ने भगवानेन अघली वात बताड़ने वाळु पतरसेन कुख्ये टुचलीन तीनाक जागाड़्यु, ने कह्यु, "मामार उठ।" अतरा मां हातकड़्या आपसात छुटीन हीट पड़्या। 8 तत्यार सरगेन भगवानेन अघली वात बताड़ने वाळु हुकुम आपीन कह्यु, कमर बांद ले ने चीपल्या पेहेर ले। तत्यार तेरी वात सामळीन तसुत कर्यु। ने सरग वाळु भगवानेन अघली वात बताड़ने वाळु पतरस काजे अळी कह्यु, "पुथल्यो पेहेर ले ने मार पछळ आव।" 9 पतरस जेलेम सी नीकळीन सरग वाळा भगवानेन अघली वात बताड़ने वाळु पछळ चाल पड़्यु। बाकुन जु सरगेन भगवानेन अघली वात बताड़ने वाळु कर रवलु चो तीनाक पल्ले नी पड़्यो, खरलो छे की झुट्लो। बाकुन चु ज समजी गुयु की मे सपनो देखणे बाजी रयु। 10 ती चे पेहलु ने दीसरु पहरु छेकीन तीना लुहड़ान झपले लग आया, जो सहरे भीणी उघेड़तेलो। चु झपलु तींद्रे वाटे आपसुत उघड़ी गुयु, ने चे बाहर नीकळी गुया। ने चे गळी मायन आया अतरात ने सरग वाळु काहवाळ्यु उचकाणुन पतरस काजे चां रहणीदीन जाती रयु।
11 जत्यार पतरस काजे समज आय, गुय चु कह्यु "हय मेसेक छाचलीन पल्ले पड़ गुयो की ज हयो च खरलो छे। मालीक आपसा सरग वाळा भगवानेन अघली वात बताड़ने वाळा काजे मारेन्चां मकलीन मेसेक हेरोदेस राजान कब्जाम जेलेम सी छुड़ाय लेदलु छे। ने यहुदी माणसेन आस पर पाणी फेरवी देदलु छे।"
12 जत्यार पतरस काजे जी वात समज मां आय गुय, ती चु युहन्नान माय मरीयमेन घर जात रयु। ईना युहन्ना काजे मरकुस बी कवे। चां बेसका जणा भेळा हय्न भगवान धड़े दुवा करने बाजी रवला। 13 पतरस बाहर झपला काजे ठुक्यु, ने कुण छे करीन तीनाक देखणे, रुदे नावेन एक पावरनी तीने झपले लग आवी। 14 ची पावरनी पतरसेन बुली उळखी लेदी, ने झपलु उगाड़ने रहणीदीन पछी दवड़ीन गुय ने चां भेळा हवला काजे कह्यी, पतरस झपले उबु हय रयु। 15 चे तीनीक कह्या, "तु गांडी ते नी हय।" बाकुन ची पाक्कु भुरसु करीन कवतीत रय की मे जो कय रय, ची खरली वात छे। तत्यार चे कह्या, "चु पतरसेन राखवाळी करन्यु सरग वाळु काहवाळ्यु हसे।"
16 अतरी वार लग पतरस झपलु ठुकतुत रयु। जत्यार चे झपलु उगाड़्या ने पतरस काजे देख्या, ती चे बेसका चकराय गुया। 17 ने पतरस हात पालवीन हुगा राखणेन ईसारु कर्यु, ने काहनी रीती सी मालीक मेसेक जेल सी बाहर नीकाळ लायु चो तीनुक कय देदु; ने अळी चु कह्यु "याकुब ने दीसरा भायस्यो काजे ईनी वातेन खबर कर देजु।" ने कयदीन चु तीना घर मां सी नीकळीन चां सी दीसरी जागे जात रयु।
18 पतरस कां जात रयु करीन संदारे एगात सीपायड़ा कांदराय गुया; काहाकी तीनुक ज नी मालुम हतलो की तेरो काय हयो। 19 जत्यार हेरोदेस राजु दीसरा सीपायड़ा काजे पतरसेक हेरने करीन आखे दुर मकली देदु, ने तेबी तीनुक पतरस नी जड़्यु ती चु पहरु देण्या काजे पुछ्यु, बाकुन चे काय जपाप नी आप्या तत्यार हेरोदेस राजु दीसरा सीपायड़ा काजे हुकुम आप्यु की तुहुंं ईनु पेहरु देण्या सीपायड़ा काजे मार नाखु,
ने हेरोदेस राजु यहुदीया जीलान यरुसलेम सहर छुड़ीन केसर्या सहर मां जात रयु।
हेरोदेसेन मरनु
20 हेरोदेस राजु सुर ने सेदा सहरेन माणसे पर कीचवाय रवलु; हेरेसी सुर ने सेदा सहरेम रवण्या माणसे एक मन्या हय्न मुजगी करीन आया, ने हेरोदेस राजान पावर्या बलास्तुस काजे मानाड़ीन तेरी अगवाय मां तेरे साहरे हेरोदेस राजा धड़े वीन्ती कर्या की तु हामरे पर रीस मां करे बाकुन सुकुन जीवे रवणे दे। काहाकी तीनु काजे हेरोदेस राजान देस सीत खाणेनन चीजे जड़तेला।
21 एक दाहड़ु टाकले दाहड़े हेरोदेस राजु राजान पुथल्या पेहरीन ठट हय्न आपसी नीयावेन गादी पर बठ्यु, ने माणसेक सीकाड़ने बाजी गुयु। 22 माणसे आयड़ीन कह्या, "जे माणसेन बुले नी हय, बाकुन भगवानेन बुल छे।" 23 तीनीत टेमे मालीक भगवानेन एक सरग वाळु काहवाळ्यु हेरोदेस पर आय्न घाव कर्यु, ने तेरा डीलेम कीड़ा पड़्या ने मर गुयु, काहाकी चु भगवानेन सेक-सींगारेन बड़ाय नी कर्यु।
24 भगवानेन बुल बड़तो ने आखीदुर पुग्तो गुयो।
25 जत्यार बरनाबास ने सावुल यरुसलेम मां आपसो सेवा-चाकरीन काम पुरो कर लेदा, ती चे यरुसलेम सी मरकुस काजे लीन पछा अन्ताकीया सहर आवती रया। जु मरकुस युहन्नु कवायतेलु।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)