Atos 14

ईकुनीयुम सहर मां पोलुस ने बरनाबास

1 असी वीतली वात ईकुनीयुम सहरेन यहुदी माणसेन भक्‌तीन घर मां पोलुस ने बरनाबास भेळात गुया, ने चे तीनुक समज आवी असो ईसुन बारामां देखाड़्‌या। ने तींद्‌री वात सामळीन यहुदी माणसे मायन ने युनानी माणसे मायन बेसका जणा ईसु पर भुरसु कर लेदा। 2 बाकुन ईसु पर भुरसु नी करन्‌या यहुदी माणसे, नी-यहुदी माणसेक वीखराड़ी देदा, ने भायस्‌योन वीरुद मां तींद्‌रा जीवेम काट करनेन वीच्‌यार नाख देदा। 3 पोलुस ने बरनाबास बेसका दाहड़ा चां रया, ने मालीक पर भुरसु करीन बीहे बीगुर ईसु भगवानेन बारामां वात करता रया, ने मालीक ईसु तींद्‌रे साहरे वारु काम ने सहलाणी देखाड़ीन आपसी गीण-दयान बुलेन गवा देदलु। 4 बाकुन तीना सहरेन माणसे मां लड़ाय हय गुय ने अलग-अलग हय गुया; ने असु करीन थुड़ाक यहुदी माणसे भीणी ने थुड़ाक ईसुन नेवताळान काम भीणी जाणे बाजी गुया।

5 बाकुन जत्‌यार यहुदी माणसे ने नी-यहुदी माणसे आपसा मुखी साते भेसकायन पोलुस ने बरनाबास साते खुटु वेहवार करने करीन तीनुक दगड़ाटणे करीन वीच्‌यार कर्‌या। 6 ती पोलुस ने बरनाबास तींद्‌री मुजगी जाण गुया, ने चे लुकावन्‌या जीलान लुसत्‌रा सहर मां, ने दीरबे सहर मां ढास पड़्‌या। 7 ने चे चां जाय्‌न बी खुस-खबर सामळावणे बाजी गुया।

लुसत्‌रा ने दीरबे

8 लुसत्‌रा मां एक माणुस बस रवलु, तेरा पाय लुल्‌ला हतला चु पयदा हवलु ती सीत लंगड़ु हतलु, ने चु आज लग चाल्‌यु नी। 9 चु पोलुस काजे वात करतेलु सामळी रवलु, ने चु पोलुस भीणी एक हेट्‌यु देख रवलु, ने तीना लंगड़ा मां वारु हवणेन भुरसु हतलु। 10 अळी पोलुस जुर सी आयड़ीन कह्‌यु, "आपसा पायेन भुरसे उबु हय जां!" ने चु पोलुसेन वात सामळीन उबु हय गुयु ने चालने-फीरने बाजी गुयु। 11 पोलुसेन साहरे हवला वारु कामेक देखीन माणसे लुकावन्‌या बुली मां जुर सी आयड़ीन कह्‌या, "माणसेन रुप लीन देवता हामरे ईचमां उतरीन आवला छे।" 12 ने चे बरनाबास काजे गुयुस देवता ने पोलुस काजे हीरमेस देवता कवणे बाजी गुया, काहाकी पोलुस वात करने मां पुडारी हतलु। 13 ने गुयुस देवतान मंदीर सहरेन झपला अगळ हतलु। ने तीना मंदीर वाळु पुजारी बेल ने फुलेन माळा लीन चां आय लाग्‌यु। चु माणसे भेळु पोलुस ने बरनाबास वाटे बेल मारीन बादा चड़ावणे हींडतेलु।

14 बाकुन जत्‌यार नेवताळान काम बरनाबास ने पोलुस, चे ज सामळ्‌या, ती चे हींद्‌रा पुथल्‌या फाड़ देदा ने जुर सी आयड़ीन ज कवता जाय्‌न माणसेन टुळा मां भराय गुया, 15 "ए माणसे! हामु बी ते असात माणसे, छे जसा तुहुंं छे जां हामु तुहुंं काजे खुस-खबर सामळावणे आवला छे, काहाकी तुहुंं हीनी फालतु वात काजे पछा फीरीन हीना जीवतेला भगवान भीणी आवती रहु जु सरग, धरती, समुदर ने तींद्‌रेम ज काय बी छे तीनाक बणायु। 16 वीत्‌या जमाना मां भगवान आखी जातीन माणसे काजे आपणे-आपणे दथा-तथा देवतान पुजा-पाट करीन जीवणे देदु, काहाकी चे तीनाक नी उळख्‌या। 17 बाकुन तेरा भला कामेन, सरगे सी पाणी पाड़तु रयु, ने टेम-टेम पर मेर पाकाड़तु रयु खाणेन सादन आपतु रयु, ने तींद्‌रा मनेक खुस करतु रयु।" 18 असो कयदीन पोलुस कायस करीन तीनु माणसेक तुहुंं बेल काजे मारीन बादा चड़ावीन मारी पुजा-पाट मां करु करीन रुक्‌यु।

19 बाकुन ईतराक यहुदी माणसे अन्‌ताकीया सहरेम सी ने ईकुनीयुम सी आवीन माणसे काजे आपसा सुदा कर लेदा ने पोलुस काजे दगड़ाट्‌या, ने मर गुयु समजीन तीनाक घीसीन सहर सी बाहर ली गुया; ने चांहान नाखीन जात रया। 20 बाकुन जत्‌यार चेला पोलुसेन चारेमेर आवीन भेळा हय गुया, ती चु उठीन उबु हय गुयु, ती चु उठीन सहरेम गुयु ने दीसरे दाहड़े बरनाबास पुठ्‌ये दीरबे सहरेम जात रयु।

सीरीया ने अंताक्‌या सी पछा आवणु

21 पोलुस ने बरनाबास दीरबे सहरेन माणसे काजे खुस-खबर सामळाया, ने बेसका चेला बणाया, ने लुसत्‌रा ने ईकुनीयुम ने अन्‌ताकीया पछा जात रया। 22 ने चे, चेला काजे हिम्‌मत देवड़ावता जाय्‌न तीनुक भुरसा मां काठा रवणे करीन जी वात सीकाड़ता रया, "आपणु काजे बेसका वेला करीन भगवानेन राजेम भरायणु छे।" 23 ने चे मंडळीन पुडारी बणावणे करीन माणसेक नेवाड़्‌या ने तीनुक पुडारी‌ ठेराया, ने उपास भेळा भगवान धड़े वीन्‌ती करीन, तीनुक मालीकेन हातेम आप देदा; तीना मालीक ईसु पर चे भुरसु कर्‌या।

24 तत्‌यार पोलुस ने बरनाबास पीसद्‌या जीलाक वेणकीन, दखणाव पंफुलीया जीला मां पुग्‌या। 25 ने पीरगा सहरेम भगवानेन खुस-खबर सामळावीन अताल्‌या सहरेम आया। 26 अळी चां सी चे भगवानेन गीण-दयान अनसारे सुपलो काम पुरो करीन मटला ढंड्‌याम बसीन अन्‌ताकीया सहरेम चाहात रया, जां सी चे काम सुरु करला।

27 जत्‌यार चे अन्‌ताकीया मां पुगीन, चे मंडळीन भुरसु करन्‌या माणसे काजे भेळा कर्‌या, ने ज काय हयो तत्‌यार भगवान तींद्‌रे पुठ्‌ये हतलु ने कसु नी-यहुदी वाळा माणसे वाटे बारनो उघाड़ देदु 28 चे बेसका दाहड़ा लग चां आखा चेला पुठ्‌ये रया।