पोलुस ने सीलास काजे धरीन जेल मां नाखे
16 जत्यार हामु एक दाहड़े दुवा करने घर मां जाणे बाजी रवला ती हामु काजे एक जुवान गुलाम पावरनी भेळी हयी तीनी मां हवणे वाळी वात कहण्यु भुतड़ु भराय रवलु ने ची तीना भुतड़ान साहरे माणसे काजे हवणे वाळी वात देखाड़ तेली ने तेरा मालक्या वाटे बेसका पयस्या कमाय लेतली। 17 ची पोलुस ने हामरे पछळ-पछळ आवीन आयड़ती जाय्न कह्वी जे माणसे आखा मां रवण्या भगवानेन चाकर्या छे ने तुहुंं काजे छुटकारान खबर सामळावे। 18 ची बेसका दाहड़ा लग असीत करती रवी बाकुन पोलुस दुखी हय्न पछु फीरीन तीना भुतड़ा काजे कह्यु मे तुसेक ईसु मसीन नाव सी हुकुम आपो की हेरे मां सी नीकळी जां ने ची तीने टेमे नीकळी गुयु।
19 तत्यार तेरा मालक्या देख्या की हामरी कमायन आस जात रय ती चे पोलुस ने सीलास काजे धरीन हाटेन चवराया पर मुख्यान चां घीसड़ीन ली गुया। 20 अळी पोलुस ने सीलास काजे नीयाव करन्या मुख्यान चां लीन गुया ने तीना काजे कह्या ज देख जे अदमी यहुदी छे ने हामरा सहरेम माणसे मां गरबड़ी कर र्या। 21 ने चे असली रीती भातीन बारामां कय र्या जीनी रीती काजे माननु ने पाळनु आपणे वाटे वारु नी हय काहाकी आपणु रोमी माणसे छे। 22 तत्यार तींद्रे सांबा चां वाळा माणसे हुड़दीन आय गुया।
ने नीयाव करन्या तींद्रा पुथल्या फाड़ीन डील पर सी छेटा कर देदा ने तीनु काजे ठुकणेन हुकुम आप्या। 23 ने चे पोलुस ने सीलास काजे बेसका ठुक्या ने तीनु काजे जेल मां बुजी देदा ने जेल राखवाळ्या काजे कह्या ईनु काजे वारु चतराये देखजु। 24 हुकुम सामळीन जेल राखवाळु तीनु काजे लीन माहें वाळी जेल मां बुज देदु ने तींद्रा पाये काजे लाकड़ा मां मेकीन ठुक देदा।
25 आधलीक रातेन हेर फेर मां पोलुस ने सीलास भगवान साते दुवा करीन भगवानेन गुणे गावणे बाजी रवला ने दीसरा केदी बी तींद्री दुवा ने भगवानेन गुण गावतेला सामळी रवला। 26 ने तत्यारुत चां उचकाणुन बेसकी जुरे धरती हाली ने जेलेन पाया हाल पड़्या ने तत्यारुत जेलेन बारना उघड़ी गुया ने आखा केदीन हात कड़्या ने पाय कड़्या उघड़ी गुया। 27 जेलेन राखवाळ्यु जागी गुयु ने जेलेन बारना उगड़ला देखीन ज्य समजी गुयु की केदी ठासी गुया तेरेमां चु मीयान मां सी तलवार नीकाळीन आपसा काजे तलवार दीन मारने हींडतेला। 28 बाकुन पोलुस जुर सी आयड़ीन तीना काजे कह्यु तु आपसा काजे मारीन आपसान ने नुकसाण मां करे काहाकी हामु जात छे।
29 तत्यार चु जेलेन राखवाळ्यु दिवु मांगाड़ीन माहें दवड़ीन गुयु ने कापतु जाय्न पोलुस ने सीलासेन पाये मां हीट पड़्यु। 30 ने चु तीनु काजे बाहार लावीन कह्यु ए मालक्या छुटकारु हात करने करीन मेसेक काय करनु पड़से।
31 चे कह्या तु, "मालीक ईसु मसी पर भुरसु कर ती तुसे काजे ने तारा घरन्या काजे छुटकारु जड़से।" 32 ने पोलुस ने सीलास तीना जेलेन राखवाळ्या ने तेरा आखा घरन्यान माणसे काजे मालीक ईसुन बुल सामळ्या। 33 ने चु जेलेन राखवाळ्यु तीनीत राती तीनु काजे ली जाय्न तींद्रा घाव धुयु ने चु तत्यारुत आपसा घरन्या भेळु पाणी मां बपतीस्मा लेदु। 34 तत्यार चु पोलुस ने सीलास काजे आपसान घर लीन गुयु ने तीनु काजे खाणो खावाड़्यु ने आपसा आखा घरबार्या पुठ्ये खुसी कर्यु काहाकी चे भगवान पर भुरसु कर्या।