1 पोलुस ने सीलास अमफीपुलीस ने अपुलन्‌या सहर मायन थीसलुनीकीया सहर आया चां एक यहुदी माणसेन भक्‌तीन घर हतलो। 2 चां पोलुस आपसी टेमेन अनसारे तीनु काजे मेळने गुयु ने तीना आरामेन दाहड़े लग तींद्‌रे साते चुखला सास्‌तुरेम सी वात देखाड़ीन दाखलु दी-दीन वात मां माथा-पच्‌ची हय गुय। 3 ने दाखला भेळु सास्‌तुरेन वाते काजे समजाड़्‌यु की ईसु मसी काजे दुख झेलने ने मर्‌या-सर्‌या मां सी जीवतो हवणु जरुड़ी छे, "ने चु ईसुत मसी छे तेरे बारामां परचार करे।" 4 तींद्‌रे मां सी थुड़ाक माणसे ईसु पर भुरसु कर्‌या ने भगवानेन भक्‌ती करन्‌या युनानी माणसे मां सी बेसका जणा ईसु पर भुरसु कर्‌या ने बेसकी उची कुळीन बायरा बी ईसु पर भुरसु कर्‌या ने पोलुस ने सीलास पुठ्‌ये भेसकाय गुया।

5 बाकुन यहुदी माणसे कुहरायणे बाजी गुया, ने चे थुड़ाक हाटे मायन गुंडा माणसे काजे भेळा कर्‌या ने टुळु बणीन दंगु कराड़ देदा। ने चे दवड़ीन आया ने यासोनेन घर अगळ भेळा हय गुया। ने चे असा कुसीत करने लाग्‌या कसा बी करीन पोलुस ने सीलास काजे सहरेन माणसे अगळ ली आवजे। 6 बाकुन जत्‌यार पोलुस ने सीलास यासोनेन घर मां नी जड़्‌या ती चे यासोन ने चां वाळा दीसरा भायस काजे घसड़ीन सहरेन नीयाव करन्‌या चां ली गुया ने आयड़ीन कह्‌या जे माणसे आखी कळी मां परेसान कर देदला छे ने हय चां बी आय गुयला छे। 7 ने यासोन तीनु काजे हेरा घर मां थुबाड़ रयु, चे आखा मटला राजान हुकुमेन वीरुद करे ने कह्‌वे की एक राजु अळी छे तेरो नाव ईसु छे। 8 जत्‌यार समजीन सहरेन माणसे टुळु ने सहरेन हकदार्‌या घाबराय गुया। 9 छुड़ावणे वाटे हकदार्‌यान लागणे वाळा पयस्‌या यासोन ने दीसरा माणसे सी लेदा ने तीनुक छुड़ी देदा।

10 ईसु पर भुरसु करन्‌या भायस तीनेत राते पोलुस ने सीलास काजे बीरीया सहरे मां मकली देदा ने चे बीरीया सहरे मां पुगीन यहुदी माणसेन भक्‌तीन घर मां गुया। 11 चे बीरीया सहर वाळा थीसलुनीकीया सहर वाळा माणसे सी वदु वारु हतला ने चे बेसका मन लागाड़ीन भगवानेन बुल सामळ्‌या ने पोलुस कह्‌यु ची वात सय हय की नी हय करीन खरला सास्‌तुर मां हेरीन दाहड़ीन पारखतेला। 12 तींद्‌रे मां बेसका माणसे ईसु पर भुरसु कर्‌या ने भगवानेन भक्‌ती करन्‌या युनानी मां उची कुळीन बायरा बी ईसु पर भुरसु कर्‌या। 13 बाकुन थीसलुनीकीया मां रहणे वाळा यहुदी माणसे काजे मालुम पड़ गुयो की पोलुस बीरीया मां भगवानेन बुलेन परचार करने बाजी गुयु ती चे चां बी दवड़ीन आय गुया ने माणसे काजे भड़काया ने तींद्‌रे पर जुर करने बाजी गुया। 14 तेरेसी ईसु पर भुरसु करन्‌या भायस पोलुस काजे तत्‌यारुत तु समुदर धड़े जात रव करीन कह्‌या बाकुन सीलास ने तीमुथीयुस चांहान रय गुया। 15 पोलुस काजे मेकणे जाण्‌या सीलास ने तीमुथीयुस काजे कह्‌या की तुहुंं छाटास आवजु ने चे पोलुस काजे मेकणे करीन तेरे पुठ्‌ये चाल पड़्‌या ने चे पोलुस काजे मेकणे करीन एथेंस लग गुया।

16 जत्‌यार पोलुस एथेंस सहर मां तीमुथीयुस ने सीलासेन वाट देख रवला ती तीना एथेंस सहर मां बेसका देवतान मुरत्‌या देखीन पोलुस काजे आपसा जीवे मां बेसको दुख लाग्‌यो। 17 तेरेमां चे दाहड़ीन यहुदी माणसेन भक्‌तीन घर मां यहुदी ने भगवान काजे बीहणे वाळा युनानी सी वात-वात मां माथा-पच्‌ची करतेलु अतरोत नी बाकुन दाहड़ीन हाटे मां काहना बी रवतेला तींद्‌रे सी वात मां माथा-पच्‌ची करतेलु। 18 चां ईपीकुरी ने स्‌तोईकी मास्‌तर्‌या हतला "चे पोलुस साते वात मां माथा-पच्‌ची करतेला ने तींद्‌रे मां थुड़ाक कह्‌या जु बक-बक करन्‌यु हामु काजे काय कह्‌णे हींड रयु ने?" दीसरा कह्‌या जु दीसरा देवतान परचार करन्‌याक मालुम पड़े, काहाकी पोलुस ईसुन बारामां जी सीकाड़नेन वात आपतेला की ईसु मर्‌या-सर्‌या सी जीवतु हय्‌न बठु हय गुयलु छे। 19 तेरेसी चे तीना काजे धरीन अरीयुपगुस नावेन एक बयड़ी पर अकलेन बठक मां ली गुया, ने पुछ्‌या, तु जी नवली सीकाड़नेन वात माणसे काजे आपणे बाजी र्‌यु, तीनी सीकाड़नेन वात काजे हामु जाणने हींड रया। 20 काहाकी हामु काजे बेसकी घाबराड़ देय असी वात सामळावे तेरेसी हामु जाणने हींड रया की तेरो मतलब काय छे? 21 चां रहण्‌या आखा एथेंस सहर मां रहण्‌या आखा माणसे ने दीसरा देसेन माणसे नवली-नवली वात कह्‌वणे ने सामळने मां टेम लागाड़तेला ने तीनुक ईनी वाते मां मजा आवतेली।

22 तत्‌यार पोलुस अरीयुपगुस नावेन बठक मां उबु हय्‌न कह्‌यु, ए एथेंस वाळा माणसे मे देखणे बाजी रयु, की तुहुंं देवता पर बेसका भुरसु करीन तींद्‌री पुजा-पाट करु। 23 मे जां फीरतु जाय्‌न तुंद्‌री पुजणेन चीज काजे देखणे बाजी रवलु, ती मेसे काजे एक असी बयड़ी देखाव पड़ी तीनी बयड़ी पर ज्‌य लिखलो हतलो, अन्‌जाण्‌या भगवान वाटे तेरेसी तुहुंं तीना काजे जाणे पाकुर पुजा-पाट कर रया तेरे बारामां मे तुहुंं काजे सामळावो। 24 जु भगवान कळी काजे ने तेरेमां जो काय छे, चो आखो बणावलु छे, ने सरग ने धरतीन मालीक छे ने माणसेन हात सी बणावला मंदीर मां नी रवे। 25 तीना काजे काहनी बी चीजेन फीकुर नी हय, तेरेसी तीना काजे काहनी बी चीज नी चाहती काहाकी चु आखा माणसे काजे जीवन ने जीवणेन दम आपे ने जो चाहजे आप्‌या करे। 26 चु ते एकुत माणुस मां सी आखी जातीन धरती पर रवण्‌या माणसे काजे बणायु, ने तींद्‌री रवणेन जागान काकड़ बांद देदु। 27 ज आखो असो करनेन पछळ भगवानेन मरजी जी हतली, की आखी जातीन माणसे भगवान काजे हेरनु चाहजे कांखुर मायन चे हेरता-हेरता तीना भगवान काजे हेर लेय तेबी चु भगवान आपणे मां सी काहाना बी सी छेटु नी हय। 28 काहाकी आपणु तेरेत मां जीवता रवजे,

ने तेरेत मां हींडजे-फीरजे ने तेरेत मां टीकला रवजे।

जसा तुंद्‌रे मायन थुड़ाक लिखण्‌या बी कह्‌ला छे,

की हामु तेरात पुर्‌या-पारी छे।

29 काहाकी हामु भगवानेन पुर्‌या-पारी हय्‌न आपणु काजे ज नी समजणु चाहजे की भगवान माणसेन वीच्‌यार सी सनान रुप्‌यान नीते दगड़ान बणावली मुरतीन तसु छे। 30 वीतला जमाना मां माणसे ज जाणतेला की हामरे वाटे भगवानेन मरजी काय छे, तेरेसी चु तीनुक उचकाणुन डंड आप्‌यु बाकुन हय भगवान जु हुकुम आपलु छे, की आखे जागे माणसे पाप भीणी सी मन फेरवीन भगवान भीणी वळनु चाहजे। 31 काहाकी भगवान एक दाहड़ु टाकलु छे, तेरेमां चु एक माणसेन साहरे आखी कळीन माणसेन धरमेन ताकड़ी लीन नीयाव करसे ने चु तीना नीयाव करन्‌या माणुस काजे मर्‌या-सर्‌या माणसे मां सी जीवतु करीन बठु कर देदलु छे ने आखा काजे आपसान ठेहरावली वातेक उजेंतु करीन सबुत आप देदु।

32 तत्‌यार मर्‌या-सर्‌यान सी पछु जीवतु हवणेन वात सामळीन थुड़ाक माणसे हासी उड़ावणे बाजी गुया, ने थुड़ाक कह्‌या मर्‌या-सर्‌याम सी अळी जीवणेन बारामां हामु कदी नी सामळजे। 33 तत्‌यार पोलुस तीनु काजे छुड़दीन जाती र्‌यु। 34 बाकुन तेबी थुड़ाक माणसे पोलुसेन वात पर भुरसु कर्‌या ने तेरे पुठ्‌ये चाल पड़्‌या तींद्‌रे मां दीयेनीसीयुस हतलु जु अरीयेपागुस बठकेन एक मेहमर हतलु, ने दमरीस नावेन एक बायरी हतली, ने तींद्‌रे पुठ्‌ये अळी थुड़ाक माणसे हतला।