कुरींथीस सहर मां पोलुस जाय
1 अळतेन पोलुस एथेंस सहर छुड़दीन कुरींथीस मां गुयु। 2 चां तीना काजे अक्वीला नावेन एक यहुदी माणुस भेळु हयु, ने चु पुन्तुस मां पयदा हवलु हतलु चु हेरी बायरी परीस्कीला पुठ्ये ईटली सी पेहलुस आवलु हतलु काहाकी क्लोदीयुस राजु आखा यहुदी माणसे काजे रोम सहर मां सी नीकळी जावु करीन हुकुम नीकाळ्यु। तेरेमां पोलुस तीनु माणसे काजे भेळु हवणे गुयु। 3 काहाकी पोलुसेन ने तींद्रु एकुत धंदु हतलु तेरेसी पोलुस तींद्रेत पुठ्ये रवीन काम करने बाजी गुयु, ने तींद्रो काम धंदु तम्बु बणावणेन हतलो, काहाकी चे तम्बु बणावण्या हतला। 4 पोलुस आरामेन दाहड़े यहुदी माणसेन भक्तीन घर मां जाय्न वाते मां माथा-पच्ची करतेलु ने यहुदी ने युनानी माणसे काजे समजाड़नेन कुसीत करतेलु।
5 जत्यार सीलास ने तीमुथीयुस मकीदुनीया सी आया, ती पोलुस भगवानेन बुलेन परचार करने मां आपसो पुरो मन लागाड़ रवलु, ने चु यहुदी माणसे अगळ गवाय देतु, रयु की ईसुत मसी छे। 6 बाकुन जत्यार चे माणसे पोलुसेन वीरुद करीन नाव-बद्दी करतेला ती पोलुस आपसान झगल्यो फाड़ीन तीनु काजे कह्यु, "तुंद्रु खुन तुंद्रा मुणका पर रहे! मे गुनाळु नी हय। मे हय सी नी-यहुदी मां ईसुन परचार करने जायस।" 7 असु कय्न पोलुस तीनु काजे छुड़दीन जात रयु, ने तीतुस युस्तुस नावेन एक माणसेन घर गुयु, जु भगवानेन भक्ती करन्यु हतलु ने तेरो घर यहुदी माणसेन भक्तीन घर साते चस्टायन बांदलो हतलो। 8 यहुदी माणसेन भक्तीन घरेन मुख्यु कीर्स्पुस आपसा आखान घरन्या भेळु मालीक ईसु पर भुरसु कर्यु, ने बेसका कुरींथी सहर वाळा माणसे बी पोलुसेन साहरे ईसुन बारामां वात सामळीन ईसु पर भुरसु करीन बपतीस्मा लेदा।
9 मालीक ईसु तीनीत राते सपना मां पोलुस काजे कह्यु, बीहे मां बाकुन भगवानेन वात कवतु रव ने हुगु मां रवे। 10 काहाकी मे तारे पुठ्ये छे, ने कुय बी तारो नुकसाण नी करे काहाकी हीना सहर मां मारा माणसे बेसका छे। 11 तेरेसी पोलुस माणसे काजे भगवानेन वात सीकाड़तु जाय्न चां डेड़ साल लग रयु।