12 जत्यार गल्लीयो अखाया देसेन राज-करन्यु हतलु, ती यहुदी माणसे मुजगी करीन पोलुस भीणी जुर करीन आया, तीना काजे कुरुट-कचेरी अगळ उबु करीन कह्या। 13 ने कह्या, जु अदमी भगवानेन भक्ती करनेन असु नीयम-कायदु सीकाड़े, जु मुसान साहरे लिखला नीयम-कायदा सी अलग छे।
14 पोलुस आपसुत कह्णे हींडतेलु ने तीनेत टेमे गल्लीयो यहुदी माणसे काजे कह्यु, "ए यहुदी माणसे कदी जु नीयावेन वीरुद मां काय बी गुनु करलु हसे, नीते मटु गुनु कर्यु हय, ती मे तुंद्री वात सामळीन तीयार रवतु। 15 बाकुन जे हीनी वात-वातेम लड़ायतेला, ती बेसका नावेन बारामां ने मुसान साहरे लिखला कायदान बारामां छे, तेरेसी ईनी वाते मां मे तुंद्रेम नीयाव करन्यु नी बणो, तुहुंंत ईनी वातेन बारामां जाणु।" 16 ने चु गल्लीयो पोलुस काजे नीयाव करे तीनी कुरुट-कचेरी मां सी बाहर नीकाळ देदु। 17 ती आखा यहुदी माणसेन भक्तीन घरेन मुख्या सोस्थीनेस काजे नीयाव हवे तीनी कुरुट-कचेरी अगळुत धर पाड़्या ने बेसका ठुक्या, बाकुन गल्लीयो तीनी वात काजे देखी भाळीन काय बी नी कह्यु।