44 जंगल मां हामरा आड़ा-बुड़ा धड़े गवान तम्‌बु हतलु। भगवान मुसा काजे ईना तम्‌बुन बारामां ज हुकुम आप्‌यु हतलु, मे तीना तम्‌बुन सहलाणी तुसे काजे देखाड़लु छे, तीनी सहलाणीन अनुसार तम्‌बु बणावजी। 45 पछेन चु तम्‌बु अगली पीड़ीन आपणा आड़ा-बुड़ा यहोसुन अगवाय मां जां ली आया; तीने टेमे चे नी-यहुदी धड़े जी धरती हापकी लेदला, काहाकी भगवान नी-यहुदी काजे आपणा आड़ा-बुड़ा अगळ सी नीकाळ देदलु; ने असु करीन चु तम्‌बु दावुदेन टेम लग आपणा आड़ा-बुड़ान हातेम रयु। 46 ईना दावुद पर भगवान गीण-दया कर्‌यु, ने दावुद जी हेर कर्‌यु की मे याकुबेन भगवान वाटे एक मंदीर बणावीस। 47 बाकुन सुलेमान याकुबेन भगवान वाटे मंदीर बणायु।

48 तेबी आखाम उचु रवण्‌यु भगवान माणसेन साहरे बणावला घर मां नी रयु, जसु भगवानेन अघली वात बताड़ने वाळु माणुस कवे,

49 सरग मारी राजगादी छे,

ने धरती मारी पायेन पयड़ी छे,

तुहुंं मार वाटे काहनु मंदीर बणावसु? मालीक पुछे,

मार वाटे आराम करनेन असु काहनु जागु छे, जां मे आराम करो?

50 काय ज आखो मार हात सी बणावलो नी हय काय?