1 ए मालक्या सरगे मां तुंद्रु बी एक मालीक छे, असो समजीन तुहुंं आपणा-आपणा गुलाम पावर्या साते वारु नीयाव ने वेहवार करु।
खुस-खबर सामळावणेन मुखु जड़नु चाहजे करीन भगवान धड़े वीन्ती करता रहु
2 पहरु देण्यान तसा चेतीन रहु ने भगवान धड़े दुवा करु, ने भगवान काजे बेसकु वारु कहता जाय्न मन लागाड़ीन वीन्ती कर्या करु। 3 मे ते हय ईसु मसीन बारामां भगवानेन सातायली युजना उजेंती कर देदु करीन मेसेक जेल मां कुंड मेल्यु; तेबी मेसेक ईसुन ज काम करनु छे; अतरे हामरे वाटे बी भगवान धड़े वीन्ती करता रहु, की भगवान हामुक ईनी सातायली वातेन खुस-खबर दीसराक बी सामळावणे करीन अळी बी मुखु आपे। 4 भगवान वाटे वीन्ती करु की मे भगवानेन ईनी सातायली वात काजे जसी मेसेक उजेंती करनु चाहजे तसीत चुखी झण उजेंती करो।
5 तुहुंं बी खुस-खबर सामळावणेन मुखु हेरता रहु; ईसु काजे माने तींद्रे साते अक्कल सी वेहवार करु; जत्यार बी मुखु जड़ जाय ती, मुखा काजे महंग्लु समजीन तीनुक खुस-खबर सामळु। 6 ने तींद्रे धड़े तुंद्री वात जलम गीण-दया वाळी ने सुवाळी रहणु चाहजे, ने तुहुंं काजे वारु रीते आखाक जपाप देदा आवड़ी जाणु चाहजे।
पोलुसेन सातीन बारामां खबर
7 मे तुखीकुस काजे तुंद्रेन्चां मकली रयु जु, मालीक ईसु मां मारु लाटेक्लु भाय ने साती गुलाम पावर्यु छे, ने ईसुन ईमानदार पावर्यु छे। 8 मे हीनाक हेरेन करीन मकली रयु की तुहुंं, हेरे साहरे हामरे बारामां जाण लेवु, ने जु तुंद्रा हीया मन काजे हिम्मत आपे। 9 ने मे हेरे पुठ्ये उनेसीमुस काजे बी मकली रयु, हयु ईसु मसी मां हामरु लाटेक्लु ने ईमानदार भाय छे, ने जु तुंद्रे मायन एक जणु छे; ने हया तुहुंं काजे जां वाळी आखी वात कय देसे।
10 अरीस्तारकुस ते मार पुठ्ये जेल मां कुंडायलु छे। मरकुस ते बरनाबासेन सगु भाय छे; तेरे बारामां तुहुंं काजे ज हुकुम जड़लो हतलो की हयु जत्यार बी तुंद्रेन्चां आवे ती हेरु वारु आव-भाव करजु। 11 ने ईसु काजे बी जु युस्तुस कहवाये, जे तुहुंं काजे वारलु छे की करीन पुछ रया, ने यहुदी माणसे मायन जे अतरात भगवानेन राजेन वाटे मार साते काम करन्या साजल्या छे; ने जे मेसेक सांती आपण्या छे।
12 ईपर्फास बी तुहुंं काजे वारलु छे की करीन पुछ रयु। हयु तुंद्रेत मायन एक जणु छे, ने ईसु मसीन गुलाम पावर्यु बण रयु। हयु ते तुंद्रे वाटे जलम भगवान धड़े जीव ने डील लागाड़ीन दुवा कर्या करे, हयु हेरेन करीन की तुहुंं आखी वातेम भगवानेन मरजी पुरी करता जाय्न पुरा-पुरा पाक्का हय जावु। 13 मे ईनी वातेन गवा छे की, हयु तुंद्रे वाटे ने लोदीकीया सहर ने हीयारापुलीस सहर मां रहणे वाळा ईसुन माणसे वाटे बेसको काठो काम करो। 14 परमवाळु डाक्टर लुकु तुहुंं काजे आवीस ने आवजु कय रयु ने देमास बी आवीस ने आवजु कय रयु।
15 लोदीकीया सहरेन ईसुन माणसे काजे ने नुमफास काजे ने तेरा घर मां बसणे वाळी मंडळी ने माणसे काजे बी मारे अगळ हय्न वारलु छे करीन कय देजु। 16 ने जत्यार जी चिट्ठी तुंद्रेन्चां भण लेवु, ती लोदीकीया सहरे मां रहण्या ईसुन मंडळी काजे बी जी चिट्ठी भणाय देजु, ने जी चिट्ठी मे लोदीकीया वाळी मंडळीन नावे मकेल्लु जी चिट्ठी तुंद्रेन्चां आवे ती तुहुंं बी भणजु। 17 ने अरखीप्पुस काजे कह्जु की ज सेवान काम मालीक ईसु तुसे काजे आपलु छे, तीना कामेक समळीन पुरो कर लेजु।
18 मे पोलुस खुद आपसे हाते करीन तुहुंं काजे वारलु छे करीन लिख रयु। मेसेक ते जेल मां कुंड मेल्यो; मेसेक घुण ईसेरु। तुंद्रे पर गीण-दया हवती रहणु चाहजे!
असु मे भगवान धड़े वीन्ती करो; आमीन।