1 हेरे वजे सी मे पोलुस जे तुहुंं नी-यहुदीया वाटे मसी ईसुन बांदायलु छे। 2 तुहुंं छाचलीन सामळी रया, की तुंद्‌री भलाय करतात, भगवान गीण-दया भेळ ज कामे मेसेक सुप देदलु। 3 भगवान आपसी युजनान सातायली वात काजे डुळा अगळ देखाड़ीन मारे पर उजन्‌तु करलु छे, तीनी वातेन बारामां मे तुंद्‌रे वाटे पेहलेत उपर लिख देदलु छे। 4 जी वात भणीन तुहुंंक मालम पड़ जासे, की मे पोलुस खरान ईसु मसीन बारामां सातायली युजनान काजे जाणो। 5 जी सातायली युजना गुया जमाना मां जे माणसे जीवतेला, तींद्‌रे पर उजेंती नी हवली हतली, जसो हय भगवान आपसा जीव-आत्‌मा सी आपसा नेवाड़्‌ला चुखला नेवताळान काम पर, ने भगवानेन अघली वात बताड़ने वाळा माणसे पर उजेंती करलु छे। 6 ची सातायली युजना जी छे, की ईसु मसीन खुस-खबर पर भुरसु करने सी हय ईसु मसी मां नी-यहुदी वाळा माणसे बी, यहुदी माणसे साते भगवानेन वायदु करला एकुत वाटान साजल्‌या ने हकदार्‌या छे, ने एकुत डीलेन भाग छे।

7 मे ते भगवान मेसेक गीण-दया सी तेरी खुस-खबर सामळावणे करीन तेरु चाकर्‌यु बण्‌यु। जी ताकुतेन साहरे काम मारे मां काम कर रय, ची ताकत मारी नी हय, बाकुन भगवानेन ताकत छे। 8 भले, मे भगवानेन चुखला माणसे मां आखा सी नानु छे, बाकुन तेबी ईसु मसीन खुस-खबर नी-यहुदी माणसे मां सामळावणे करीन भगवान मारे पर गीण-दया करलु छे, ने ईसु मसीन खुस-खबर गीणाये नी अतरी बेसकी बरकतेन खजानो छे। 9 ईनी खुस-खबरेन सातायली युजना काजे आखा अगळ उजेंती करने करीन भगवान मेसेक नेवाड़्‌लु छे, जी युजना आखी चीज घड़न्‌या भगवान मां सुरु सीत सातायली हतली। 10 तेरेमां हय ईसुन मंडळी सी भगवानेन आखी भातीन अकल, सरग वाळा जागा मां राज करन्‌या मुख्‌याक ने हकवाळा पर उजेंती हय रय। 11 भगवान आखा घड़त्‌या काजे घड़नेन सुरु सीत जी जलेमकी युजना बणावलु हतलु, तीनीत युजना काजे भगवान आपणा मालीक ईसु मसी मां पुरी करलु छे। 12 ने ईना ईसु मसी पर पुरु-पुरु भुरसु करीन आपणु बीहे पाखुर, ने हिम्‌मत करीन हक सी भगवान बासेन्‌चां जाय सकजे। 13 ने मे तुंद्‌रे सी लीलघाय्‌न कह्‌वो की तुंद्‌रेत वाटे दुख झेल र्‌यु करीन तुहुंं हळका मां हवु; छाचलीन जु दुख मे तुंद्‌रे वाटे झेल र्‌यु, ईना दुखे वाटे, तुहुंं हय अबरुदार बण गुयला छे।

14 ती मे तीना भगवान बासे अगळ मांडा टेकीन लीलघायु। 15 जु सरग वाळान ने धरती वाळा आखा काजे आपसात घराणा मां भेळा हवणे करीन बुलावे। 16 मे भगवान बास सी लीलघाय्‌न कहं की चु तुंद्‌रा जीवेम असु हवणी देय, की तुहुंं तेरा सेक वाळान ताकत सी मतलब तेरा जीव-आत्‌मान ताकत सी, आपसा जीव मां ताकत हात करता जावु, ने काठा हवता जावु। 17 ने ईसु पर भुरसु करने सी, ईसु मसी तुंद्‌रा मन मां रय सके, ने तुहुंं तेरा परम मां उंडा जड़ मुळे नाखीन अदु, ने परम मांत नेहु नाखीन काठा रहु करीन। 18 ने आखा चुखला माणसे भेळा ज समज्‌णेन ताकत हात करे, काहाकी मसीन परम चवड़ो, नांबो, उंचो ने उंडो छे। 19 ईसु मसीन ज परम आपणी समज सी बी बाहर छे, मे भगवान सी बी लीलघाय्‌न कहं की, चु तुहुंंक ईना परम मां पुरुत घुळाय्‌णेन ताकत आपे करीन, ने असा करीन की तुंद्‌री जीवेम भगवानेन आखा गुणे पुरात उजेंता हय जाय।

20 आपणु भगवान ते बेसकु जबर ताकत वाळु छे, ने आपणु जतरी बी दुवा करजे, ने जतरु बी वीच्‌यार करजे तेरे सी बी बेसका आपणा जीवे मां चु काम कर सके। 21 मे ईना भगवानेन बड़ाय करो; ने ईसु मसीन साहरे, ने तेरी मंडळीन साहरे पीड़ीडीट, भगवानेन सेक-सींगारेन जलम बड़ाय हवती रहे। आमीन।