1 ए मारा लाटेक्ला भायस्यो ने बहणस्या, मारु जीव तुंद्री हेर कर रयु, ने तुहुंंक देखणे करीन कलपी र्यु। तुहुंं मारी खुसी ने ईज्जत आपणी पागड़ी साय छे; ने जसु मे तुहुंंक सीकाड़लु तसात तुहुंं मालीक ईसु मां टणका रहु।
वेहवारेन बारामां सीकाड़े
2 मे युवोदी ने सुंतुकी दुयु बायरा काजे समजाड़तु जाय्न कह्वो की, तुहुंं वातेम लड़ाय बीगुर मालीक मां एक मन्या रहु। 3 ने मारा छाचला सात देण्या भाय, मे तुसेक बी लीलघाय्न कहो की ईनु बायरान मदत कर, जे मार साते ने केलमेनस्या भाय साते ने मारा दीसरा सात देण्या साते, खुस-खबर सामळावणे मां, वेला करीन काठी मेहनत कर्या। हीनु आखान नाव अमर जीवाय्न किताप मां लिखलो छे।
4 मालीक ईसु मां जलम लग खुस रहु। मे अळी कहो की खुस रहु।
5 तुहुंं आखा माणसे अगळ 4:5 कोमलताभुळा-भाळा बणु। काहाकी मालीक ईसुन पछो आवणु धड़ेत छे। 6 काहनी बी वातेन फीकुर मां करु, बाकुन हरेक वातेम भगवान काजे, बेसकु वारु कवता जाय्न दुवा ने लीलघाय्न भगवान अगळ आवु। 7 तत्यार भगवानेन सांती, जी हामरी आखी समज सी बाहर छे, ची तुंद्रा मन ने, वीच्यार काजे ईसु मसी मां राखवाळी करसे।
8 तेरेमां मे कहो की भायस ने बहणस्या, भगवानेन नींगा मां, ने माणसेन नींगा मां, जो काय छाचलो छे, ने जो काय ईज्जतेन लायक छे, ने जो काय वारलु छे, ने जो काय चुखलो छे, ने जो काय मनेक भावे तसों छे। ने जो काय बड़ायन लायक छे, ने जे काय वारलु गुणे छे, ईनुत वाते पर मन लागाड़्या करु। 9 ने जी वात तुहुंं मार सी सीक्या। ने मान्या, ने सामळ्या, ने मारेम देख्या, तीनुत वात पर तुहुंं बी चालता रवजु, तत्यार भगवान, जु सांतीन झोर छे।
दान वाटे वारु छे कह्वु
10 मे मालीक ईसु मां बेसकु खुस छे, काहाकी थुड़ाक दाहड़ा हय गुया ने अळी तुहुंं मारी फीकुर अळी कर्या, ने छाचली मां पेहले बी तुहुंं मारी फीकुर करला बाकुन, तीनी फीकुर काजे देखाड़नेन मुखु तुहुंंक नी जड़्यु। 11 मार धड़े काय नी हय, असु सुचीन मे असु नी कवतु, काहाकी जसु बी मे रहो, तेरेत मां खुस रहणु सीक्लु छे। 12 कमुत हय ती कसों रहणु? ने बेसको हय ती कसों रहणु? ने गरीब बणीन जीवणु ने मालदार बणीन जीवणु, भुकलु ने आफरीन रहणु, आखी वात ने आखी हालत मां खुस रहणु, जो आखो मे सीक लेदु। 13 जु मेसेक ताकत आपे, तेरी मदत सी मे आखो-काय कर सको।
14 कसा बी तुहुंं मारी कड़की मां मारी सात दीन मारो भलो कर्या। 15 ए फीलीपी मंडळी वाळा जसा की तुहुंं खुदुत काजे मालम छे, की जत्यार खुस-खबर सामळावणे करीन मे तुंद्रेन्चां आय्न तुंद्रा मकीदुनीया जीलाम सी नीकळीन दीसरे जागे गुयलु, तीनु सुरु वाळा दाहड़ाम तुहुंंक छुड़ीन दीसरी काहनी बी ईसुन मंडळी, लेण-देण मां मारी सात नी देदा। 16 तुंद्रा मकीदुनीया जीलाम सी नीकळनेन पेहले बी, जत्यार मे थीसलुनीकीया सहर मां हतलु, तत्यार बी तुहुंं मारी मदत करने करीन, ईनीत रीते दुयेक कावा मार वाटे दान करला पयस्या भेळा करीन दी मकल्या। 17 जी वात नी हय, की मे तुंद्रा दान करला पयस्यान मरजी राखु; बाकुन मारी मरजी जी छे की, तुहुंं पयस्या दान करता आय रया करीन, भगवान तुहुंंक बरकत आपी आपीन तुंद्रु नफु अदुस बड़ावतु जाय। 18 हय मेसेक जो चाहजे चो आखो मार धड़े छे, ने अदु बी छे; तुहुंं एप्रादीत्यान हाते जे दान करला पयस्या दी मकल्या, तीनु दान करला पयस्या काजे लीन मे बेसकु खुस हय गुयु ने आफरी गुयु। चे दान करला पयस्या ते तीनी सुहरी-सुहरी ने सवादी-सवादी गंदायणी बादा साय छे, जी बादा भगवान काजे चाहजे ने माने असी छे। 19 ने मारु भगवान बी धन मां सी जी सेक-सींगार भेळी मसी ईसु मां छे, चां सी तुहुंंक जो काय चाहजे चो आखो देसे। 20 आपणा भगवान बासेन सेक-सींगार जलम पीड़ीडीट हवती रहणु चाहजे! आमीन।
वारु छे की करीन पुछणु ने आवजु कह्णु
21 जे ईसु मसी मां छे तीनु आखा चुखला माणसेक, मे ने जे भायस मार साते छे, चे वारु छे की करीन पुछ रया, ने आवजु बी कय र्या। 22 जां रहणे वाळा भगवानेन आखा चुखला माणसे ने खास करीन राजान-राजा केसर्यान घर मां रय्न तेरा काम करन्या बी तुहुंंक वारु छे की करीन पुछ र्या ने आवजु कय र्या।
23 ने आपणा मालीक ईसु मसीन गीण-दया तुंद्री आत्मा पुठ्ये रहणु चाहजे।