1 ए गलातीया वाळा, तुंद्‌री अक्‌कल नी आवती काय? तुहुंंक कुण मोहवी लेदो? तुहुंं काजे ते हामु खुल्‌लाम कय देदला, की ईसु मसी काजे कुरुस पर चड़ावीन कसा खीळा ठुकला हतला। 2 मे तुंद्‌रे सी एक वात जाणने हींडी र्‌यु, की तुहुंं भगवानेन जीव-आत्‌मा काजे मुसान लिखला नीयम पाळीन हात करला, की ईसुन खुस-खबर पर भुरसु करीन हात करला?* 3 तुहुंं अतरा डेड़-अकल्‌या हय गुया काय? की तुहुंं ज जीवन भगवानेन जीव-आत्‌मा सी सुरु कर्‌या, तीनी जीवन काजे डीलेन मरजी सी पुरी करने हींड र्‌या काय? 4 तुहुंं अतरो जादा दुख फालतुत झेल्‌या काय? मारु भुरसु छे की तुहुंं फालतु दुख नी झेल्‌या। 5 तुहुंं मुसान नीयम काजे भुरसा सी पाळ र्‌या करीन भगवान तुहुंंक आपसु चुखलु जीव-आत्‌मा आपीन तुंद्‌रे मां ताकुतेन मटा काम कर र्‌यु।

6 आखा यहुदी माणसेन डाहलु बास अब्‌राहमेन बारामां वीच्‌यार करु, तेरे बारामां असो लिखलो छे; अब्‌राहम ते भगवान पर भुरसु कर्‌यु, ने भगवान तीना भुरसाक देखीन तीनाक धरमी गीण्‌यु*। 7 जी वात हेर राखु की जे भगवान पर भुरसु करे, तीनात हीसाबे अब्‌राहमेन खरली अवल्‌यात छे। 8 चुखला सास्‌तुरेन अनसारे पेहेल सीत अब्‌राहम काजे खुस-खबर सामळाय देदु की तारे सी आखी जातीन माणसे संयबरकत हात करसे। ने आपणुक बी जी वात समज मां आवे की भगवान आड़जात्‌या माणसे काजे भुरसु करने सी धरमी गीणीन तीनुक छुटकारु आपसे ईनी खुस-खबरेन वातेन बारामां, अब्‌राहम काजे भगवान पेहलुत सी देखाड़ देदलु। 9 ने चे भगवान पर भुरसु करे, चेत भगवान पर भुरसु करन्‌या अब्‌राहम पुठ्‌ये छुटकारान संयबरकत हात करे।

10 मुसान नीयम मां असो बी लिखलो छे, जु काहनुक ईना नीयमेन किताप मां लिखली वात काजे पुरो की पुरो नी पाळे तेरे पर गरा छे। ने जे नीयम कायदा पाळीन धरमी बणनेन हर करे, चे आखा गरात मां छे।* 11 मुसान नीयम मां असो बी लिखलो छे, "माणुस भुरसु राखीन धरमी बणीन जलम जीवतेलु रवसे।" ने जी वात छाची छे, की मुसान नीयम पाळने सी भगवान अगळ कुय बी धरमी नी बणे। 12 मुसान नीयम मां असो लिखलो छे, "जु ईनी लिखली आखी वात काजे पाळे, चु की चु जी आखी वात पाळनेन वजे सी जलम जीवतेलु रवसे।" बाकुन असु आखा नीयम पाळन्‌यु एक बी माणुस नी हय। ने जी वात छाची छे की नीयम, भगवानेन खुस-खबर पर भुरसु करनेन वात पर टेकायली नी हय।*

13 मुसान नीयम मां असो बी लिखलो छे, "तीनाक बी लाकड़ा पर टांगीन मार देय, चु गरा वाळु छे।" ईने रीते ईसु काजे बी माणसे लाकड़ान कुरुस पर खीळा ठुकीन टांग देदा ने तीनाक मार नाख्‌या। मुसान नीयम पुरा की पुरा नी पाळने सी जी गरा आपणे पर आवे, छाचीन तीनी गरा काजे ईसु मसी आपसा पर झेलीन, गरा वाळु बण गुयु, ने तीनी गराम सी आपणुक छुड़ाय लेदु। * 14 असु ईसु काहा गरा वाळु बण गुयु। अब्‌राहम काजे जी संयबरकत भगवान आपलु, ची संयबरकत मसी ईसु सी आखा आड़जात्‌या बी जड़नु चाहजे ने मसी ईसु पर भुरसु करने सी, आपणुक बी भगवान सी वायदु करलु चुखलु जीव-आत्‌मा जड़नु चाहजे, असु वीच्‌यार करीन ईसु आपणी गरा झेल्‌यु।

15 ए भायस्‌यो ने बहणस्‌या, मे तीनुक समजाड़ने करीन माणसे जीवनेन एक दाखलु देखाड़ु। कदी दुय माणसेन ईचमां वायदु हय जाय ती अळतेन चे बुली कुय बी टाळ नी सके, ने तेरेमां नी बड़े ने नी घटे। भगवान अब्‌राहम साते जी बुली कर्‌यु ची बी असीत छे। 16 भगवानेन बुली करला वायदु ते अब्‌राहम ने तेरी अवल्‌यात मायन एकुत जणा भीणी हवली छे। भगवान असु नी कह्‌यु की "आखी अवल्‌यात काजे," बाकुन तेरी अवल्‌यात मायन एकुत जणा काजे असु वायदु करलु छे, ने चु अवल्‌यात ईसु मसी छे।* 17 ईनी वात पर वीच्‌यार करु, भगवान अब्‌राहम साते वायदु कर्‌यु ने चार सोव तीस साल हय गुया ने अळतेन भगवान मुसान लिखला नीयम आपलु। मारो कह्‌णेन मतलब छे की जी बुली भगवान अब्‌राहम साते पेहेल करलु, तीनी बुली काजे अळतेन मुसा सी लिखला नीयम फालतु नी कर सके।* 18 काहाकी संयबरकतेन हक मुसा सी लिखला नीयम पर टेकलु रवतु, ती बुली करलु वायदु काय कामको नी रवतो, बाकुन हसो नी हवे, भगवान ते अब्‌राहम पर गीण करीन संयबरकतेन हक वायदा सी पेहलुत आपी देदु।

19 असो हय ती मुसान नीयम काय कामको? भगवान अब्‌राहम साते बुली करीन वायदु करलु ती चु अळतेन नीयम काहा आप्‌यु? हया नीयम ते, वायदु करला एकुत अवल्‌यात ईसु काजे आवता लग, माणसेक तींद्‌रा पापेन बारामां समजाड़ने करीन आपला हतला। ने जे नीयम ते, भगवान थुड़ाक सरग काहवाळ्‌या सी माणसे वाटे मुसाक मेळ कराड़न्‌यु बणावीन तेरा हात मां आपला हतला। 20 मेळ कराड़न्‌यु ते एकुत नी रहे, बाकुन भगवान एकुत छे।

21 असो हय ती मुसा सी लिखला नीयम भगवानेन करला वायदान वीरुद मां छे काय? कदी नी, कदी भगवान मुसान नीयम पाळनेन अनसारे खरलो जीवन आपी देदु, ती ते छाचलीन, धरमी बणनेन मतलब मुसान नीयम पाळनेन अनसारेत रवतो। 22 बाकुन चुखला सास्‌तुर मां असो देखाड़े की नीयम आखा माणसेक केदड़ान तसा पापेन कब्‌जा मां कर देदा। ने भगवानेन वायदान नेहु, ईसु मसी पर भुरसु करनेन छे, ने जे ईसु पर भुरसु करे, तीनुत काजे भगवानेन नीयमेन अनसारे छुटकारान संयबरकत जड़े।

23 तेबी ईसुन आवणेन पेहेल ने ईसु पर भुरसु करनेन पेहेल, आपणु काजे भुरसान वाट देखाव पड़ता लग, मुसान नीयम सी आपणी गुवाळी हवतेली। 24 आपणु ईसु पर भुरसु करीन धरमी बन्‌नु चाहे करीन आपणुक ईसु मसी धड़े लावणे करीन, मुसान नीयम पुर्‌या राखवाळ्‌यान तसा आपणी राखवाळी करतेला। 25 बाकुन हय ते भुरसान वाट देखाव पड़ गुई, ती हय आपणु पुर्‌या राखवाळ्‌यान कब्‌जा मां नी हय।

26 तुहुंं बी आखा ने आखा मसी ईसु पर भुरसु करने वाटे, भगवानेन बेटास बण गुयला छे, भले यहुदी हय, ते ने भले नी-यहुदी आड़जात्‌या हय। 27 ने ईसु मसी मां एक हवणे करीन, तुहुंं आखा ने आखा बपतीस्‌मा लीन, ईसु मसी काजे नवला पुथल्‌यान तसा पेहेर लेदला छे। 28 तुहुंं हय एक घरन्‌या बण गुयला छे, ने हय तुंद्‌रेम काय बी छीट नी रय, भले तुहुंं यहुदी माणसे हय नीते युनानी माणसे हय नीते आड़जात्‌या हय, भले गुलाम पावर्‌यु हय नीते मालीक हय, भले अदमी नीते बायर हय, तुहुंं आखा ईसु मसी मां एक हय गुयला छे। 29 असा करीन हय तुहुंं ईसु मसीन माणसे छे, ने तुहुंं बी अब्‌राहमेन अवल्‌यात ने वायदान अनसारे हकदार्‌या बी छे।