1 ए भायस्‌या ने बहणस्‌या, कदी तुहुंं, तुंद्‌रे मायन काहनाक काजे पाप करता देख लेवु, ती तुहुंं भगवानेन जीव-आत्‌मान कह्‌याम जीवण्‌या छे, तुहुंं सुवाळा बणीन तीनाक समजाड़ु ने ईसुत सात संगात मां पछा लावु, ती तुहुंं आपसान बी चुकसी कर, कांखुर मायन असो नी जाय की तुहुंं पापेन पारख मां पड़ जावु। 2 असु करीन तुहुंं एक दीसरान काहनु बी बुजु हाकलीन सात देवु, ने ईने रीते तुहुंं ईसु मसीन परमेन नीयम पुरो करे। 3 काहाकी काहनुक काय बी नी हय तेबी आपसा काजे दीसरा सी मटु समजे, ने ईनी रीते दीसरान भार नी हाकले, चु आपसा काजे धुकु देय। 4 बाकुन हर एक आपणात काम काजे जांच लेय, ने तत्‌यार दीसरान बारामां नी बाकुन आपणात बारामां तीनाक घमट करनेन टेम रवसे। 5 काहाकी हर एक माणुस आपसान ने बुज हाकलसे।

6 जु काहनुक तुहुंंक भगवानेन बुले सीकाड़े, तीना काजे तुहुंं तुंद्‌री आखी वारलु चीजेम साजु करु।

7 आपसा काजे धुकु मां देवु, भगवानेन ठट्‌टा नी उडाड़े, काहाकी माणुस ज वेरे चत काट्‌से। 8 जु डीलेन हर काजे खुस करीन जीवसे, तीनाक डीलेन हरेन अनसारे डंड जड़से, ने जु भगवानेन जीव-आत्‌मा काजे खुस करीन जीवसे तेरा जीवन मां भगवानेन जीव-आत्‌मान फळ मतलब तेरो गुण देखाव पड़से ने चु सदान जीवन काजे हात करसे। 9 आपणु काजे भलाय करता-करता हिम्‌मत नी हारनु चाहजे, आपणु जाणजे की भलाय करता जाय्‌न वारु टणका रवसु, ती आपणुक टेम आवसे ती मालीक भीणी सी ईनाम बी जड़से की जड़से। 10 ने मुखु जड़तात आखान वारु करनु चाहजे, खास करीन जे ईसु पर भुरसु करे, तींद्‌री भलाय ते करनुत चाहजे।

11 देखु, मे कसुक तुहुंं काजे आपसान हाते करीन मोटा-मोटा आकड़ा मां लिखलु छे। 12 जे माणसे डीलेन दीखावु चाहे चेत तुंद्‌री फतरी काटाड़ने वाटे दबाव बणावे, सीरप हेरेसी की चे मसीन कुरुसेन वजे सी सताय नी जाय। 13 जे आपसात पेहेरवटेन अघली चामड़ी काटाड़ला ते खरा, बाकुन जे बी मुसान नीयम पुरु नी पाळतेला, तेबी चे दीसरा यहुदी माणसे अगळ हामु हींद्‌रा पेहेरवटेन अघली चामड़ी काटाड़्‌या करीन तुंद्‌रे पर मटाय करने करीन तुंद्‌री पेहेरवटेन अघली चामड़ी काटाड़्‌ने हींडी र्‌या। 14 मे ते असली वातेन फीकुर नी करो, मारी हर जी छे की मे आपणा मालीक ईसु मसीन कुरुस पर अतरुत मटाय करो। ने मारी नींगा मां ईनी कळी काजे कुरुस पर चड़ावीन खीळा ठुकला छे, ने ईनी कळीन माणसेन नींगा मां मे कुरुस पर चड़ावीन खीळा ठुकाड़लु छे। 15 काहाकी हय फतरी काटणु बी कामको नी हय, बाकुन खास कामकी वात जी छे, की आपणु काजे पुरा की पुरा ईसुन तसा नवला बणता जाणु चाहजे। 16 जतरा बी ईना नीयम मां चाले, चे की चे भगवानेन खास ईस्‌रायली माणसे छे, तीनु आखा काजे भगवान सुक-सांती ने दया आप्‌या करे, असु मे भगवान सी दुवा करो।

17 अगा कुय मेसे काजे दमणु नी चाहजे, काहाकी मे ईसुन घाव काजे आपणा डील मां लीन फीरो।

18 ए भायस ने बहणस्‌या, आपणा मालीक ईसु मसीन गीण-दया तुंद्‌री जीव-आत्‌मा साते रया करे असु मे भगवान सी मांग करो, आमीन।