1 हेरेसी भगवानेन साहरे आरामेन जागा मां भरायणेन वायदु हय बी पुरु नी हयु, अतरे चेतीन रहु। नीते तीना आरामेन जागा मां भरायणु रय जासु। 2 काहाकी हामुक तींद्‌रेन तसा खुस-खबर सामळावलो हतलो। बाकुन चे तीनी खुस-खबर काजे सामळीन भुरसु नी कर्‌या, हेरेसी तीनुक सामळ्‌ळा बुले सी काय बी नफु नी हयु; काहाकी आरामेन जागाम भरायणेन जीत खुस-खबर आपणुक बी सामळावलो छे। 3 बाकुन हामु भुरसु कर्‌या, हेरेसी आपणु काजे तीना आरामेन जागा मां भरायणेन मुखु जड़ गुयलु छे,

"बाकुन जे भुरसु नी कर्‌या तींद्‌रे बारामां चु असु कह्‌वलु:

मे कीचवायन जी सगुन खादु, की चे मारा आरामेन जागा मां भराय नी सके!"

हेरेसी आपणुक ज मालुम पड़े की भगवान ते कळी घड़ायली ती सीत ईना आरामेन बारामां कह्‌यु। 4 काहाकी सातवा दाहड़ान बारामां ज कह्‌यु की "भगवान आपसो आखो काम पुरो करीन सातवे दाहड़े आराम कर्‌यु।" 5 ने उपर वाळा दाखला मां आपणु असा भणजे, "चे मारा आरामेन जागा मां नी भराय सके।" 6 तीनु माणसेक पेहले आरामेन जागान खुस-खबर सामळावलो, चे हुकुम नी मान्‌या करीन तीना आरामेन जागा मां नी भराय सक्‌या। 7 हेरेसी बेसका दाहड़ा हय गुया, ने अळी भगवान दावुदेन अनसारे असु कह्‌लु की,

आज तुहुंंक भगवानेन बुल सामळनेन अळी मुखु जड़ रयु,

हेरेसी तुंद्‌रेन तसा तुहुंं आपणी छाती काठी मां करु।

8 यहोसु कदी ईस्‌रायेली माणसेक आरामेन जागा मां पुगाड़ देतु, ती भगवान पछला दाहड़ाम दीसरा आरामेन दाहड़ान वात नी करतु। 9 अतरे आपणु ज जाणजे की, भगवानेन असामी धड़े आरामेन जागा मां भरायणेन दाहड़ु हय बी टाकायलुत रय रयु। 10 जु तीना आरामेन जागा मां भराये, चु आपसो काम पुरो करीन तीना आरामेन जागा मां भराये, जसु भगवान बी हेरा काम काजे पुरो करीन आराम कर्‌यु। 11 ईस्‌रायेली माणसे हुकुम नी मान्‌ने सी सर गुया, तसा आपणुक नी हवणु चाहजे। नी ते आपणु आरामेन जागाम भरायणे रय जासु। हेरेसी आपणु काजे बी तीना आरामेन जागा मां जुर सी भरायणु चाहजे।

12 काहाकी भगवानेन बुले जीवतेला, ने ताकतवाळा, ने काहनी बी पाणी पावली दुय धारी तलवार सी बी अदु धारवाळा चर-चर छे। चे बुले हामरा जीवन उंडारा मां उतरी जाय, ने जीव-आत्‌मा मां भराय जाय, ने हाटकान गाठो मां भराय जाय, ने हाटकान गीर मां बी भराय जाय; ने माणसेन मनेम वाळी वात काजे ने वीच्‌यार काजे पारखी लेय। 13 ने भगवानेन साहरे घड़ायली ईनी कळी मां काहनी बी चीज भगवान सी सातायली नी हय, तेरे अगळ आखी चीज उगाड़ली छे। ईना भगवान अगळ आपणुक लेखु देणु पड़से।

14 हेरेसी आपणु एक डाहलु मुखी पुजारु छे, मतलब भगवानेन पुर्‌यु ईसु, सरगे काजे वेणकीन गुयलु छे, अतरे ए भायस्‌यो ने बहणस्‌या! आवु, आपणु तीना भुरसा पर वारु टेकला रवजे। 15 आपणु मुखी पुजारु ईसु ते आपणी लुलखाय मां आपणे साते दुखी हये। चु ते आपणेन तसु पापेन साहरे पारखायलु ते खरु, बाकुन तेबी चु गुनाळु नी नीकळ्‌यु। 16 हेरेसी आवु, आपणु भुरसा भेळा गीण-दयान राजगादी अगळ जाजे, काहाकी आपणे पर गीण-दया हवे, ने गीण-दया जड़े, ने तीनी गीण-दयान साहरे आपणु काजे मदत जड़े।