Hebreus 5

1 हामु जाणजे की, भगवान एकेक मुखी पुजारा काजे हारुन्‌या पुजारान घराणाम सी नेवाड़े ने भगवानेन ने माणसेन ईचमां रय्‌न माणसे वाटे भगवानेन सेवा करने करीन तीनाक कामे लागाड़े। चु भगवान अगळ अळी-अळीन माणसेन पापेन माफी वाटे भगवान अगळ भाती-भातीन बादा चड़ावे। 2 ने चु डाहलु पुजारु आपसुत लुल्‌गाय सी घेरवायलु रवे, हेरेसी चु *5:2 डेड़-अकल्‌याडेड़-अकल्‌या ने भुल्‌या भटक्‌या माणसे साते नीचळु वेहवार कर सके। 3 हेरेसी तीनाक ते आपसान पापेन माफी वाटे जनवार्‌या मारीन पापेन माफी वाटे बादा चड़ावणु पड़े। 4 मुखी पुजारु बणनेन वाटु ईज्‌जतेन वात छे, बाकुन कुय बी जु वाटु आपणे आप नी लेय; बाकुन भगवानुत एकेक जणा काजे डाहलु पुजारु बणावणे करीन नेवाड़े। जसु भगवान आपसुत, हारुन्‌या काजे मुखी पुजारु बणावणे वाटे नेवाड़्‌यु।

5 हेरेसी ईसु मसी बी आपसा मन सी डाहलु मुखी पुजारु बणीन ईज्‌जत हात नी कर्‌यु,

बाकुन भगवानुत तीना काजे पुजारु बणायु,

ने तीनाक कह्‌यु, "तु मारु पुर्‌यु छे, ने मे आज सी तारु बास बण गुयलु छे।"

6 हेरेसी दीसरे जागे बी कहलो छे,

"तु मलीकीसीदेक्‌यान तसु,

जलम भगवानेन *5:6 पुजारुपुजारु बणीन रवसी।"

7 ईसु मसी ईनी धरती पर डील मां रवणेन टेमे, आयड़ी-आयड़ीन ने रड़ी-रड़ीन ने आसा पाड़ी-पाड़ीन, मरने सी बचाड़न्‌या भगवान धड़े लीलघाय ने दुवा करतेलु। ने चु आपसा काजे भगवानेन मरजी पुरी करने करीन तेरा हातेम सुपीन, आपसी खरली भक्‌ती देखाड़्‌यु। हेरेसी भगवान तेरी दुवा सामळी लेदु। 8 चु भगवानेन पुर्‌यु हतलु, तेबी चु दुख झेल्‌यु ने दुख झेलीन हुकुम मान्‌ने सीक्‌यु। 9 ने चु हुकुम मानीन पाक्‌कु हय गुयु, असु करीन ईसु मसी हुकुम मान्‌ने वाळा वाटे जलमेन छुटकारान वजे बण गुयु। 10 ने भगवान तीना काजे मलीकीसीदेक्‌यान तसु मुखी पुजारान वाटु आप्‌यु।

भुरसा सी अलग हय जाणेन फळ

11 हेरे बारामां मेसेक बेसकी वात कह्‌णु छे। बाकुन ची वात समजणु काठो छे, काहाकी तुंद्‌रा कान्‌टा बेहरा हय गुया। 12 हय लग ते, तुहुंं सीकाड़न्‌या बण जाणु हतलो, बाकुन आज लग ते, तुहुंं काजे भगवानेन बुलेन सुरु वाळी वातुत, अळी सीकाड़नु पड़ रयो। असो लागे की आज लग तुहुंं काजे नानला पुर्‌यान तसों दुत चाहजे, बाकुन खाणु नी चाहतो। 13 जो आज लग दुत पीया करे, च हाल पुर्‌योत छे, ने तीनाक धरमेन वचनेन बारामां कम समज मां आवे। 14 बाकुन वारलु खाणो ते तीनु मटला माणसे वाटे छे, चे तींद्‌रा जीवन मां वारलु भुंडा काजे उळखणे सीक गुया।