1 भगवानेन जुन्‌ली बुली मां बी भगवानेन पुजा-पाट करनेन रीतीन नेम हतला, ने तीनी पुजा-पाट वाटे ईनी धरती पर खास जागा बी हतली, चां एक तम्‌बु तान्‌लु हतलु। 2 तीना तम्‌बुन दुय खुणा हतला, ने खुणा काजे अलग करन्‌यु पड़दु बी हतलु। ने तीना तम्‌बुन पेहला खंगरा मां भीत हतली, ने टेबल हतली, ने टेबल पर भेट चहड़ावला रुटा हतला। ने ईना खुणा काजे चुखलु जागु कवतेला। 3 पड़दा पछळ वाळु दीसरा पड़दा पछळ चु तम्‌बु हतलु चुखलु जागु कहवायतेलु। 4 तीनी जागा मां सनान पेटी *9:4 धुप देणी वेदीधुप देणी वेदी हतली। ने चां सनान झाळ चहड़ावली पेटी बी हतली। जो बुलीन पेटी कहवायतेली। तीनी पेटी मां भगवानेन बुलीन डायरी हतली, चे दगड़ान बन्‌ला हतला, तीनी पेटी मां हारुनेन लाकड़ी बी हतली, तीनी लाकड़ी पर एक कावा कोवेळ्‌ळा डीरा बी फुटी आवला। ने तीनी पेटी मां एक सनान कवड्‌यु बी हतलु, ने तीना कवड्‌या मां सरगे सी भगवानेन साहरे आपलो मन्‌ना नावेन खाणो भरीन मेल्‌लो हतलो। 5 ने तीनी पेटीन ढाकणान नाव गीण-दयान राजगादी हतलो। ने पेटी पर भगवानेन सेक-सींगारेन सहलाणीन वेस मां करुब नावेन पाखड़ावाळा दुय सरग वाळा खबर लावण्‌यान मुरत्‌या जुड़ायला हतला, जे पसतावान पाखड़ा फेलायन तीनी गीण-दयान राजगादी पर छावायन साहळु करतेला। बाकुन हय आखा बीडारान बारामां बताड़नेन टेम नी हय।

6 जु असु आखु तज्‌बु हतलु, ने अळी भगवानेन पुजारा पेहला, तम्‌बा मां दाहड़ीत भरायन, भगवानेन पुजा-पाटेन रीत कर्‌या करतेला। 7 बाकुन माहीं वाळा कमरा मां मुखी पुजारु अतरुत सालेम एकुत कावा जनवार्‌यान लुही लीन जातलु। ने चु आपसा ने दीसरान भुल्‌या-चुक्‌या गुनान माफी वाटे चां आखो भगवान अगळ ईना लुहीन बादा चहड़ावतेलु। 8 ईनी वातेन साहरे चुखली जीव-आत्‌मा जो देखाड़े की जत्‌यार लग पेहलु तम्‌बु उबु छे, ती लग चुखला जागाम भरायणेन वाट उजेंती नी हये। 9 जु तम्‌बु आजुन टेम वाटे एक सहलाणी छे; तीना तम्‌बु मां असी भेट ने बादान जनवार्‌या चहड़ावतेला। तेरेमां भक्‌ती करने वाळान मन चुखो नी हय सके। 10 हेरेसी जे ते खाणे-पीणे ने भाती-भातीन तीहवारेन रीतीन डीलेन नेम छे, ने भाती-भाती धुवणेन रीती करनु। जे नेम, नवला कायदा जड़ता लग ठेहरावला छे।

11 बाकुन हय ईसु मसी ते भगवानेन मुखी पुजारु बणीन आवलु। चु अळी जादा वारु ने पुरा-पुरा पाक्‌का तम्‌बु मायन भगवानेन्‌चां पुग गुयलु छे। जु तम्‌बु ईनी कळीन चीजे करीन माणसेन हाते बणावलो नी हतलो। 12 ईसु मसी तीना सरग वाळा तम्‌बु मां बुकड़ान ने केवड़्‌यान लुही लीन नी भरायु, बाकुन एकुत कावा आपसा लुहीन जलम लग भेट आपीन, चुखली जागाम भराय गुयु। असु करीन चु आपणे वाटे भगवान धड़े जलम लग छुटकारु हात, करीन आपणु काजे आप देदु। 13 जुन्‌डला कायदान अनसारे, बुकड़ा ने बेलेन लुही ने *9:13 धपला केवड़ान रखड़ुधपला केवड़ान रखड़ु मुयळ्‌या माणसे पर नाखणे सी ने लुही छाटणे सी डीलेन मुयळो छेटे हय जाय, 14 ती ते तेरे सी बी जादा, ने पुरो पाक्‌को ईसु मसीन लुही छे। ईसु मसी ईना आपसा लुही काजे भगवानेन जलमेन जीव-आत्‌मान साहरे एक पाक्‌की बादान रुप मां भगवान अगळ आपणे वाटे नी-गुनाळा हय्‌न भेट कर देदु। हेरेसी आपणु काजे जीवतेला भगवानेन सेवा भक्‌ती कराड़ने करीन ईसु मसीन लुही आपणा मन काजे तीनु कुहर्‌या काम सी छुड़ावसे, ने आपणुक चुखा करसे। जे कुहर्‌या कामे आपणु काजे मुत भीणी ली जाय।

15 हय सामळु, भगवान पेहले वायदु करलु, तीने टेमे बी माणसे पाप कर्‌या, तीनुक पापेम सी छुड़ावणे करीन ईसु मसी कुरुस पर मरीन आपसु जीव आप देदु। ने चु ईसु मसी एक नवला वायदान मेळ कराड़न्‌यु बण गुयु हेरेन करीन की चु तीनु काजे बुलावलु छे, चे अमर जीवनेन वारीस हात करे।

16 जत्‌यार जागा नाव पर करनेन वायदान पावती तीयार हये, ती जागा नाव पर करन्‌यान मुतन बारामां गवा बी हवणु चाहजे। 17 काहाकी असी जागा वायदान पावती, जागा आपण्‌यु मरे तीत पाक्‌की हवी, ने जत्‌यार लग जागा नावे करन्‌यु जीवतेलु रवे, ती लग जागान पावती नी बणे। 18 हेरेसी जुन्‌डला वायदान पावती बी जनवार्‌या काजे मारीन भगवान अगळ लुही चहड़ावे तीत तीयार हवतेली। 19 तीना जमाना मां जत्‌यार मुसा, कायदान आखा हुकुम माणसे काजे सामळाय देदु, ती चु केवड़ान ने बुकड़ान लुही ठाहराम झेलीन पाणीम भेसकी देदु, ने रातला गाडरान कान्‌या ने जुफा झाड़कान डाळखे करीन चामड़ान बणला कायदान किताप पर ने आखा माणसे पर छाट देदु। 20 ने कह्‌यु, "ज तीना वायदान लुही छे, तीना वायदा काजे पुरो करीन पाळनेन हुकुम भगवान तुहुंं काजे आपलु छे।" 21 असु करीन मुसु तम्‌बु ने पुजा-पाटेन आखी चीज पर लुही छाट्‌यु। 22 छाचलीन, कायदान अनसारे आखी चीज लुही सी चुखी हवे; ने लुही उहवाड़े पाखुर पापेन माफी नी जड़े।

23 हेरेसी ज जरुड़ी छे की ईनी धरती पर जी चीज सरगेन चीजेन सहलाणीन रुप मां छे, तीनी चीज काजे जनवार्‌यान लुही सी चुखी करनु चाहजे, बाकुन सरगेन चीज काजे ते जनवार्‌यान लुही सी बी जादा वारु लुही सी चुखी करनु चाहजे। 24 काहाकी ईसु मसी तीना हाते करीन बांदला चुखला जागा मां नी भरायु, बाकुन आपणे वाटे हय सरगे मां भगवान अगळ हजुर हवणे करीन, सरगेत मां भराय गुयु। हात सी बणावलु चुखलु जागु ते छाचला चुखला जागान सहलाणी अतरुत छे। 25 डाहलु मुखी पुजारु हर साल दीसरा जनवार्‌यान लुही लीन चुखला जागा मां भरायतेलु। बाकुन ईसु तीना मुखी पुजारान तसु अळी अळीन आपसा डीलेन बादा चहड़ावणे करीन चुखला जागा मां नी भरायु। 26 ईसु अळी-अळीन आपसा डीलेन बादा चहड़ावणे करीन चुखला जागा मां भरायतु, ती तीनाक अळी-अळीन दुख झेलनु पड़तो; बाकुन चु ईनी कळीन आकरी दाहड़ा मां आपसा डीलेन बादा चहड़ावीन आपणा पाप छेटा करने करीन एकुत कावा माणुस बणीन आयु ने उजेंतु हयु। 27 जसों माणसे काजे एकुत कावा मरनु ने अळतेन तेरु नीयाव हवणु जरुड़ी छे, 28 तसुत मसी बी बेसका माणसेन पाप काजे हाकली लेणे वाटे एक कावा बादा चहड़ी गुयु; ने माणसे हेरी वाट देख र्‌या हींद्‌रा छुटकारा वाटे दीसरी कावा पाप नी हाकले तेबी देखायसे।